চাহ বাগিচাৰ অধীনৰ পথসমূহো ৰাজ্য চৰকাৰৰ গড়কাপ্তানী বিভাগে নিৰ্মাণৰ দায়িত্ব ল’ব। বাগিচাবিলাকৰ অৱস্থা বৰ্তমান সিমান ভাল নহয় বাবে ৰাজ্য চৰকাৰে গ্ৰহণ কৰিছে এই অভিলাষী আঁচনি। গড়কাপ্তানী বিভাগৰ মন্ত্ৰী ড০ হিমন্ত বিশ্ব শৰ্মাই আজি এই সিদ্ধান্তৰ কথা ঘোষনা কৰিছে।
সোমবাৰে দিচপুৰৰ গড়কাপ্তানী বিভাগৰ সন্মিলন আৰু প্ৰশিক্ষণ কেন্দ্ৰত অনুষ্ঠিত বিভাগীয় মন্ত্ৰী আৰু বিষয়াসকলৰ সৈতে বিজেপি বিধায়কসকলৰ গড়কাপ্তানী বিভাগৰ পৰ্যালোচনা বৈঠকৰ পাছত সাংবাদিকৰ আগত এই কথা প্ৰকাশ কৰে মন্ত্ৰী ড০ হিমন্ত বিশ্ব শৰ্মাই।
মন্ত্ৰী ড০ শৰ্মাই কয়, “অসমৰ ৮০০খন বাগিচাৰ পথ নিৰ্মাণৰ বাবে চৰকাৰে প্ৰতিখনৰ বাবে ১ কোটিকৈ মুঠ ৮০০ কোটি টকা বাজেটতত নিৰ্ধাৰণ কৰিছে। সেই টকাৰে গড়কাপ্তানী বিভাগৰ অধীনত বাগিচাসমূহৰ পথবোৰ নিৰ্মাণ কৰাৰ সিদ্ধান্ত গ্ৰহণ কৰা হৈছে।”
তেওঁ লগতে বহুকেইখন বাগিচাৰ কৰ্তৃপক্ষৰ পৰা বৰ্তমানলৈ আপত্তিহীনতাৰ প্ৰমাণপত্ৰ (NOC) লাভ কৰা নাই বুলি জানিবলৈ দি এন অ’ চি দিলেই বাগিচাখনে ১ কোটিৰ অনুদান পাব বুলি কয়।
উল্লেখ্য যে, পূৰ্বে বাগিচাৰ অন্তৰ্গত পথ নিৰ্মাণৰ দায়িত্ব বাগিচা কৰ্তৃপক্ষৰ হাতত ন্যস্ত আছিল। এতিয়া গড়কাপ্তানী বিভাগক বাগিচাৰ অধীনৰ পথ নিৰ্মাণ কৰাৰ এই সিদ্ধান্ত ৰাজ্য চৰকাৰে প্ৰথমবাৰৰ বাবে গ্ৰহণ কৰিছে।
এই সন্দৰ্ভত বিজেপিৰ ৰাজ্যিক সভাপতি ৰঞ্জিত কুমাৰ দাসে কয়, ‘অসমৰ বাগিচাসমূহৰ অৰ্থনৈতিক অৱস্থা ভাল নহয়। তেনে ক্ষেত্ৰত পথ নিৰ্মাণৰ দায়িত্ব তেওঁলোকলৈ ঠেলি দিলেই আমাৰ দায়বদ্ধতা শেষ নহয়। বাগিচাৰ লোকসকলো অসমৰেই জনসাধাৰণ। আমি তেওঁলোকৰ কথাও চিন্তা কৰিব লাগিব।”
দাসে লগতে চৰকাৰৰ এনেধৰণৰ পদক্ষেপে বাগিচাসমূহৰ অৱস্থা উন্নত পথলৈ আনিব বুলিও আশা ব্যাক্ত কৰে।
আনহাতে, নিৰ্বাচনৰ প্ৰতি লক্ষ্য ৰাখিয়েই বিজেপি নেতৃত্বাধীন চৰকাৰখনে এনে সিদ্ধান্ত গ্ৰহণ কৰা বুলি কয় বিৰোধী দলপতি দেৱব্ৰত শইকীয়াই। তেওঁ কয়, “চাহ বাগিচাৰ ভোটাৰক আকৰ্ষিত কৰাৰ উদ্দেশ্যে বিজেপিয়ে এই পদক্ষেপ লৈছে। বাগিচাসমূহত খোৱাপানী, বিদ্যালয়, স্বাস্থ্য, অনাময় আদি বিভিন্ন সমস্যা আছে। চৰকাৰে এনেবোৰ সমস্যাতহে গুৰুত্ব দিয়াৰ প্ৰয়োজন।”
শইকীয়াই ইয়াৰ উপৰি বিজেপি চৰকাৰে ইয়াৰ পূৰ্বে চমক সৃষ্টিৰ কাৰণে বাগিচাৰ শ্ৰমিকক বেংক একাউণ্ট খোলোৱা আৰু চৰ্দাৰসকলক ম’বাইল ফ’ন দি প্ৰলোভিত কৰা চেষ্টা কৰা বুলিও মন্তব্য কৰে।
