নাগালেণ্ড বিধানসভা নিৰ্বাচন বৰ্জন কৰি ঘোষণা কৰা যৌথ ঘোষণাপত্ৰত চহী কৰাৰ বাবে নাগালেণ্ড বিজেপিয়ে দলটোৰ দুজন সদস্যক বহিষ্কাৰ কৰা বুলি জানিব পৰা গৈছে।
ৰাজ্যিক বিজেপিৰ সূত্ৰই জনাইছে যে, ‘দলৰ বিনা নিৰ্দেশত কোনো বিষয়ক লৈ কাকো চহী কৰিবলৈ বা ক’বলৈ কৰ্তৃত্ব দিয়া হোৱা নাই’।
অন্য এটা বিজেপি সূত্ৰই সদৰী কৰা মতে বিজেপিৰ হৈ যৌথ ঘোষণাপত্ৰত স্বাক্ষৰ কৰা দলটোৰ ৰাজ্যিক কাৰ্য্যবাহী সদস্য খেত’ চেমাক বহিষ্কাৰ কৰাৰ বাবে ৰাজ্যিক বিজেপিয়ে নিৰ্দেশ পাইছে।
যৌথ ঘোষণাপত্ৰখন ৰাজহুৱা হোৱাৰ পিছতে উত্তৰ-পূৰ্বাঞ্চলৰ দায়িত্বত থকা বিজেপিৰ ৰাষ্ট্ৰীয় সাধাৰণ সম্পাদক ৰাম মাধৱে স্পষ্ট কৰি দিছিল যে নাগালেণ্ড বিজেপিৰ কাকো কোনো কাগজতে চহী কৰাৰ কৰ্তৃত্ব দিয়া হোৱা নাই।
একে সময়তে ‘নিৰ্বাচন বৰ্জন নাগা সমস্যাৰ সমাধান নহয়’ বুলি প্ৰতিক্ৰিয়া প্ৰকাশ কৰিছে বিজেপিৰ হৈ নাগালেণ্ড নিৰ্বাচনৰ দায়িত্বত থকা কেন্দ্ৰীয় গৃ্হ ৰাজ্য মন্ত্ৰী কিৰেন ৰিজিজুৱে।
সংবাদ মাধ্যমক তেওঁ জনাইছিল যে, ‘বিজেপিৰ ৰাজ্যিক সমিতিয়ে উক্ত দলিলত চহী কৰা সদস্যৰ বিৰুদ্ধে ব্যৱস্থা গ্ৰহণ কৰিব।’
নাগা হোহো আৰু নাগৰিক সমাজৰ বিভিন্ন সংগঠনৰ ‘নিৰ্বাচনৰ পূৰ্বেই সমাধান’ আহ্বানৰ প্ৰতি সঁহাৰি জনাই নাগালেণ্ডৰ সকলো ৰাজনৈতিক দলেই আগন্তুক বিধানসভা নিৰ্বাচনত প্ৰতিদ্বন্দ্বিতা কৰাৰ বাবে কোনো প্ৰাৰ্থীকে টিকট নিদিয়াৰ সিদ্ধান্ত লৈ এক যৌথ ঘোষণাপত্ৰত কালি চহী কৰিছিল।
নাগা হোহো আৰু নাগৰিক সংগঠনসমূহৰ মূল সমিতি (CCNTHCO), এন এচ চি এন (আই এম) আৰু ৬ টা নাগা জাতীয় ৰাজনৈতিক গোটৰ কাৰ্য্যকৰী সমিতি (NNPGs)ৰ সৈতে কহিমাত হোৱা বৈঠকৰ পিছতে ৰাজনৈতিক দলসমূহে এই যৌথ ঘোষণাপত্ৰ জাৰি কৰিছিল।
দলীয় নেতাসকলক জোৰ কৰি এই ঘোষণাপত্ৰত চহী কৰিবলৈ বাধ্য কৰোৱা হৈছে বুলি প্ৰায়ভাগ দলৰে কৰ্মীসকলৰ মাজত ভিতৰুৱাকৈ আলোচনা হোৱা বুলি বাতৰি ওলাইছে।
যৌথ বিবৃতিক লৈ নিৰাশা প্ৰকাশ কৰি কিছু ৰাজনৈতিক নেতাই নিৰ্ধাৰিত সূচী অনুসৰিয়েই ভাৰতৰ নিৰ্বাচন আয়োগে নিৰ্বাচন অনুষ্ঠিত কৰিব বুলি সন্দেহ বেকত কৰিছে।
আনহাতে আয়ুক্ত সচিব বেঞ্জামিন নিউমায়ে আজি এক প্ৰে’ছ বিবৃতি যোগে জনাইছে যে বিধানসভাৰ অধ্যক্ষ ডঃ ইমতিৱাপানাগ নায়াৰে ৰাজ্যখনত নিৰ্বাচনী অধিসূচনা জাৰি হোৱাৰ পিছতে পদত্যাগ কৰা ১১ গৰাকী বিধায়কৰ পদত্যাগ গ্ৰহণ কৰিছে।
