ধৰ্মৰ ভিত্তিত দেশৰ নাগৰিকত্ব প্ৰদানৰ বাবে কেন্দ্ৰৰ বিজেপি চৰকাৰে উত্থাপন কৰা নাগৰিকত্ব সংশোধন বিধেয়ক ( Citizenship Amendment Bill ) সত্ৰ মহাসভাই সমৰ্থন নকৰে। বিধেয়কৰ সমৰ্থনত মহাসভাৰ কাৰ্য্যনৰ্বাহকত কোনো সিদ্ধান্ত নোহোৱাকৈ আৰু বাকী বিষয়ববীয়াৰ অগোচৰে দিল্লীৰ শুনানিত মহাসভাৰ হৈ সাক্ষ্য দিয়া প্ৰধান সম্পাদক কুসুম কুমাৰ মহন্ত আৰু উপ সভাপতি অখিল মহন্তক সংগঠনটোৰ পৰা নিলম্বন কৰা হৈছে আৰু মহাসভাৰ হৈ ১৭ এপ্ৰিলৰ শুনানিত দাখিল কৰা স্মাৰক পত্ৰ ‘তৎকালীনভাৱে’ উঠাই লোৱা হৈছে।
ৰাজ্যজুৰি হোৱা ব্যাপক তোলপাৰৰ পিছত আজি ২০ এপ্ৰিলত মহাসভাই গুৱাহাটীত অনুষ্ঠিত কৰা কৰ্ণধাৰ সমিতিৰ জৰুৰী বৈঠকত এই সিদ্ধান্তসমূহ গ্ৰহণ কৰা হয়।
আজি গ্ৰহণ কৰা মহাসভাৰ সিদ্ধান্তত কোৱা হৈছে যে ‘হিন্দু বাংলাদেশীৰ বোজা অসমে নলয়। হিন্দুৱেই হওক বা মুছলমানেই হওক, বিদেশী বিদেশীয়েই। ১৯৭১ চনৰ ২৫ মাৰ্চৰ পিছত অহা বাংলাদেশীয়ে অসম এৰিবই লাগিব।’
কুসুম কুমাৰ মহন্তক ‘জাতিদ্ৰোহী’ বুলি অভিহিত কৰি মহাসভাৰ গুৱাহাটী সমিতিৰ কাৰ্য্যকৰী সভাপতি দুলাল গোস্বামীয়ে মহন্তৰ আৰ এছএছ আৰু বিজেপিৰ সৈতে সম্পৰ্ক থকাৰ লগতে বিজেপিৰ পৰা তেওঁ এম এল এ’ টিকট বিচৰাৰ অভিযোগ তুলিছিল।
অসমৰ প্ৰায় সকলো সকলো সংগঠনে সৰ্বাত্মক বিৰোধিতা কৰা নাগৰিকত্ব সংশোধন বিধেয়কক সমৰ্থন কৰাৰ বাটত মহাসভাৰ প্ৰধান সম্পাদক তথা বিজেপি সদস্য কুসুম মহন্তই মহাসভাৰ বাকী বিষয়ববীয়াসকলক বিপথে পৰিচালিত কৰাৰ কথা আজিৰ বৈঠকতে পোহৰলৈ আহে।
এই সন্দৰ্ভত সভাৰ এগৰাকী বিষয়ববীয়াই কয় যে শুনানিলৈ নহয়, সত্ৰসমূহত হোৱা বেদখল আৰু কেন্দ্ৰৰ পৰা সত্ৰসমূহলৈ আৰ্থিক অনুদান সন্দৰ্ভতহে কেন্দ্ৰীয় চৰকাৰক স্মাৰক পত্ৰ দিয়াৰ বাবে প্ৰধান সম্পাদকগৰাকীক দিল্লীলৈ পঠোৱা হৈছিল।
‘অনুমতি’সাপেক্ষেই দিল্লীলৈ সম্পাদকগৰাকী গৈছিল বুলি উল্লেখ কৰি মহাসভাৰ সভাপতি জীতেন্দ্ৰ নাথ প্ৰধানীয়ে কয় ‘হিন্দু বাংলাদেশীৰ সমৰ্থনত যিখিনি কথা লিখিছিল সেই সম্পৰ্কে মই অৱগত নাছিলো।’
উল্লেখযোগ্য যে সেইখিনি ‘ব্যক্তিগত মত আছিল’ বুলি আজিৰ সভাত কুসুম কুমাৰ মহন্তই স্বীকাৰ কৰে।
সমগ্ৰ বিষয়টোৰ তদন্তৰ বাবে আজিৰ সভাই সাহিত্যিক ডঃ লক্ষ্মীনন্দন বৰা আৰু সভাৰ দুগৰাকী জ্যেষ্ঠ সদস্য নীলমণি মহন্ত আৰু দুলাল গোস্বামীক লৈ এখন তদন্ত সমিতি গঠন কৰি দিয়ে।
তদন্ত সমিতিয়ে এমাহৰ ভিতৰত দাখিল কৰিব লগা প্ৰতিবেদনৰ ওপৰত ভিত্তি কৰি প্ৰয়োজনসাপেক্ষে আজি নিলম্বিত কুসুম মহন্ত আৰু অখিল মহন্তক স্থায়ীভাৱে সভাৰ পৰা বহিষ্কাৰ কৰা সন্দৰ্ভত সিদ্ধান্ত লোৱা হ’ব বুলিও সভাই প্ৰস্তাৱ গ্ৰহণ কৰে।
