অৰুণাচল প্ৰদেশৰ কৃষিভিত্তিক উৎসৱ বৈশাখী উপলক্ষে আজি অৰুণাচলৰ সীমান্তৰ বুমলাত ভাৰতীয় সেনা আৰু চীনা পি এল এৰ মাজত বৈঠক অনুষ্ঠিত হোৱাৰ লগতে আৰু সম্প্ৰীতিৰ আদান-প্ৰদান হয়।
জানিব পৰামতে, এইদৰে সীমান্তস্থিত দুয়োটা বাহিনীৰ মাজত সৌহাৰ্দ্যৰ আদান প্ৰদানৰ বাবে এই দিনটোত Border Personnel Meeting (BPM) শীৰ্ষক বৈঠক অনুষ্ঠিত হৈ আহিছে। ইয়াৰ জৰিয়তে অঞ্চলটোত দেখা দিয়া কিছুমান সমস্যাৰ সমাধান বিচৰাৰ লগতে পাৰস্পৰিক আস্থা আৰু বিশ্বাস বৃদ্ধি কৰা হয়। লগতে শান্তিৰ পৰিৱেশ ৰচনা কৰা হয়। ভাৰতীয় দলটোৰ প্ৰতিনিধিসকলৰ মাজত আছিল ব্ৰিগেডিয়াৰ এম পি সিং, টাৱাং ব্ৰিগেডৰ কমাণ্ডাৰ আৰু চীনৰ পক্ষৰ পৰা জাং য়ু পেই, চোনা জং গেৰিছনৰ কমাণ্ডৰ উপস্থিত আছিল। বৈঠকখন হৈছিল সাগৰপৃষ্ঠৰ পৰা ১৫,১৩৪ ফুট উচ্চতাৰ টাৱাঙৰ পৰা প্ৰায় ৪৫ কিলোমিটাৰ উত্তৰে থকা বুমলা নামৰ ঠাইত। জানিব পৰামতে এই ঠাইখন ভাৰত আৰু চীনৰ মাজৰ এনেকুৱা বৈঠক হোৱা পাঁচখন ঠাইৰ ভিতৰৰ এখন।
উল্লেখযোগ্য যে যোৱা ২০১৫ চনৰ পৰাই দুয়োখন দেশৰ সেনাৰ সহযোগিতাৰে বৈশাখী উৎসৱ পালন কৰি অহা হৈছে আৰু ইয়াক দুয়োখন দেশৰ সীমান্তস্থিত সেনাৰ মাজত সৌহাৰ্দ্যৰ আদান-প্ৰদানৰ মাধ্যম কৰি তোলা হৈছে।
আজিৰ অনুষ্ঠানত দুয়োখন দেশৰ ৰাষ্ট্ৰীয় পতাকা উত্তোলন কৰা হয়। তাৰ পাছতে, দুয়োপক্ষৰ বিষয়া প্ৰতিনিধিসকলে আন্তৰিক তথা বন্ধুত্বমূলক পৰিৱেশত পাৰস্পৰিক মত বিনিময় কৰে।
