ধৰ্মৰ ভিত্তিত বিদেশীক দেশৰ নাগৰিকত্ব প্ৰদান কৰিবৰ বাবে কেন্দ্ৰৰ বিজেপি চৰকাৰে অনা নাগৰিকত্ব বিধেয়ক ( Citizenship Amendment Bill )ক অসম সত্ৰ মহাসভাই সমৰ্থন কৰাক লৈ ৰাজ্যত ব্যাপক বিতৰ্ক হৈ থকাৰ মাজতে আজি ২০ এপ্ৰিলত বিষয়টোত বিভিন্ন দল-সংগঠন, ব্যক্তিয়ে নিজৰ মতামত প্ৰকাশ কৰিছে। আনহাতে বিধেয়কখন সমৰ্থন সম্পৰ্কত মহাসভাই কোনো সিদ্ধান্ত লোৱা নাই বুলি স্পষ্ট কৰি দি কেন্দ্ৰীয় সমিতিয়ে সমগ্ৰ বিষয়টো আলোচনা কৰাৰ বাবে কাইলৈ ২১ এপ্ৰিলত গুৱাহাটীত কৰ্ণধাৰ সমিতিৰ বৈঠক আহ্বান কৰিছে।
আজি কোনে কি ক’লে ‘সত্ৰ মহাসভা’ সম্পৰ্কে?
ডঃ হীৰেন গোহাঁই, বিশিষ্ট বুদ্ধিজীৱী : সত্ৰ মহাসভাৰ বক্তব্য বুলি এই দুজনে গৈ সমিতিৰ আগত সাক্ষ্য দিলে, আনুষ্ঠানিকভাৱে। যদি সত্ৰ মহাসভাৰ মানুহে এইটো বেয়া পাইছে, এইটো তেওঁলোকে বিৰোধিতা কৰে, তেনে তেওঁলোকে কাৰ্য্যনিৰ্বাহকৰ সভা পাতি এটা প্ৰস্তাৱ লওক আৰু কওক যে তেওঁলোক দুজনে যি সাক্ষ্য দিছিল সেইটো আমাৰ বক্তব্য নহয়।
বিজয়া চক্ৰৱৰ্তী, সাংসদ, বিজেপি : সত্ৰ মহাসভাই যি মন্তব্য কৰিছে সেয়া ভাবি-চিন্তিয়েই কৰিছে। সত্ৰ মহাসভাতো দুই এজন বিজেপিৰ মানুহ আছে। ময়ো সত্ৰ মহাসভাৰ সৈতে জড়িত এগৰাকী আজীৱন সদস্য। কিন্তু সেইবুলিয়েই সত্ৰ মহাসভাৰ গোটেইখিনি মানুহেই যে বিজেপিক সমৰ্থন কৰে সেইটো কথা নহয়।
১৯৭১ চনৰ বাংলাদেশত হোৱা যুদ্ধৰ সময়ত বহুতো বাংলাদেশীক ৰাজ্যৰ বিভিন্ন প্ৰান্তত কেম্প কৰি ৰখা হৈছিল। প্ৰায় ১০ লাখ বাংলাদেশীক সেই সময়ত অসমত আশ্ৰয় দিয়া হৈছিল। সেইবিলাকৰ এজনো ঘূৰি নগ’ল। সেইসকলৰ বিৰুদ্ধে হ’লে কোনেও এষাৰ মাত মতা নাই। এই ১০ লাখ বাংলাদেশীৰ বাবে অসমৰ জনসংখ্যাৰ ভাৰসাম্য নোহোৱা হৈছে।
আমাৰ হাতত থকা তথ্য মতে ১০ হাজাৰ হিন্দু বাংলাদেশী ১৯৭১ চনৰ পিছত অসমলৈ আহিছিল।
অখিল গগৈ, নেতা, কৃষক মুক্তি সংগ্ৰাম সমিতি : যদি সত্ৰ মহাসভাৰ সকলোখিনি সদস্য সাময়িকভাবে এই চক্ৰান্তৰ সৈতে জৰিত নাই, তেন্তে কুসুম কুমাৰ মহন্তই প্ৰদান কৰা স্মাৰক পত্ৰখন তেওঁলোকে ৰাজহুৱা কৰক। লগতে তেওঁলোকে স্মাৰক পত্ৰখন দিয়াৰ বাবে অসমবাসীৰ ওচৰত ৰাজহুৱা ক্ষমা-প্ৰাৰ্থনা খুজিব লাগে যাতে জাতি-ধ্বংশী অভিযানৰ সৈতে সত্ৰ মহাসভা জৰিত নহয়, সেই কথাটো প্ৰমাণিত হয়। সেইখনৰ ঠাইত নতুনকৈ এখন স্মাৰক পত্ৰ প্ৰদান কৰি সেইখন ৰাজহুৱাভাৱে প্ৰদৰ্শন কৰিব লাগে।
এই সত্ৰাধিকাৰ বিলাকে যেতিয়া আৰ এছ এছৰ মুৰব্বীৰ পৰা পাঠ লৈ আছিল তেতিয়াই যে অসমীয়া জাতিলৈ অশনি সংকেত নামি আহিছিল এই কথা প্ৰমাণিত হৈছিল। হিন্দু বাংলাদেশী সংস্থাপনৰ দৰে জাতিধ্বংসী কামৰ বিৰুদ্ধে যে একাংশ সত্ৰাধিকাৰ থিয় দিছে এইটো সমগ্ৰ অসমবাসীৰ বাবে এটা সুখৰ খবৰ।
