মুখ্যমন্ত্ৰী সোণোৱালে শক্তি বিভাগৰ অধীনস্থ এ পি ডি চি এল, এ ই জি চি এল আৰু এ পি জি চি এলত নতুনকৈ নিযুক্তি লাভ কৰা ২৭৪ গৰাকী সহকাৰী অভিযন্তা তথা কনিষ্ঠ অভিযন্তাক শুকুৰবাৰে গুৱাহাটীৰ শংকৰদেৱ কলাক্ষেত্ৰত আয়োজিত এক অনুষ্ঠানত নিযুক্তি পত্ৰ বিতৰণ কৰে। এই নৱ নিযুক্ত ২৭৪ গৰাকী অভিযন্তাৰ ভিতৰত ১৪৮ গৰাকী হৈছে সহকাৰী অভিযন্তা আৰু বাকী ১২৬ গৰাকী কনিষ্ঠ অভিযন্তা।
অনুষ্ঠানত মুখ্য অতিথি হিচাপে অংশ গ্ৰহণ কৰি মুখ্যমন্ত্ৰীয়ে শক্তি বিভাগৰ অধীনস্থ তিনিওটা কোম্পানীক কৃষি আৰু উদ্যোগ খণ্ডত শক্তি যোগান, গাওঁ আৰু চহৰ অঞ্চলত বিদ্যুৎ যোগান, প্ৰযুক্তিবিদ্যাৰ জৰিয়তে আভ্যন্তৰীণ সম্পদৰ উন্নয়ন সাধন আৰু বিতৰণ ব্যৱস্থাটো শক্তিশালী কৰি নিয়মিতভাৱে বিদ্যুৎ যোগান নিশ্চিত কৰি ৰাজ্যখনৰ উন্নয়নৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰিবলৈ আহ্বান জনায়।
মুখ্যমন্ত্ৰী সোণোৱালে দৈনন্দিন জীৱনত বিদ্যুতৰ প্ৰয়োজনীয়তাৰ কথা উল্লেখ কৰি বিভাগটোৰ বিষয়া-কৰ্মচাৰীসকলে উৎসৰ্গিত মনোভাৱেৰে সেৱা আগবঢ়াই বিভাগটোৰ প্ৰতি থকা জনসাধাৰণৰ নেতিবাচক ধাৰণা আঁতৰ কৰিব লাগিব বুলি কয়।
বিগত বছৰত বাহ আৰু কাঠৰ বৈদ্যুতিক খুটা উভালি কেইবাজন লোকৰ মৃত্যু হোৱা বিষয়টো উল্লেখ কৰি মুখ্যমন্ত্ৰীয়ে অতি শীঘ্ৰে তেনেধৰণৰ বিদ্যুৎ সংযোগ আঁতৰ কৰি স্থায়ী তথা মজবুত বৈদ্যুতিক খুটাৰে নিৰাপদ বৈদ্যুতিক সৰবৰাহৰ উদ্যোগ ল’বলৈ বিভাগক নিৰ্দেশ দিয়ে।
মুখ্যমন্ত্ৰীয়ে ৰাজ্যখনৰ শক্তিৰ প্ৰেক্ষাপট সলনিৰ বাবে উৎসৰ্গিত মনোভাৱেৰে কাম কৰাৰ ওপৰত গুৰুত্ব আৰোপ কৰে। ৰাজ্যখনত অনুষ্ঠিত হ’বলগীয়া বিশ্ব বিনিয়োগ সন্মিলনৰ কথা উল্লেখ কৰি মুখ্যমন্ত্ৰী সোণোৱালে কয় যে বিনিয়োগকাৰীসকলে ৰাজ্যখনত কোম্পানী স্থাপনৰ বাবে আগ্ৰহ প্ৰকাশ কৰিছে আৰু ইয়াৰ বাবে তেওঁলোকক অবিৰত বিদ্যুৎ যোগান নিশ্চিত কৰিব লাগিব।
আজিৰ এই অনুষ্ঠানত মুখ্যমন্ত্ৰীয়ে দুটা মোবাইল এপ্লিকেশ্যনৰো শুভাৰম্ভ কৰে। ইয়াৰে ‘মাই বিজুলী’ এপৰ জৰিয়তে গ্ৰাহকে বিদ্যুতিক বিল, বিদ্যুতৰ ব্যৱহাৰ পৰীক্ষা ইত্যাদি কৰিব পাৰিব আৰু ‘ই সুবিধা’ এপৰ জৰিয়তে ৰাজহ সংগ্ৰহ বৃদ্ধিৰ বাবে ঠাইতে এ পি ডি চি এলে বিল গ্ৰহণ কৰিব পাৰিব।
নিযুক্তি পত্ৰ বিতৰণ এই অনুষ্ঠানত শক্তি বিভাগৰ ৰাজ্যিক মন্ত্ৰী পল্লৱ লোচন দাস, মুখ্যমন্ত্ৰীৰ মিডিয়া উপদেষ্টা হৃষীকেশ গোস্বামী, মুখ্যমন্ত্ৰীৰ আইন উপদেষ্টা শান্তনু ভৰালী, শক্তি বিভাগৰ প্ৰধান সচিব তথা তিনিওটা কোম্পানীৰ অধ্যক্ষ জিষ্ণু বৰুৱা, এ পি ডি চি এলৰ মহাপ্ৰৱন্ধক পুৰু গুপ্তা প্ৰমুখ্যে অন্যান্য বিশিষ্ট ব্যক্তি উপস্থিত আছিল।
