ৰাজ্যৰ আন জিলাৰ লগতে মাজুলীতো ৩০ জুলাইৰ পুৱা ১০বজাত ৰাষ্ট্ৰীয় নাগৰিকপঞ্জীৰ পূৰ্ণাংগ খচৰা প্ৰকাশ পাব।
উল্লেখযোগ্য যে জিলাখনৰ ১৪টা নাগৰিক পঞ্জীৰ সেৱা কেন্দ্ৰৰ প্ৰত্যেকতে সেইদিনা নাগৰিকপঞ্জীৰ পূৰ্ণাংগ খচৰা ৰাজহ গাঁও ভিত্তিক প্ৰকাশৰ বাবে নাগৰিক পঞ্জীয়ক সকলক অনুমতি দি যোৱা ২৫ জুলাইত মাজুলীৰ উপায়ুক্ত তথা নাগৰিকপঞ্জীৰ জিলা পঞ্জীয়ক দেৱপ্ৰসাদ মিশ্ৰই আনুষ্ঠানিক জাননী জাৰি কৰিছে।
প্ৰতিটো নাগৰিকপঞ্জী সেৱা কেন্দ্ৰত এই পূৰ্ণাংগ খচৰাৰ প্ৰতিলিপি সৰ্বসাধাৰণ ৰাইজে চাব পৰাকৈ অহা ২৮ আগষ্ট পৰ্যন্ত উপলব্ধ হব। পূৰ্ণাংগ খচৰাত নাম বাদ পৰা পূৰ্বৰ আবেদনকাৰী সকলে খচৰাৰ পৰা নাম কৰ্তনৰ কাৰণ জানিবলৈ নিজ এলেকাৰ সেৱা কেন্দ্ৰত অহা ৭ আগষ্টৰ পৰা ২৮ ছেপ্তেম্বৰলৈকে আবেদন দাখিল কৰিব পাৰিব।
আনহাতে নাম বাদ পৰা ব্যক্তিসকলে উপযুক্ত নথি-পত্ৰসহ এন আৰ চিত নাম অন্তৰ্ভুক্তিৰ বাবে দাবী উত্থাপন কৰি পুনৰ আবেদন দাখিলৰ বাবে অহা ৩০ আগষ্টৰ পৰা ২৮ছেপ্তেম্বৰলৈ সময় লাভ কৰিব। একেদৰে অহা ৩০ আগষ্টৰ পৰা ২৮ ছেপ্তেম্বৰৰ সময়সীমাৰ ভিতৰতে খচৰাত সন্নিবিষ্ট নাম-বয়স, ঠিকনা আদি তথ্যৰ সংশোধনীৰ লগতে অযোগ্য ব্যক্তিৰ নাম কৰ্তনৰ বাবেও আবেদন দাখিল কৰিব পাৰিব।
