২০১৬ চনৰ ১৭ জুনত ঝাৰখণ্ডৰ বিৰিদিহত নক্সাল উগ্ৰপন্থীৰ লগত যুদ্ধ কৰি প্ৰাণ আহুতি দিয়া বজালীৰ চি আৰ পি এফৰ ১০ নং বেটেলিয়নৰ জোৱান প্ৰয়াত বলেন হৰিজনৰ স্মৃতি যুগমীয়া কৰাৰ উদ্দেশ্যে আজি বজালীৰ সাদেৰীত এটা আৱক্ষ মূৰ্তি উন্মোচন কৰা হয়।
উল্লেখ্য যে সাদেৰী ৰাউতা মদন উচ্চতৰ মাধ্যমিক বিদ্যালয়ৰ চৌহদত চি আৰ পি এফৰ ১০ নং বেটেলিয়নে নিজাববীয়াকৈ নিৰ্মাণ কৰা এই আৱক্ষ মূৰ্তিটো আজি আনুষ্ঠানিক ভাৱে উন্মোচন কৰে চি আৰ পি এফৰ ১০ নং বেটেলিয়নৰ কমাণ্ডডেণ্ট এছ এন বালাই।
এই অনুষ্ঠানত বজালী মহকুমাৰ মহকুমাধিপতি বিজয় ভাস্কৰ ৰেড্ডী, বজালী মহকুমা আৰক্ষী বিষয়া তিলেশ্বৰ শইকীয়া, চি আৰ পি এফৰ সহ কমাণ্ডডেণ্ট বিকি যাদৱ, চহিদ ৰাউতা মদন উচ্চতৰ মাধ্যমিক বিদ্যালয়ৰ অধ্যক্ষ দিবাকৰ দাস, চহিদ বলেন হৰিজনৰ পিতৃ ৰঘুনাথ হৰিজন, মাতৃ মালতী হৰিজন, পত্নী বৰ্ণালী হৰিজন, পুত্ৰ কৃতীস্মান হৰিজনৰ লগতে ভালেসংখ্যক লোক উপস্থিত থাকে।
উল্লেখ্য যে উন্মোচন অনুষ্ঠানতে চহিদ বলেন হৰিজনক মৰোনত্তৰ ভাবে পুলিচ মেডেল প্ৰদান কৰিব বুলি জানিবলৈ দিছে চি আৰ পি এফে।
