পেট্ৰ’ল–ডিজেলৰ অস্বাভাৱিক মূল্যবৃদ্ধি, অত্যাধিক হাৰত বীমা মাচুল বৃদ্ধি কৰা, টোলগেট ব্যৱস্থা বন্ধ কৰা আদি বিভিন্ন দাবীৰে আজি নিখিল ভাৰত মটৰ পৰিবহণ কংগ্ৰেছে চকা বন্ধ দিয়াৰ ফলত আজি গুৱাহাটী মহানগৰীত বন্ধ হৈ পৰে চিটি বাছৰ চলাচল।
সাধাৰণতে সদাব্যস্ত গুৱাহাটী মহানগৰীত এইদৰে চকা বন্ধৰ সৰ্বাত্মক প্ৰভাৱ পৰাৰ ফলত দুৰ্ভোগ ভূগিবলগীয়া হয় সাধাৰণ জনতা।
ব্যৱসায়িক যান বাহনৰ চলাচল বন্ধ হৈ পৰাত স্থানীয় লোকসকলৰ লগতে বিভিন্ন প্ৰতিষ্ঠানত কৰ্মৰত কৰ্মচাৰীসকল যথেষ্ট অসুবিধাৰ সন্মুখীন হোৱা দেখা যায়।
চকা বন্ধৰ কাৰ্যসূচীক মহানগৰৰ চিটি বাছ চালক আৰু মালিক সন্থাই সমৰ্থন কৰা বুলি জানিব পৰা গৈছে। ফলত পথত গাড়ী-মটৰৰ চলাচল তেনেই সেৰেঙা হৈ পৰিছে।
উল্লেখ্য যে কেবাটাও দাবী পূৰণৰ প্ৰতিবাদত নিখিল ভাৰত মটৰ পৰিবহণ কংগ্ৰেছে আহ্বান জনোৱা চকা বন্ধৰ কাৰ্যসূচীয়ে মুঠতে মহানগৰীৰ সৰ্বসাধাৰণ লোকক বিপাঙত পেলোৱা পৰিলক্ষিত হয়।
