ত্ৰিপুৰাৰ প্ৰাক্তন মুখ্য মন্ত্ৰী মাণিক সৰকাৰ ৰাজখনৰ নৱগঠিত বিধান সভাখনত বিৰোধী দলৰ নেতা হিচাপে দায়িত্বভাৰ গ্ৰহণ কৰাৰ বাবে সাজু হৈছে বুলি জানিব পৰা গৈছে। বৰ্ষীয়ান নেতাগৰাকীক ১৬জনীয়া বামপন্থী বিধায়িনী দলটোৰ নেতা হিচাপে আনুষ্ঠানিকভাৱে বৰণ কৰা হ’ব বুলি দলটোৰ ভিতৰুৱা এটা সূত্ৰত প্ৰকাশ।
নিজৰ ৰাজহুৱা তথা ৰাজনৈতিক জীৱনত সঘনে দেখা নোপোৱা মূল্যবোধক সদায়েই আগস্থান দি অহা পৰিচ্চন্ন ভাৱমুৰ্তিৰ প্ৰাক্তন মুখ্য মন্ত্ৰীগৰাকীয়ে ইতিমধ্যে যোৱা বুধবাৰে তেওঁৰ চৰকাৰী বাসগৃহ আজৰি কৰি দিছে আৰু সাময়িকভাৱে মেলাৰমঠত থকা চিপিআই (এম)ৰ প্ৰধান কাৰ্যালয়ত বাহৰ পাতি আছে। এই ক্ষেত্ৰত প্ৰাক্তন মুখ্যমন্ত্ৰীগৰাকীয়ে তেওঁৰ পূৰ্বসূৰী তথা ৰাজনৈতিক গুৰু ভূতপূৰ্ব মুখ্যমন্ত্ৰী নৃপেন চক্ৰবৰ্তীৰ পদাংক অনুসৰণ কৰিছে। তেখেতেও মেলাৰমঠ কালীমন্দিৰৰ বিপৰীতে থকা সেইসময়ৰ দলীয় প্ৰধান কাৰ্যালয়লত সাময়িকভাৱে বাহৰ পাতিছিল।
সূত্ৰটোত আৰু কোৱা হৈছে যে বিধায়ক তপন চক্ৰবৰ্তীৰ বাহিৰে চিপিআই (এম)ৰ আন সকলো বিধায়কেই ফায়াৰ ব্ৰিগেড চৌমুহুনি এলেকাত থকা বিধায়ক আবাস-১ত থাকিব। তপন চক্ৰবৰ্তীয়ে নতুন ৰাজধানী চৌহদৰ এটি এপাৰ্টমেন্টত থাকিব বুলি সূত্ৰটোত কোৱা হৈছে।
বিপ্লব দেবৰ নেতৃত্বাধীন বিজেপি চৰকাৰখনৰ অপেক্ষাৰত মন্ত্ৰী পৰিষদখনে শপত গ্ৰহণ কৰাৰ বাবে কৰা বিশাল আয়োজনৰ কাৰ্যসূচী সুচাৰুৰূপে চলাই নিয়াৰ বাবে ত্ৰিপুৰা মাধ্যমিক পৰীক্ষা বোৰ্ডে (টিবিএছচি) পতা মাধ্যমিক পৰীক্ষাসমূহ ৯ মাৰ্চৰ পৰিৱৰ্তে ১০ মাৰ্চত পতা হ’ব বুলি জানিব পৰা গৈছে।
ইতিমধ্যে শপত গ্ৰহণ অনুষ্ঠান অনুষ্ঠিত কৰাৰ বাবে ৰাজধানী আগৰতলাত থকা আছাম ৰাইফলছ গ্ৰাউণ্ডত সুৰক্ষা ব্যৱস্থা কটকটীয়া কৰি তোলাৰ লগতে ইয়াক ন-ৰূপত সজাই তোলা হৈছে।
বিশ্বস্ত সূত্ৰে জানিব পৰা মতে দেশখনৰ সকলো বিজেপি শাসিত ৰাজ্যৰ মুখ্যমন্ত্ৰী, মোডী চৰকাৰৰ মন্ত্ৰীসকল আৰু বিজেপি দলৰ কেন্দ্ৰীয় নেতাসকলৰ ওপৰিও স্বয়ং প্ৰধান মন্ত্ৰী বিজেপিৰ আটাইতকৈ গুৰুত্বপূৰ্ণ বিজয় হিচাপে বিৱেচিত এই চৰকাৰখনৰ শপত গ্ৰহণ অনুষ্ঠানত উপষ্ঠিত থাকিব।
