ৰাষ্ট্ৰীয় আৰু আন্তৰাষ্ট্ৰীয় পৰ্যায়ত ছিকিমক পৰিৱেশ সংবেদনশীল(গ্ৰীণ ডেষ্টিনেশ্যন) হিচাপে আগবঢ়ায় নিবলৈ ৰাজ্য চৰকাৰে বলিউডৰ প্ৰখ্যাত কণ্ঠশিল্পী মোহিত চৌহানক গ্ৰীণ এম্বেছাডৰ হিচাপে মনোনীত কৰে।
আজি বিজ্ঞপ্তিযোগে এই কথা জানিবলৈ দিয়ে ছিকিম চৰকাৰৰ বন,পৰিৱেশ আৰু বন্যপ্ৰাণী সংস্থাপন বিভাগে।
বিভাগটোৱে বিবৃতিটোত উল্লেখ কৰি কয়, ‘জৈৱ বৈচিত্ৰ আৰু প্ৰাকৃতিক সম্পদৰ বাবে সৰ্বত্ৰে ছিকিম পৰিচিত। এই সকলোবোৰ যোৱা দুটা দশকৰো অধিক কাল ধৰি সংৰক্ষণ কৰি অহা হৈছে। সেয়ে এতিয়া ছিকিমক ৰাষ্ট্ৰীয় তথা আন্তৰাষ্ট্ৰীয় পৰ্যায়ত লৈ যোৱাৰ উদ্দেশ্যে ৰাজ্য চৰকাৰৰ অনুমতি গ্ৰহণ কৰি বলিউডৰ প্ৰখ্যাত কণ্ঠশিল্পী মোহিত চৌহানক গ্ৰীণ এম্বেছাডৰ হিচাপে মনোনীত কৰা হৈছে’।
ইফালে এই সন্দৰ্ভত মোহিত চৌহানে নিজৰ ফেচবুক পেজৰ জৰিয়তে প্ৰতিক্ৰিয়া প্ৰকাশ কৰি কয়- ‘ছিকিমৰ গ্ৰীণ এম্বেছাডৰ হিচাপে মোক মনোনীত কৰা বাবে মই অত্যন্ত সুখী। মোৰ প্ৰতি দেখুওৱা মৰম আৰু শ্ৰদ্ধাৰ বাবে মুখ্য মন্ত্ৰী পৱন ছামলিং আৰু ছেৰিং ৱাংৰি লেপছাৰ লগতে ছিকিমৰ জনসাধাৰণক আন্তৰিকতাৰে ধন্যবাদ জ্ঞাপন কৰিছো। মই গোটেই বিশ্বজুৰি ছিকিমৰ মনোমোহা পৰিৱেশ আৰু জৈৱবৈচিত্ৰৰ বিষয়ে লৈ যোৱাৰ প্ৰয়াস কৰিম’।
