“বিজেপি চৰকাৰে উত্তৰ-পূবক যথেষ্ট গুৰুত্ব দিছে। নিৰ্বাচনত জয়ী হোৱাৰ পিছৰ পৰা, অৰ্থ্যাৎ যোৱা চাৰিবছৰত মোদীয়ে ৩০বাৰ উত্তৰ-পূব ভ্ৰমণ কৰিছে।”
মংগলবাৰে দিচপুৰস্থিত গড়কপ্তানী বিভাগৰ প্ৰশিক্ষণ কেন্দ্ৰৰ প্ৰেক্ষাগৃহত কেন্দ্ৰীয় চৰকাৰৰ চাৰিবছৰীয়া বৰ্ষপূৰ্তি তথা ৰাজ্য চৰকাৰৰ দুবছৰীয়া কামৰ খাতিয়ান দাঙি ধৰাৰ উদ্দেশ্যে সংবাদমেল অনুষ্ঠিত কৰি এই মন্তব্য কৰিছে উত্তৰ-পূব উন্নয়ন দপ্তৰৰ কেন্দ্ৰীয় মন্ত্ৰী জিতেন্দ্ৰ সিঙে।
সংবাদমেলখনতে তেওঁ কয় যে উঃ-পূবৰ উন্নয়নৰ বাবে কেন্দ্ৰীয় চৰকাৰে ৫০ হাজাৰ কোটি টকা বাজেটত ধাৰ্য কৰিছে।
তেওঁ লগতে কয়, “বিশেষ ৰাজ্যৰ মৰ্যাদাৰে উত্তৰ-পূবৰ ৰাজ্যসমূহক ৯০:১০ত পুঁজি আবণ্টন দিছে কেন্দ্ৰীয় চৰকাৰে। তদুপৰি বান সাহায্যৰ বাবদ অসমলৈ ইতিমধ্যে কেন্দ্ৰই ৩৪০ কোটি টকা মুকলি কৰি দিছে বুলিও উক্ত সংবাদমেলত কেন্দ্ৰীয় মন্ত্ৰী সিঙে জানিবলৈ দিয়ে।
তেওঁ লগতে কয়, “গৃহ বিভাগে দুৰ্যোগ প্ৰশমনৰ বাবদ ইতিমধ্যে অসমক ২৩৯ কোটি দিছে আৰু ‘দুৰ্য্যোগৰ ফলত ক্ষতি হোৱা আন্তঃগাঁথনিৰ বাবে ১০১ কোটি টকা ইতিমধ্যে মোকলাইদিছে।”
ইয়াৰোপৰি তেওঁ পূৰ্বৰ কংগ্ৰেছ চৰকাৰক কটাক্ষ কৰি কয়, “পূৰ্বৰ চৰকাৰৰ দিনত ড’নাৰ মন্ত্ৰ্যালয়ে এনেদৰে উন্নয়নমূলক কাম কৰাৰ কোনো উদাহৰণ নাই।”
বিজেপি নেতৃত্বাধীন কেন্দ্ৰীয় চৰকাৰৰ ৮গৰাকী কেন্দ্ৰীয় মন্ত্ৰীয়ে উত্তৰ-পূবৰ প্ৰতি যথেষ্ট গুৰুত্ব আৰোপ কৰা বুলি মন্তৱ্য কৰি কয়, “কেন্দ্ৰীয় মন্ত্ৰীৰ উঃ-পূবলৈ সঘনাই আগমনো একপ্ৰকাৰৰ অভিলেখ।”
আনহাতে, বিজেপি চৰকাৰে প্ৰত্যেক বছৰে ২৬ জুন তাৰিখটো ক’লা দিৱস হিচাপে উদযাপন কৰি অহা বুলি সদৰী কৰি কয়, “১৯৭৫ চনত ইন্দিৰা গান্ধীৰ শাসন চলি থকাৰ সময়ত ২৬ জুনত ৰাষ্ট্ৰপতিয়ে জৰুৰীকালীন ব্যৱস্থা আনিছিল। সেই সময়ছোৱাত ইন্দিৰা গান্ধীয়ে স্বৈৰাচাৰী শাসন চলাইছিল। দেশখনৰ কোনো লোকেই শান্তিত জীয়াই থাকিব পৰা নাছিল। গণতন্ত্ৰক সেই সময়ত কংগ্ৰেছ চৰকাৰে হত্যা কৰিছিল।”
জৰুৰীকালীন ব্যৱস্থাৰ সময়ছোৱাত হোৱা পৰিস্থিতি সন্দৰ্ভত তেওঁ কয় “ইন্দিৰা গান্ধীয়ে কণ্ঠৰোধ কৰিছিল সংবাদ মাধ্যমৰ। ২৫০তকৈ অধিক সংবাদকৰ্মীক কাৰাৰুদ্ধ কৰিছিল। ১৯৭৫ চনৰ পৰা ৭৭ৰ ভিতৰৰ সময়ছোৱাত এইকেইগৰাকী সংবাদকৰ্মীক কাৰাৰুদ্ধ কৰিছিল।”
তদুপৰি এই সময়ছোৱাত একমাত্ৰ কংগ্ৰেছক বিৰোধিতাৰ বাবেই বিশিষ্ট গায়ক কিশোৰ কুমাৰকো আকাশবাণীত গীত পৰিৱেশন কৰাৰ বাবে নিষিদ্ধ কৰা হৈছিল বুলি সংবাদমেলত কেন্দ্ৰীয় মন্ত্ৰীগৰাকীয়ে উল্লেখ কৰে।
আনহাতে, বিৰোধী দলৰ বহুতো নেতাকো কংগ্ৰেছ চৰকাৰখনে কাৰাগাৰলৈ নিক্ষেপ কৰিছিল। এই বাবেই বিজেপিয়ে ২৬ জুনৰ দিনটোত প্ৰত্যেক বছৰে ক’লা দিৱস হিচাপে পালন কৰি আহিছে বুলি সিঙে জানিবলৈ দিয়ে।
