অসমত কংগ্ৰেছ দলৰ ক্ৰমবৰ্ধমান উত্থানক লৈ শাসকীয় বিজেপি দল শংকিত হৈ পৰা বুলি এক গুৰুতৰ অভিযোগ উত্থাপন হৈছে। শোণিতপুৰ জিলাৰ বিহগুৰিৰ উত্তপ্ত পৰিস্থিতিৰ পাছত আজি বিশ্বনাথ জিলাৰ চতিয়াতো অনুৰূপ ঘটনাৰ পুনৰাবৃত্তি ঘটে।
জানিব পৰা মতে, অসম প্ৰদেশ কংগ্ৰেছ কমিটিৰ এক সঁজাতী দলক চতিয়াত বিজেপিৰ একাংশ সমৰ্থকে সমদল কৰি যোৱাত বাধা প্ৰদান কৰে। কংগ্ৰেছৰ অভিযোগ অনুসৰি, বিধায়ক পদ্ম হাজৰিকাৰ অনুগামী একাংশ লোকে এক পৰিকল্পিত ষড়যন্ত্ৰৰ জৰিয়তে এই বাধাৰ সৃষ্টি কৰিছে।
আজিৰ এই সমদলত উপস্থিত আছিল অসম প্ৰদেশ কংগ্ৰেছ কমিটিৰ সভাপতি গৌৰৱ গগৈ, বিধানসভাৰ বিৰোধী দলপতি দেৱব্ৰত শইকীয়া, সাংসদ ৰকিবুল হুছেইন, বিধায়িকা শিৱামণি বৰা আৰু নিখিল ভাৰত কংগ্ৰেছ কমিটিৰ অসমৰ দায়িত্বত থকা সম্পাদক মনোজ চৌহান প্ৰমুখ্যে কেইবাজনো জ্যেষ্ঠ নেতা। নেতা-কৰ্মীৰ দলটো চতিয়াৰ অভিমুখে গৈ থকা অৱস্থাত একাংশ দুষ্কৃতিকাৰীয়ে বাধা দিয়াৰ লগতে তেওঁলোকৰ বাহনলৈ লক্ষ্য কৰি শিলগুটি নিক্ষেপ কৰে। এই আকস্মিক আক্ৰমণত কংগ্ৰেছ দলৰ কেইবাজনো কৰ্মী আহত হোৱাৰ লগতে নেতা-কৰ্মীসকলৰ বহুকেইখন বাহন বেয়াকৈ ক্ষতিগ্ৰস্ত হয়।
এই ঘটনাৰ পাছতে সমগ্ৰ অঞ্চলটোত এক তীব্ৰ উত্তেজনাপূৰ্ণ পৰিৱেশৰ সৃষ্টি হয়। পৰিস্থিতি অধিক শোচনীয় হৈ পৰাত বিশ্বনাথ চাৰিআলি আৰক্ষীৰ এটা বৃহৎ দল ততাতৈয়াকৈ বৰগাঙত উপস্থিত হয়। আৰক্ষীৰ উপস্থিতিত পৰিস্থিতি কিছু নিয়ন্ত্ৰণলৈ আহে যদিও কংগ্ৰেছ কৰ্মীসকলৰ মাজত তীব্ৰ ক্ষোভ দেখিবলৈ পোৱা গৈছে। উক্ত আক্ৰমণৰ ঘটনাক লৈ কংগ্ৰেছ দলৰ তৰফৰ পৰা দুষ্কৃতিকাৰীৰ বিৰুদ্ধে বৰগাঙতে এখন এজাহাৰ দাখিল কৰা হৈছে। কংগ্ৰেছ নেতৃত্বই এই ঘটনাক গণতন্ত্ৰৰ ওপৰত আঘাত বুলি অভিহিত কৰিছে।
