কিদৰে চলিছে বটদ্ৰৱাৰ চৰকাৰী চিকিৎসালয় সমূহত চিকিৎসা সেৱা? চিকিৎসক আৰু পৰ্যাপ্ত ঔষধ উপলব্ধ আছেনে চিকিৎসালয় সমূহত? কি পৰিবেশত ৰোগী সকলে লাভ কৰিছে চিকিৎসা সেৱা? এই সকলো দিশৰ বুজ ল’বলৈ আজি বটদ্ৰৱা সমষ্টিৰ অন্তৰ্গত দলংঘাটৰ মহাত্মা গান্ধী আদৰ্শ চিকিৎসালয়ত ছাডেন ভিজিট দিয়ে বটদ্ৰৱাৰ বিধায়িকা আঙুৰলতা ডেকাই।
আজি দুপৰীয়া ভাগত চিকিৎসালয়খনত হঠাৎ উপস্থিত হৈ বিধায়িকাগৰাকীয়ে ৰোগীসকলৰ অৱস্থাৰ বুজ লোৱাৰ লগতে চিকিৎসালয় চৌহদ তথা কোঠাসমূহৰ পৰিস্কাৰ-পৰিচ্ছন্নতাৰ দিশটোৰ ওপৰতো তন্ন-তন্নকৈ নিৰীক্ষণ কৰে। তেওঁ লগতে চিকিৎসালয়খনৰ বিভিন্ন অভাৱ-অভিযোগ সন্দৰ্ভতো চিকিৎসালয় কৰ্তৃপক্ষ আৰু স্থানীয় ৰাইজৰ লগত আলোচনাত মিলিত হয়।
আনহাতে, বিধায়িকাগৰাকী চিকিৎসালয়খনত উপস্থিত হোৱাৰ সময়তে এজন চিকিৎসক উপস্থিত নথকাক কেন্দ্ৰ কৰি খৰ্গহস্ত হৈ পৰে বিধায়িকাগৰাকী। এই সন্দৰ্ভত শীঘ্ৰে চিকিৎসকগৰাকী নিয়মীয়াকৈ চিকিৎসালয়ত উপস্থিত থাকি চিকিৎসা সেৱা আগবঢ়াবলৈ নিৰ্দেশ দিয়াৰ লগতে ভৱিষ্যতে এনে নকৰিবলৈও সকীয়াই দিয়ে বিধায়িকা গৰাকীয়ে।
উল্লেখ্য যে, পৰ্যাপ্ত চিকিৎসক-চিকিৎসা কৰ্মীৰ অভাৱ, ঔষধৰ নাটনি, নূন্যতম চিকিৎসা সুবিধা উপলব্ধ নথকাকে ধৰি বিভিন্ন সমস্যাৰে ভাৰাক্ৰান্ত দলংঘাট আদৰ্শ চিকিৎসালয়খনিত শীঘ্ৰে আন্ত:গাঁথনি উন্নয়নৰ দাবী জনাইছে স্থানীয় ৰাইজে।
