যোৱা নিশা আৰক্ষীয়ে আটক কৰা ডকমকা-কাণ্ডৰ মূল অভিযুক্ত তথা পূৰ্বেও এটা হত্যাত অভিযুক্ত ‘আলফা’ ওৰফে জৰ্জ তিমুঙে কিছুমান চাঞ্চল্যকৰ স্বীকাৰোক্তি দিছে।
তিমুঙে কোৱা মতে, কাৰ্বি আংলঙৰ কাংথিলাংছ’ত নীলোৎপল আৰু অভিজিতৰ সৈতে কোনো কথাত তৰ্কত লিপ্ত হৈছিল হত্যাকাণ্ডৰ মূল অভিযুক্ত জৰ্জ তিমুং। তৰ্ক লাগি থাকোতেই তিমুঙে বন্ধুবৰ্গক সেই স্থানলৈ মাতিছিল।
পৰিস্থিতি বেয়া দেখি সেই স্থান পৰিত্যাগ কৰিছিল নীলোৎপল আৰু অভিজিতে। কিন্তু ‘আলফা’ৰ নিৰ্দেশত তেওঁলোকৰ গাড়ীলৈ শিলগুটি নিক্ষেপ কৰিছিল একাংশ লোকে। ইয়াৰ পিছতো একাংশ যুৱকে বাইকেৰে অনুসৰণ কৰে নীলোৎপল–অভিজিতক।
ইফালে ক্ষুভিত তিমুং প্ৰতিশোধপৰায়ণ হৈ পৰিছিল। তেওঁ শিশু অপহৰণ কৰি এখন গাড়ী পলায়ন কৰা বুলি ফোন কৰি ওচৰৰ গাঁৱত মিছা খবৰ বিয়পাই দি সাধাৰণ লোকসকলক ত্ৰাসিত কৰি নীলোৎপলহঁতৰ ওপৰত প্ৰতিশোধ লোৱাৰ ষড়যন্ত্ৰ কৰে। ‘আলফা’ৰ ফোন পায়ে একাংশ অন্ধবিশ্বাসী লোকে নীলোৎপল আৰু অভিজিতক আবদ্ধ কৰিছিল। তাৰ পিছতে দুয়োকে মৰিয়াই মৰিয়াই হত্যা কৰিছিল অন্ধবিশ্বাসত আক্ৰান্ত তথা উন্মত্ত লোকৰ দলটোৱে। আৰক্ষীৰ জেৰাত এইবোৰ কথা স্বীকাৰ কৰিছে ‘আলফা’ই।
উল্লেখযোগ্য যে ২০১২ চনতো একেদৰেই য়ু পি ডি এছ সজাই দুজনক আৰু ২০১৪ চনত মিঠু দাস নামৰ এজনক নৃশংসভাৱে হত্যা কৰা ঘটনাৰ সৈতেও জৰ্জ তিমুং জড়িত আছিল।
