গুৱাহাটীত চলি থকা বিশ্ব যুৱ মহিলা বক্সিং প্ৰতিযোগিতাৰ ফাইনেলত প্ৰৱেশ কৰি অসমৰ অংকুশিতা বড়োৱে এক প্ৰকাৰৰ ইতিহাস সৃষ্টি কৰিছে। অংকুশিতাই কালি হোৱা প্ৰতিযোগিতাখনৰ ৬৪ কেজি শাখাৰ ছেমি ফাইনেলত থাইলেণ্ডৰ প্ৰতিদ্বন্দ্বীক হৰুৱাই অসমবাসীৰ বাবে এই সুখবৰ কঢ়িয়াই আনে। থাইলেণ্ডৰ শক্তিশালী প্ৰতিদ্বন্দ্বী চাকচি থাংচুকক যিদৰে ধৰাশায়ী কৰিলে তালৈ চাই ১৭ বছৰীয়া অংকুশিতা ফাইনেলতো জয়ী হ’ব বুলি অসমবাসীয়ে আশা কৰি আছে। এটা সাধাৰণ, আৰ্থিকভাৱে দুৰ্বল পৰিয়ালৰ সীমাবদ্ধতাৰ মাজৰ পৰা নিজৰ সাধনাক আগুৱাই আনি আজি অংকুশিতাই সমগ্ৰ ভাৰতকে সফলতাৰে প্ৰতিনিধিত্ব কৰাৰ লগতে বিশ্ব ক্ৰীড়া জগতত অসমৰ নামো উজলাই তুলিলে। অংকুশিতাৰ সফলতাত তেওঁৰ জন্মস্থান ঠেলামৰাৰ উলুবাৰীত স্থানীয় ৰাইজে আজি ফটকা ফুটাই আনন্দ প্ৰকাশ কৰে। আনহাতে অঞ্চলটোৰ বহু সংখ্যক লোক আজি তেওঁৰ খেল চাবলৈ ষ্টেডিয়ামত আহি উপস্থিত হয়। তেওঁলোকৰ উপস্থিতিয়েও আজি অংকুশিতাক উন্নত প্ৰদৰ্শনৰ বাবে উৎসাহিত কৰিছিল। গেলাৰিৰ পৰা সকলো দৰ্শকেই অংকুশিতাৰ সমৰ্থনত জয়ধ্বনি দিয়া পৰিলক্ষিত হ’ল।
https://www.youtube.com/watch?v=vfuek5GoOeg
