নাগালেণ্ডৰ মুখ্যমন্ত্ৰী টি আৰ জেলিয়াঙে বৃহস্পতিবাৰে প্ৰকাশ কৰিছে যে নাগালেণ্ডত শিক্ষাৰ গভীৰ প্ৰয়োজন আৰু সেয়েহে ৰাজ্য চৰকাৰে যিকোনো সংস্থাকে আদৰণি জনাবলৈ সাজু যিয়ে ৰাজ্যখনত শিক্ষা প্ৰতিষ্ঠান বা বিশ্ববিদ্যালয় স্থাপন কৰি শিক্ষাৰ মানদণ্ড সৰ্বোচ্চ স্তৰলৈকে নিব বিচাৰে। সেয়া লাগিলে ধৰ্মীয় বা আন যিকোনো সংস্থাই নহওক লাগে।
বৃহস্পতিবাৰে আবেলি খেৰমহলত উচ্চ আৰু কাৰিকৰী শিক্ষাৰ উপদেষ্টা এন থমাছ ল’থাৰ আৱাসিক চৌহদত পতঞ্জলি আয়ুৰ্বেদ লিমিটেডৰ অধীনত বিশেষভাৱে সক্ষম শিক্ষাৰ্থীক সম্বৰ্দ্ধনা জনোৱা এক অনুষ্ঠানত মুখ্যমন্ত্ৰীগৰাকীয়ে ভাষণ দিছিল।
বাবা ৰামদেৱৰ সহযোগী বাল কৃষ্ণ আচাৰ্যই যেতিয়া নাগালেণ্ডত বিশেষভাৱে সক্ষম সকলৰ বাবে এখন ১০০ খন বিচনাযুক্ত হস্পিতাল স্থাপন কৰাৰ প্ৰতিশ্ৰুতি দিছিল, তাক আদৰণি জনাই মুখ্যমন্ত্ৰী জেলিয়াঙে ৰাজ্য চৰকাৰৰ ফালৰ পৰা সকলোধৰণৰ সহযোগ আগবঢ়োৱাৰ আশ্বাস দিয়ে।
‘’ৰাজ্যখনত এখন বিশ্ববিদ্যালয় স্থাপন কৰাৰ বাবে কোম্পানীক আমি বাট মুকলি কৰি দিছো। কেৱল ৰাজ্য চৰকাৰেই নহয়, বেচৰকাৰী সংস্থা আৰু সমাজৰ সকলো শ্ৰেণীৰ লোকে এই প্ৰকল্পটোৰ ক্ষেত্ৰতে নহয় লগতে ৰাজ্যখনত বিনিয়োগ কৰিব বিচৰা যিকোনো কোম্পানীকে সহযোগ কৰা উচিত,’’-জেলিয়াঙে কয়।
দ্ৰুতভাৱে বিকশিত উপভোক্তা সামগ্ৰী প্ৰস্তুতকাৰী কোম্পানী পতঞ্জলি আয়ুৰ্বেদ লিমিটেডৰ বাল কৃষ্ণ আচাৰ্যই প্ৰতিশ্ৰুতি দিয়ে যে তেওঁলোকে বিশেষভাৱে সক্ষমসকলৰ বাবে ডিমাপুৰত এখন ১০০ খন বিচনাযুক্ত হস্পিতাল স্থাপন কৰিব আৰু ৰাজ্য তথা কেন্দ্ৰীয় চৰকাৰৰ সহযোগত নাগালেণ্ডত এখন বিশ্ববিদ্যালয় স্থাপন কৰিবলৈ আগ্ৰহী। ১০০ খন বিচনাযুক্ত হস্পিতালৰ বাবে তিনিটা স্থান চোৱা হৈছে আৰু তাৰে এটা স্থান বাচনি কৰা হ’ব।
বিশেষভাৱে সক্ষমৰ বাবে মুখ্যমন্ত্ৰীয়ে জনোৱা সম্পূৰ্ণ সহযোগিতাৰ প্ৰতি সহাঁৰি দি বাল কৃষ্ণ আচাৰ্যই প্ৰকল্পটোৰ বাবে তাৎক্ষণিকভাৱে ১০০ কোটি টকা অনুদান আগবঢ়ায়।
অনুষ্ঠানটোত উপস্থিত থকা উত্তৰাখণ্ডৰ প্ৰাক্তন মুখ্য সচিব আৰ কে শৰ্মাই নাগালেণ্ডত কলেজ, বিশ্ববিদ্যালয় স্থাপনৰ গুৰুত্ব সম্পৰ্কে বক্তব্য আগবঢ়ায়
