দেশত মহিলাৰ বিৰুদ্ধে অপৰাধ বৃদ্ধি পোৱাৰ উদ্বেগজনক ঘটনাৰ মাজতে উদ্ধাৰ হৈছে এগৰাকী মহিলা অভিযন্তাৰ ওলমি থকা মৃতদেহ। অভিযোগ অনুসৰি মহিলাগৰাকীক যৌতুক বিচাৰি হেঁচা প্ৰয়োগ কৰা হৈছিল।
২৭ বছৰীয়া মহিলাগৰাকীৰ দেহৰ ৰঙৰ বাবেও শহুৰেকৰ ঘৰত নিৰ্যাতন চলোৱাৰ অভিযোগ পৰিয়ালৰ পিতৃৰ। এই কাৰণেই তেওঁ আত্মহত্যা কৰিবলৈ বাধ্য হৈছিল।
আৰক্ষীৰ সূত্ৰ অনুসৰি, মৃতা মহিলাগৰাকীৰ নাম শিল্পা। মঙলবাৰে নিশা দক্ষিণ বেংগালুৰুৰ সুদ্দাগুণ্টেপল্যাৰ ঘৰৰ পৰা উদ্ধাৰ কৰে তেওঁৰ মৃতদেহ। এই সন্দৰ্ভত তেওঁৰ পিতৃ-মাতৃয়ে শিল্পাৰ স্বামী প্ৰবীণ আৰু শহুৰেকৰ বিৰুদ্ধে আৰক্ষীত এজাহাৰ দাখিল কৰিছে। তেওঁলোকৰ দাবী, যৌতুকৰ বাবে শিল্পাক অহৰহ হাৰাশাস্তি কৰা হৈছিল। এই কাৰণেই শিল্পাই আত্মহত্যা কৰিলে।
আৰক্ষীৰ সূত্ৰ অনুসৰি শিল্পা এগৰাকী অভিযান্ত্ৰিক স্নাতক। প্ৰবীণে ডেৰ-দুবছৰ আগতে তেওঁক বিয়া কৰাইছিল। তেওঁলোকৰ এটি ডেৰ বছৰীয়া সন্তান আছে। বিয়াৰ পূৰ্বে শিল্পাই ইনফ’ছিছত চফটৱেৰ ইঞ্জিনিয়াৰ হিচাপে কাম কৰিছিল। স্বামীও এগৰাকী চফটৱেৰ ইঞ্জিনিয়াৰ। আগতে তেওঁ অৰেকলত কাম কৰিছিল। বিয়াৰ পিছত প্ৰবীণে চাকৰি এৰি খাদ্যৰ ব্যৱসায় আৰম্ভ কৰে।
শিল্পাৰ পিতৃ-মাতৃয়ে অভিযোগ কৰে যে বিবাহৰ সময়ত প্ৰবীণৰ পৰিয়ালে নগদ ১৫ লাখ টকাৰ উপৰিও ১৫০ গ্ৰাম সোণৰ গহনা আৰু অন্যান্য সামগ্ৰী দাবী কৰিছিল। দাবী কৰা সামগ্ৰীখিনি দিয়াৰ পিছতো শিল্পাক স্বামী আৰু শহুৰেকে হেঁচা প্ৰয়োগ কৰি দেউতাকৰ ঘৰৰ পৰা অধিক ধন আৰু অন্যান্য সামগ্ৰী আনিবলৈ চেষ্টা কৰিছিল। একে সময়তে তেওঁক দেহৰ ৰঙক লৈও ঠাট্টা কৰা হৈছিল। এই অত্যাচাৰ আৰু ঠাট্টা-মস্কৰা সহ্য কৰিব নোৱাৰি শিল্পাই আত্মহত্যা কৰিবলৈ বাধ্য হ’ল।
তেওঁলোকে অভিযোগ কৰে যে প্ৰবীণৰ পৰিয়ালৰ লোকে ব্যৱসায় আৰম্ভ কৰিবলৈ শিল্পাৰ পৰা আৰু ৫ লাখ টকা দাবী কৰিছিল। সেই টকা দিয়াৰ পিছতো জীয়েকৰ ওপৰত হোৱা অত্যাচাৰ কমি যোৱা নাছিল।
মাকে দাবী কৰিছিল যে শাহুৱেকে শিল্পাক নিয়মিতভাৱে তেওঁৰ দেহৰ ক’লা ৰঙৰ ৰঙৰ বাবে কটাক্ষ কৰিছিল। লগতে প্ৰবীণক এৰি দিলে পুত্ৰৰ পুনৰ বিয়া পাতিব বুলিও কৈছিল।
সুদ্দাগুন্টেপল্য থানাই জনোৱা মতে, অভিযোগৰ ভিত্তিত নিৰ্দিষ্ট ধাৰাসমূহৰ অধীনত গোচৰ ৰুজু কৰি তদন্ত আৰম্ভ কৰা হৈছে। শিল্পাৰ স্বামীক আটক কৰি সোধা-পোছা কৰা হৈছে।
