ৰাজ্যত দীৰ্ঘদিনৰ পৰা চলি থকা কয়লাৰ চোৰাং তথা অবৈধ সৰবৰাহত সহযোগ কৰি আহিছে চৰকাৰী বিষয়াই। কয়লাৰ ছিণ্ডিকেট চলি থকাৰ কথাও কৃষক মুক্তিকে ধৰি বিভিন্ন পক্ষই অভিযোগ কৰি আহিছে।
চৰকাৰী বিষয়াৰ সহযোগতে যে কয়লাৰ চোৰাং কাৰবাৰী তথা অবৈধ সৰবৰাহকাৰীয়ে নিজৰ কামকাজ অবাধে চলাই যাব পাৰিছে সেইটো চি আই ডিৰ নিজাববীয়া গোচৰৰ তদন্তত ধৰা পৰিছে। মুখ্য মন্ত্ৰীৰ নিৰ্দেশত চি আই ডিয়ে কয়লাৰ চোৰাং কাৰবাৰী তথা চে’কগেইটসমূহত হোৱা অনিয়মৰ বিৰুদ্ধে নিজাববীয়াকৈ গোচৰ ৰুজু কৰি তদন্ত অব্যাহত ৰাখিছে।
এই সন্দৰ্ভত চি আই ডিয়ে পৰিবহণ বিভাগৰ ছজনকৈ বিষয়া-কৰ্মচাৰীক জেৰা কৰি আছিল। কালি তাৰে তিনিজনক গ্ৰেপ্তাৰ কৰে। আন তিনিজনক গ্ৰেপ্তাৰ কৰিব নোৱাৰিলে তেওঁলোকে অন্তৰ্ৱৰ্তী জামিন লৈ থকা বাবে। গ্ৰেপ্তাৰ হোৱা পৰিবহণ বিভাগৰ বিষয়া-কৰ্মচাৰীকেইজন হ’ল ক্ৰমে- চিত্ৰ কুমাৰ নাথ ((এনফ’ৰ্চমেণ্ট ইন্সপেক্টৰ), মৃগেন শৰ্মা (এনফ’ৰ্চমেণ্ট চেকাৰ) আৰু মাধৱ নেওগ (এনফ’ৰ্চমেণ্ট চেকাৰ)।
আন তিনিজনকো কালি চি আই ডিৰ কাৰ্য্যালয়লৈ তলব কৰি জেৰা কৰিছিল যদিও এইকেইজনে অন্তৰ্ৱৰ্তী জামিন লৈ থকাৰ অজুহাতত জেৰাৰ সময়ত সহযোগ নকৰিলে। এই তিনিজন হ’ল ক্ৰমে- তপোৰাম বৰা, অনুৰাগ শাণ্ডিল্য, আৰু বেদান্ত গগৈ।
উল্লেখযোগ্য যে চি আই ডিয়ে পৰিবহণ বিভাগৰ বিভিন্ন স্থানত কৰ্মৰত আন বহুকেইজন বিষয়া-কৰ্মচাৰীৰ বিৰুদ্ধে গোচৰ ৰুজু কৰিছে। জানিব পৰামতে এই বিষয়া-কৰ্মচাৰীসকলে কয়লাৰ চোৰাং কাৰবাৰীক চে’কগেইটত পাৰ হোৱাৰ অনুমতি দি অনিয়ম কৰি আহিছিল।
অ’ভাৰল’ডিং থকা আৰু ট্ৰেনজিট পাছ নথকা কয়লাৰ ট্ৰাক বিনা বাধাই পাৰ হ’বলৈ দি ধন ঘটা কাৰবাৰ গোটেই ৰাজ্যতে দীৰ্ঘদিনৰ পৰাই চলি আহিছে বুলি বিভিন্ন সময়ত বিভিন্ন পক্ষই অভিযোগ তুলি আহিছিল। বিধানসভাৰ মজিয়াত যোৱা ফেব্ৰুৱাৰি মাহত পৰিবহণ বিভাগৰ মন্ত্ৰী চন্দ্ৰমোহন পাটোৱাৰীয়ে কোনো কয়লা ছিণ্ডিকেইট নাই তথা চে’কগেইটত অনিয়ম হোৱা নাই বুলি দাবী কৰিছিল যদিও চি আই ডিৰ অভিযান আৰু গোচৰে সত্য উদঙাই দিলে।
