মঙলবাৰে মিজোৰামৰ অগ্ৰণী ছাত্ৰ সংগঠন মিজো জিৰলাই পউলে সীমান্ত চহৰ বৈৰাবীৰ ওচৰৰ জফাইত জিৰণি গৃহ নিৰ্মাণ বন্ধ ৰখাৰ সিদ্ধান্ত গ্ৰহণ কৰিছে। মঙলবাৰে শেহ নিশা আইজলত অনুষ্ঠিত এখন জৰুৰী বৈঠকত সংগঠনটোৱে এই সিদ্ধান্ত গ্ৰহণ কৰে।
‘’গীৰ্জাৰ নেতাসকলৰ সংস্থা আৰু ওৱাই এম এৰ বাৰম্বাৰ অনুৰোধৰ পিছত আমি জিৰণি গৃহ নিৰ্মাণৰ কাম সাময়িকভাৱে বন্ধ ৰখাৰ সিদ্ধান্ত গ্ৰহণ কৰিছো,’’-ছাত্ৰ সংগঠনটোৰ সাধাৰণ সম্পাদক লালনুনমাৱাইয়া পাওটুৱে জানিবলৈ দিয়ে।
কেন্দ্ৰীয় ওৱাই এম এ, মিজোৰাম এল্ডাৰছ’ ইউনিয়ন, ৰাজ্যখনৰ অগ্ৰণী মহিলা সংস্থা এমএইচআইপি আৰু মিজো ছাত্ৰ সন্থাকে ধৰি মিজোৰামৰ কেইবাটাও সংগঠনে জফাইত জিৰণি গৃহ নিৰ্মাণ বন্ধ ৰাখিবলৈ আহ্বান জনাইছিল।
‘’মিজো জিৰলাই পউলে মিজোৰামৰ সীমান্ত সুৰক্ষিত কৰাৰ ইয়াৰ কাৰ্যসূচী প্ৰত্যাহাৰ কৰা নাই আৰু জফাইত জিৰণি গৃহ নিৰ্মাণ কৰাৰ লক্ষ্যৰ পৰাও আঁতৰি অহা নাই, কিন্তু সীমান্তত দুয়োখন ৰাজ্যৰ আৰক্ষী বাহিনীৰ গতি বিধি লক্ষ্য কৰি আমি আমাৰ কাৰ্যসূচী সাময়িকভাৱে স্থগিত ৰাখিছো,’’- ছাত্ৰ সংগঠনটোৰ আনুষ্ঠানিক বিবৃতিত এইদৰে কোৱা হৈছে।
কেন্দ্ৰীয় গৃহ মন্ত্ৰালয়ে অসম আৰু মিজোৰাম দুয়োখন ৰাজ্যৰে মুখ্য সচিবক আলোচনাৰ জৰিয়তে অহা ২০ মাৰ্চৰ ভিতৰত সীমান্তৰ সমস্যাটোৰ এটা সন্তোষজনক সমাধান উলিয়াবলৈ নিৰ্দেশ দিছে।
মিজোৰাম চৰকাৰে আইজল আৰু কলাশিব জিলাত যোৱা নিশাৰে পৰা ১৪৪ ধাৰা জাৰি কৰিছে। মিজো জিৰলাই পউলে অভিযোগ কৰে যে মিজোৰাম চৰকাৰৰ সীমান্ত সমস্যাৰ ক্ষেত্ৰত এতিয়াও নিদ্ৰা ভংগ হোৱা নাই।
‘’ আইজল আৰু কলাশিব জিলাৰ দুখন চহৰত ১৪৪ ধাৰা জাৰি কৰাটোৱে স্পষ্ট কৰি তুলিছে যে ইয়াৰ সীমান্ত সুৰক্ষাৰ ক্ষেত্ৰত লাল থানহাওলা চৰকাৰে মূৰ পোলকা মাৰিছে,’’-ছাত্ৰ সংগঠনটোৱে এইদৰে মন্তৱ্য কৰে।
