বিধানসভা নিৰ্বাচনৰ অভিমুখে থকা মিজোৰাম আৰু মেঘালয় ভ্ৰমণলৈ উন্নয়নৰ টোপোলা লৈ অহা প্ৰধান মন্ত্ৰীয়ে আজি মিজোৰামৰ পৰা পোনে পোনে শ্বিলঙত উপস্থিত হয়গৈ, য’ত তেওঁক মেঘালয় ৰাজ্যিক বিজেপিৰ তৰফৰ পৰা উষ্ণ আদৰণি জনোৱা হয়। তাৰ পিছতে প্ৰধান মন্ত্ৰীজনে ২,৩০০ কোটি টকীয়া শ্বিলং-নংষ্টইন-ৰংজেং-তুৰা (Shillong-Nongstoin-Rongjeng-Tura) সংযোগী এটা দুই লেনযুক্ত পথৰ নিৰ্মাণৰ শুভাৰম্ভ কৰে। এই পথটোৰ নিৰ্মাণকাৰ্য্যৰ উদ্বোধন কৰি প্ৰধান মন্ত্ৰীজনে ‘পৰিবহণৰ জৰিয়তে ৰূপান্তৰণ’ (Transformation by Transportation) ৰ কথা কয়। তাৰোপৰি তেওঁ কয় যে এই পথটোৱে হাজাৰ হাজাৰ লোকৰ ভ্ৰমণ সময় হ্ৰাস কৰিব, অৰ্থনীতিত অৰিহণা যোগাব আৰু শ্বিলং আৰু তুৰা চহৰৰ মাজত পোনপটীয়া সংযোগ স্থাপন কৰিব।
এই কাৰ্য্যসূচীৰ পিছতে প্ৰধান মন্ত্ৰীয়ে প’ল’ গ্ৰাউণ্ডত এখন নিৰ্বাচনী সভাত ভাষণ দিয়ে।
উল্লেখযোগ্য যে আজিৰ শ্বিলং-নংষ্টইন-ৰংজেং-তুৰা (Shillong-Nongstoin-Rongjeng-Tura) সংযোগী পথটোৰ নিৰ্মাণকাৰ্য্য প্ৰধান মন্ত্ৰীয়ে শুভাৰম্ভ কৰা কাৰ্য্যসূচীত আয়োজকে কিছুমান সংবাদকৰ্মীৰ প্ৰতি বৈষম্য কৰাৰ অভিযোগ উঠিছে। জানিব পৰা মতে, মেঘালয় চৰকাৰৰ দ্বাৰা অনুমোদিত পাছ থকাৰ পিছতো সংবাদকৰ্মীসকলক মোদীৰ উক্ত কাৰ্য্যসূচীৰ খবৰ সংগ্ৰহ কৰিবলৈ অনুমতি দিয়া নহ’ল। অসন্তুষ্ট সংবাদকৰ্মীসকলে কয় যে এছ পি জিৰ জোৱানসকলে তেওঁলোকক সভাগৃহত প্ৰৱেশ কৰিবলৈ দিয়া নাছিল। যেতিয়া তেওঁলোকে এছ পি জিৰ জোৱানসকলৰ সৈতে কথাৰ কটাকটি কৰি আছিল তেতিয়া এজন বিজেপি নেতাই এছ পি জিক ‘তেওঁলোক আমাৰ মেডিয়া নহয়’ বুলি কয়। ইয়াৰ পিছতে তৰ্কাতৰ্কিত লিপ্ত হয় সংবাদকৰ্মীসকল। তেতিয়া কেন্দ্ৰৰ পৰ্য্যটন মন্ত্ৰ্যালয়ৰ ৰাজ্যিক মন্ত্ৰী আলফ’নছ জোছেফে হস্তক্ষেপ কৰে যদিও তেওঁলোকক তাৰ পাছতো ভিতৰলৈ যাবলৈ দিয়া নহ’ল। ফলত সাংবাদিকসকল বাহিৰতে ৰৈ থাকিব লগীয়া হয়।
