সমাগত নিৰ্বাচনৰ পৰিপ্ৰেক্ষিতত মেঘালয়ত শাসনাধিষ্ঠিত কংগ্ৰেছ দলে জনসাধাৰণৰ আস্থা ধৰি ৰখাৰ আপ্ৰাণ চেষ্টা কৰা দেখা গৈছে। বিসম্বাদত জুৰুলা হোৱা দলটোৱে এতিয়া তাৰ বাব সহায় লৈছে চৰকাৰৰ বিভিন্ন উন্নয়নমূলক আঁচনিৰ। স্বয়ং মুখ্য মন্ত্ৰীয়ে ৰাজ্যখনৰ বিভিন্ন অঞ্চলত বিভিন্ন উন্নয়নমূলক আঁচনি উদ্বোধন, নিৰ্মাণকাৰ্য্যৰ আধাৰশিলা স্থাপন আদিত দিনে ৰাতিয়ে ব্যস্ত হৈ পৰিছে।
আজি মুখ্য মন্ত্ৰী মুকুল চাংমায়ে পূব গাৰো পাহাৰত নৱনিৰ্মিত ৱিলিয়ামনগৰ পলিটেকনিক প্ৰতিষ্ঠান উদ্বোধন কৰে। তেওঁ আজি আমপাটি ইঞ্জিনীয়াৰিং মহাবিদ্যালয় আৰু কলেজ অব আৰ্বান প্লেনিং এণ্ড আৰ্কিটেকচাৰৰো আধাৰশিলা স্থাপন কৰে। ৱিলিয়ামনগৰ পলিটেকনিক প্ৰতিষ্ঠান উদ্বোধন কৰি দিয়া ভাষণত উপস্থিতসকলক উদ্দেশ্যি তেওঁ কয় যে তেওঁৰ চৰকাৰে বিশেষকৈ স্বাস্থ্য আৰু শিক্ষা খণ্ডত অগ্ৰাধিকাৰ দিয়া অব্যাহত ৰাখিব। শিক্ষাখণ্ডত দিয়া গুৰুত্বৰ বাবেই কেপ্টেইন ৱিলিয়ামছন চাংমা টেকনিকেল য়ুনিভাৰ্ছিটিৰ ৰূপত প্ৰথমখন ৰাজ্যিক বিশ্ববিদ্যালয় ৰাজ্যখনে লাভ কৰিলে।
শিক্ষা ব্যৱস্থাটোৱে যাতে সংস্থাপনৰ যোগ্যতাৰ বিকাশ কৰে আৰু সংস্থাপনৰ বাট মুকলি কৰে সেইটো নিশ্চিত কৰাটো চৰকাৰৰ এটা গধুৰ দায়িত্ব। তেওঁ লগতে কয় যে শিক্ষা বিভাগক নতুন নতুন সম্ভাৱনা থকা ক্ষেত্ৰবোৰ চিনাক্ত কৰিবলৈ নিৰ্দেশ দিয়া হৈছে, যাতে মেঘালয়ৰ নতুন প্ৰজন্মই চাকৰিৰ বাবে হাবাথুৰি খাই মাজবাটতে ৰৈ থাকিব নালাগে। ‘আমি পৰম্পৰাগত পাঠ্যক্ৰমবোৰতে লাগি থাকিব নালাগে আৰু এইবোৰক নকল কৰিব নালাগে। তাৰ পৰিৱৰ্তে এটা নতুন ধাৰাৰ সৃষ্টি কৰিব লাগে আৰু বৃত্তি উপযোগী দক্ষতাৰ বিকাশ কৰিব লাগে।’ চাংমাই কয়।
আনহাতে কাৰ্য্যসূচীকেইটাত মুখ্য মন্ত্ৰীক সংগ দিয়া বিদ্যালয়ী শিক্ষা আৰু সাক্ষৰতা মন্ত্ৰী দেবোৰা মাৰাকে কয়, ‘যোৱা দহ বছৰত মুখ্য মন্ত্ৰী মুকুল চাংমাৰ সুনেতৃত্বত চৰকাৰখন বহুখিনি উন্নয়ন সাধিবলৈ সক্ষম হৈছে।’
উল্লেখযোগ্য যে গাৰো পাহাৰত এইখন আছিল দ্বিতীয়খন পলিটেকনিক প্ৰতিষ্ঠান। আনহাতে দুয়োজন মন্ত্ৰীয়ে ৱিলিয়ামছন নগৰৰ দ্বাদশ শ্ৰেণীৰ ছাত্ৰ-ছাত্ৰীৰ মাজত টেবলেট কম্পিউটাৰ বিতৰণ কৰে। মুখ্য মন্ত্ৰীজনে ঘোষণা কৰে যে অহা বছৰৰ পৰা একাদশ শ্ৰেণীৰ ছাত্ৰ-ছাত্ৰীসকলকো টেবলেট কম্পিউটাৰ দিয়া হ’ব।
