আসন্ন ত্ৰিপুৰা নিৰ্বাচনৰ প্ৰাক মুহুৰ্তত ৰাজ্যখনৰ ৰাজনীতিত সঘনাই পট পৰিৱৰ্তন হোৱা পৰিলক্ষিত হৈছে। বুধবাৰে ত্ৰিপুৰাৰ ৰাজ্যপাল তথাগত ৰয়ে কেন্দ্ৰীয় গৃহ মন্ত্ৰী ৰাজনাথ সিঙক সাক্ষাত কৰি ৰাজ্যখনৰ আইন-শৃংখলা সম্পৰ্কীয় কিছু তথ্য দাখিল কৰে।
বিগত কিছু দিনৰ পৰা ৰাজ্যপাল আৰু মুখ্য মন্ত্ৰী মানিক সৰকাৰৰ মাজত চলা তীব্ৰ অসন্তুষ্টিৰ বিষয়েও গৃহমন্ত্ৰীগৰাকীক অৱগত কৰোৱায়। লক্ষণীয় যে ৰাজ্যপালগৰাকীয়ে নিৰ্বাচনৰ আগত ৰাজ্যৰ আইন শৃংখলা সম্পৰ্কীয় আলোচনা কৰিবলৈ ৰাজ্যৰ মুখ্য সচিৱ আৰু আৰক্ষী সঞ্চালক প্ৰধানক ৰাজভৱনলৈ যোৱাৰ পৰা বিৰত থাকিবলৈ মুখ্য মন্ত্ৰীয়ে নিৰ্দেশ দিয়ে বুলি জনায়।
আনহাতে এই সন্দৰ্ভত মানিক সৰকাৰে কয় যে দুয়োজন উচ্চ পৰ্যায়ৰ বিষয়া ৰাজ্যপালৰ লগত আলোচনাত বহাৰ কোনো যুক্তি নাই, কিয়নো ইতিমধ্যে ৰাজ্যপালৰ লগত এই সম্পৰ্কত এসপ্তাহ আগতে আলোচনা সম্পন্ন হৈ গৈছে।
কিছুদিন পূৰ্বে ত্ৰিপুৰা নিৰ্বাচনৰ বিজেপি পৰ্যবেক্ষক হিমন্ত বিশ্ব শৰ্মাই ৰাজ্যখনৰ বহু জনসভাত ত্ৰিপুৰাৰ বৰ্তমান পৰিস্থিতিৰ বিষয়ে চৰকাৰখনক সমালোচনা কৰা দেখা যায়। বৰ্তমান সময়ত ত্ৰিপুৰাত নিৰ্বাচন অনুষ্ঠিত কৰিব পৰা পৰিৱেশ নাই বুলিও মন্তব্য কৰে শৰ্মাই।
এই বিষয়ে যোৱা সপ্তাহত হিমন্ত বিশ্ব শৰ্মাই নতুন দিল্লীত ভাৰতীয় নিৰ্বাচন আয়োগক লগ ধৰি ত্ৰিপুৰাৰ বৰ্তমান পৰিস্থিতিৰ বিষয়ে অৱগত কৰাৰ লগতে ত্ৰিপুৰাত নিৰ্বাচন অনুষ্ঠিত কৰিব পৰা পৰিৱেশ নাই বুলি আয়োগৰ আগত সদৰী কৰে।
তদুপৰি ত্ৰিপুৰা নিৰ্বাচন হিংসামুক্ত নহয় বুলি আশংকা ব্যক্ত কৰি নিৰ্বাচন আয়োগক অৱগত কৰোৱা বুলিও কয় হিমন্ত বিশ্ব শৰ্মাই।
