বিদেশী ন্যায়াধিকৰণে বিদেশী বুলি ঘোষণা কৰা ব্যক্তিৰ পৰিয়ালৰ সদস্যৰ নাম এন আৰ চিৰ খচৰাত অন্তৰ্ভুক্ত নহয় বুলি ৰাজ্যিক সমন্বয়ক প্ৰতীক হাজেলাই যোৱা মে’ মাহত জাৰি কৰা এখন নিৰ্দেশনাক প্ৰত্যাহ্বান জনাই দাখিল কৰা এখন আবেদনৰ হৈ বৃহস্পতিবাৰে উচ্চতম ন্যায়ালয়ৰ অভিজ্ঞ অধিবক্তাই গুৱাহাটী উচ্চ ন্যায়ালয়ত যুক্তি প্ৰদৰ্শন কৰে।
ৰাজ্যিক সমন্বয়ক গৰাকীৰ নিৰ্দেশনাক প্ৰত্যাহ্বান জনাই আজিজুল হক নামৰ এজন ব্যক্তিয়ে এখন লেখ আবেদন (৩৪৩২/২০১৮) দাখিল কৰিছিল।
বৃহস্পতিবাৰে আবেদনকাৰীৰ হৈ ন্যায়াধীশ উজ্জ্বল ভূঞা আৰু ন্যায়াধীশ ৰুমী কুমাৰী ফুকনৰ খণ্ড বিচাৰপীঠত উচ্চতম ন্যায়ালয়ৰ অধিবক্তা মেহমুদ প্ৰাছাই যুক্তি প্ৰদৰ্শন কৰে।
আনহাতে, এন আৰ চি কৰ্তৃপক্ষই তেওঁলোকৰ হৈ জ্যেষ্ঠ অধিবক্তা নিলয় দত্তই আদালতত বক্তৱ্য দাঙি ধৰে। বৃহস্পতিবাৰে দুয়োপক্ষৰ যুক্তি শুনাৰ পিছত খণ্ড বিচাৰপীঠ শুকুৰবাৰে আবেদনখনৰ ৰায়দানৰ দিন ঘোষণা কৰে।
আবেদনখনত এন আৰ চি কৰ্তৃপক্ষৰ লগতে কেন্দ্ৰীয় চৰকাৰসহ পাঁচটা পক্ষক পদকীয়া হিচাপে ৰখা হৈছে।
তাৎপৰ্যপূৰ্ণভাৱে এন আৰ চিৰ ৰাজ্যিক সমন্বয়কৰ নিৰ্দেশনা কাৰ্যকৰী হ’লে ঘোষিত বিদেশীসহ কেইবালক্ষ লোকৰ নাম এন আৰ চিত বাদ পৰাৰ পথ প্ৰশস্ত হ’ব।
ইয়াৰ মাজতে মৰিগাঁও জিলাৰ বিদেশী ন্যায়াধিকৰণৰ সদস্য মৌচুমী ডেকাৰ গাড়ীত বুধবাৰে বিয়লি দুৰ্বৃত্তই শিলাবৰ্ষণ কৰা ঘটনাৰ বিষয়ে কেন্দ্ৰীয় চৰকাৰৰ অধিবক্তাই বৃহস্পতিবাৰে উচ্চতম ন্যায়ালয়ক অৱগত কৰে।
বিদেশী ন্যায়াধিকৰণৰ আন্তঃগাঁথনি আৰু অন্যান্য সা-সুবিধা বিষয়ক এটা গোচৰৰ (আদালতে নিজাকৈ লোৱা) শুনানিত সহকাৰী ছলিছিটৰ জেনেৰেল সুভাষ চন্দ্ৰ কেয়ালে বিষয়টো আদালতক অৱগত কৰে।
আদালতে ন্যায়াধিকৰণৰ সদস্যসকলৰ নিৰাপত্তাৰ লগতে ন্যায়াধিকৰণবোৰৰ সুৰক্ষাৰ দিশটোত নজৰ ৰাখিব গৃহ বিভাগক নিৰ্দেশ দিয়ে।
