হত্যাকাৰীক শাস্তি দিয়াত চৰকাৰৰ ব্যৰ্থতা আৰু থাদৌ কুকি ভাষাৰ পাঠ্য বিষয় উচ্চতৰ মাধ্যমিক বিদ্যালয়বোৰত প্ৰচলন নকৰাৰ অভিযোগত মণিপুৰৰ থাদৌ ষ্টুডেণ্টছ এছ’চিয়েশ্যনে ৩৬ ঘণ্টীয়া বন্ধৰ আহ্বান জনাইছে।
সংগঠনটোৱে সংবাদ মাধ্যমলৈ প্ৰেৰণ কৰা এটা বিবৃতিত কয় যে যোৱা বছৰৰ ৫ মে’ত ছগনুত হোৱা দুজন লোকৰ হত্যাকাণ্ডৰ লগতে ২০১৬ চনৰ ২৯ ফেব্ৰুৱাৰিত হোৱা মলনম জুনিয়’ৰ হাই স্কুলৰ সহকাৰী শিক্ষক থংখোগিনৰ নৃশংস হত্যাকাণ্ডৰ উচিত বিচাৰ নকৰাৰ প্ৰতিবাদ স্বৰূপে আৰু বাৰম্বাৰ দাবী কৰি অহাৰ পিছতো থাদৌ কুকি ভাষাৰ পাঠ্য বিষয় উচ্চতৰ মাধ্যমিক বিদ্যালয়বোৰত প্ৰৱৰ্তন নকৰাৰ প্ৰতিবাদস্বৰূপে অহা ১৬ জানুৱাৰিৰ পুৱা ৬ বজাৰ পৰা ১৭ জানুৱাৰিৰ সন্ধিয়া ৬ বজালৈ মণিপুৰ বন্ধৰ আহ্বান জনাইছে।
এই বন্ধ আহ্বান জনাই সংগঠনটোৱে বন্ধৰ কাৰ্য্যসূচীত যাত্ৰীবাহী যান-বাহন আৰু জনসাধাৰণৰ পৰা সহযোগিতা বিচাৰিছে।
জানিব পৰা মতে ইম্ফল-ম’ৰে, ইম্ফল-ডিমাপুৰ, ইম্ফল-জিৰিবাম আৰু ইম্ফল-চুৰাচন্দপুৰৰ যাতায়াতত প্ৰভাৱ পেলোৱাৰ সম্ভাৱনা আছে।
প্ৰেছ বিজ্ঞপ্তিটোৱ কোৱামতে চৰকাৰৰ সংশ্লিষ্ট কৰ্তৃপক্ষক বাৰম্বাৰ অনুৰোধ জনাই অহাৰ পিছতো উক্ত হত্যাকাণ্ডৰ কোনো ধৰণৰ কাৰ্য্যকৰী বিচাৰ প্ৰক্ৰিয়া দেখা নগ’ল। এই পৰ্য্যন্ত হত্যাকাৰীক ধৰিবলৈ চৰকাৰ সক্ষম নহ’ল।
বিজ্ঞপ্তিটোত কোৱামতে সংগঠনটোৰ এটা দলে যোৱা বছৰৰ ২২ ডিচেম্বৰত কাকচিং জিলাৰ আৰক্ষী অধীক্ষক, এই গোচৰটোৰ তদন্তকাৰী বিষয়া আৰু অতিৰিক্ত আৰক্ষী সঞ্চালক প্ৰধান (আইন-শৃংখলা) সাক্ষাৎ কৰি ২০১৮ চনৰ ১০ জানুৱাৰিৰ ভিতৰত গোচৰটোৰ চয়-নিশ্চয় কৰিবলৈ সময়সীমা ধৰি দিছিল। কিন্তু ইয়াৰ কোনো কাৰ্যকৰী ফল দেখা নগ’ল।
উল্লেখযোগ্য যে উপত্যকাটোৰ উচ্চতৰ-মাধ্যমিক বিদ্যালয়বোৰত থাদৌ-কুকি ভাষাৰ বিষয় প্ৰৱৰ্তন কৰাৰ বাবে চৰকাৰে ২০১৬ চনতে এটা নিৰ্দেশনা জাৰি কৰিছিল। কিন্তু সংগঠনটোৱে দাবী কৰে যে এই নিৰ্দেশনা কাগজ-পত্ৰতে আবদ্ধ আছে আৰু এতিয়ালৈকে প্ৰৱৰ্তন কৰা হোৱা নাই।
আনহাতে সংগঠনটোৱে জানিবলৈ দিছে যে যদিহে চৰকাৰে তেওঁলোকৰ দাবীকেইটা পূৰণ নকৰে তেন্তে অধিক তীব্ৰ আন্দোলন গঢ়ি তুলিব।
