উচ্চতৰ মাধ্যমিক পৰীক্ষা তথা স্নাতক পৰীক্ষা সমাপ্ত হোৱাৰ পিছত অসমৰ ছাত্ৰ-ছাত্ৰীসকলে গুৱাহাটীত অনুষ্ঠিত হ’বলগীয়া শিক্ষা সম্পৰ্কীয় প্ৰদৰ্শনী মেলা ‘’১৬তম গুৱাহাটী এডুফেষ্ট’’ত ভৱিষ্যত কেৰিয়াৰ বিচাৰি চোৱাৰ সুবিধা লাভ কৰিব। অহা ৩০ এপ্ৰিল আৰু ১ মে’ত গুৱাহাটীৰ টি আৰ পি ষ্টেডিয়ামত এই মেলা অনুষ্ঠিত হ’ব।
শৈক্ষিক প্ৰতিষ্ঠানসমূহৰ কেন্দ্ৰ আৰু সকলো ছাত্ৰ-ছাত্ৰী তথা শিক্ষা প্ৰতিষ্ঠানৰ সংযোগ ক্ষেত্ৰ হিচাপে ২০১৮’ৰ এই শিক্ষা সম্পৰ্কীয় মেলাখনৰ আয়োজন কৰিছে লাইন্চপিনে।
এই বছৰ কেৰিয়াৰ সম্পৰ্কীয় মেলাখনত অষ্ট্ৰেলিয়া, চুইজাৰলেণ্ড আৰু ছিংগাপুৰকে ধৰি ভাৰতৰ লগতে বিদেশৰ প্ৰায় ৫০ খন শিক্ষা প্ৰতিষ্ঠানে অংশগ্ৰহণ কৰিব। বিজ্ঞানৰ বিভিন্ন শাখাৰ লগতে আভিযান্ত্ৰিক, চলচ্চিত্ৰ নিৰ্মাণ, ফেশ্যন ডিজাইনিং, হোটেল মেনেজমেন্ট, ট্যুৰিজম, বিজনেছ মেনেজমেন্ট আদি বিভিন্ন বিষয়ৰ পাঠ্যক্ৰমত নামভৰ্তিৰ সপোন দেখা ছাত্ৰ-ছাত্ৰীয়ে তেওঁলোকৰ পছন্দৰ প্ৰতিষ্ঠানখন বিচাৰি পাব।
এডুফেষ্টত প্ৰতিষ্ঠানৰ প্ৰতিনিধিৰ সৈতে প্ৰত্যক্ষভাৱে মত বিনিময় সুযোগ লাভ কৰাৰ লগতে পাঠ্যক্ৰমসমূহৰ বাবে প্ৰয়োজনীয় অৰ্হতা, প্ৰয়োজনীয় নম্বৰৰ তথ্য বা বৃত্তিৰ সুবিধা আদি বিষয়সমূহে বিশদভাৱে জানিব পাৰিব। প্ৰতিদিনে ৰাতিপুৱা ১১ বজাৰ পৰা নিশা ৭ বজালৈ মুকলি থাকিব।
এই মেলাখনত অষ্ট্ৰেলিয়াৰ মাই কেৰিয়াৰ মেট্ছৰ কেৰিয়াৰ মেট্ছিং টেষ্ট, নিকনৰ দ্বাৰা ফটোগ্ৰাফী কৰ্মশালী আৰু ৰাষ্ট্ৰীয় নাট্য বিদ্যালয়ৰ প্ৰাক্তন ছাত্ৰ-ছাত্ৰীৰ দ্বাৰা নাট কৰ্মশালাৰ অনুষ্ঠানৰো আয়োজন কৰা হৈছে।
‘’ আমাৰ এই মেলা খন অঞ্চলটোৰ ছাত্ৰ সমাজ আৰু অভিভাৱকসকলে আটাইতকৈ বিশ্বাসযোগ্য মেলা হিচাপে বিবেচনা কৰে কিয়নো ভাৰত আৰু বিদেশৰ কেৱল স্বীকৃতিপ্ৰাপ্ত শীৰ্ষ প্ৰতিষ্ঠানসমূহে ইয়াত অংশগ্ৰহণ কৰে,’’-এডুফেষ্টৰ আয়োজক লাইন্চপিনৰ কৌশিক বৰুৱাই এইদৰে কয়।