ধৰ্মৰ ভিত্তিত বিদেশীক নাগৰিকত্ব প্ৰদানৰ বিৰোধিতাৰে মুখত ক’লা কাপোৰ বন্ধা শ শ ছাত্ৰ-ছাত্ৰীৰ ‘অ’ মোৰ আপোনাৰ দেশ’ৰ সমবেত ধ্বনিত উত্তাল হৈ পৰিছে কটন বিশ্ববিদ্যালয় ( Cotton University )। প্ৰবল ছাত্ৰ বিক্ষোভৰ মাজত পৰি বিশ্ববিদ্যালয়ৰ কলাগুৰু বিষ্ণু ৰাভা প্ৰেক্ষাগৃ্হত আবদ্ধ হৈ পৰিছে শিক্ষা মন্ত্ৰী সিদ্ধাৰ্থ ভট্টাচাৰ্য্য।
আনহাতে ছাত্ৰ-ছাত্ৰীৰ প্ৰবল বিক্ষোভৰ উমান পাই কটন বিশ্ববিদ্যালয়ত আজি ১০ মে’ত আয়োজিত কাৰ্য্যসূচী বাতিল কৰিছে মুখ্য মন্ত্ৰী সৰ্বানন্দ সোণোৱালে।
স্মাৰক পত্ৰ গ্ৰহণ কৰাৰ দাবী জনোৱা ছাত্ৰ-ছাত্ৰীসকলৰ মাজৰ ৪ গৰাকীক গৈ প্ৰেক্ষাগৃ্হৰ ভিতৰত শিক্ষা মন্ত্ৰীক স্মাৰক পত্ৰ দিবৰ বাবে অনুৰোধ কৰা হৈছিল যদিও ছাত্ৰ-ছাত্ৰীসকলে এই অনুৰোধ প্ৰত্যাখ্যান কৰি সকলো প্ৰৱেশ পথ বন্ধ কৰি দিয়ে। ছাত্ৰ-ছাত্ৰীৰ মত ‘তেওঁ যদি শিক্ষা মন্ত্ৰী, তেন্তে ছাত্ৰ-ছাত্ৰীৰ সম্মুখলৈ আহি স্মাৰক পত্ৰ গ্ৰহণ কৰাৰ সাহস দেখুৱাওক।’
বিশ্ববিদ্যালয়খনত আজি ৪ বজাত কেন্দ্ৰীয় লোকসেৱা আয়োগত উত্তীৰ্ণ অসমৰ পৰীক্ষাৰ্থীসকলক মুখ্য মন্ত্ৰীয়ে সম্বৰ্ধনা জনোৱাৰ কথা আছিল।
‘ছাত্ৰ একতা সভাৰ নহয়, সমগ্ৰ কটনৰ ছাত্ৰ-ছাত্ৰীৰ প্ৰতিবাদ এয়া’ বুলি মন্তব্য কৰিছে কটন বিশ্ববিদ্যালয়ৰ ছাত্ৰ একতা সভাৰ সভাপতিজনে।
কিন্তু মুখ্য মন্ত্ৰীৰ আগমণৰ কথা ওলোৱাৰ লগে লগেই বিদেশীক সংস্থাপনৰ বাবে বিজেপি চৰকাৰে গ্ৰহণ কৰা নীতিৰ প্ৰতিবাদৰ বাবে মাৰ বান্ধি ওলাই আহে বিশ্ববিদ্যালয়খনৰ ছাত্ৰ-ছাত্ৰী।
কালিৰ পৰাই বিশ্ববিদ্যালয়খনৰ দেৱালত দেখা গৈছিল নাগৰিকত্ব আইন সংশোধন বিৰোধী প’স্তাৰ। দেখা গৈছিল ‘জাতীয় নায়ক সৰ্বানন্দ সোণোৱাল সন্ধানহীন’ আদি প’স্তাৰ। প’স্তাৰসমূহ আৰক্ষী আৰু জিলা প্ৰশাসনে আহি উঠাই লৈ যায়।
আনহাতে ছাত্ৰ-ছাত্ৰীৰ প্ৰতিবাদত ভাগ লৈ মানৱ অধিকাৰ সংগ্ৰাম সমিতিৰ নেতা গণেশ গোস্বামীয়ে কয় ‘কটনৰ ছাত্ৰ-ছাত্ৰীৰ এই প্ৰতিবাদে সমগ্ৰ অসমত হৈ থকা প্ৰতিবাদক এক নতুন মাত্ৰা প্ৰদান কৰিলে। ই গোটেই অসমৰ ছাত্ৰ-ছাত্ৰীকে এই অন্যায় বিধেয়কখনৰ বিৰোধিতা কৰাৰ বাবে অনুপ্ৰেৰিত কৰিব।’
প্ৰতিবাদৰ সময়ত আৰক্ষীয়ে ছাত্ৰীৰ গাত হাত দিয়া বুলিও প্ৰতিবাদী ছাত্ৰ-ছাত্ৰীসকলে অভিযোগ উত্থাপন কৰিছে।
ছাত্ৰ-ছাত্ৰীৰ প্ৰতিবাদ এতিয়াও অব্যাহত আছে। অধিক খবৰ দিয়াৰ বাবে আমাৰ সাংবাদিক বিশ্ববিদ্যালয়খনৰ উপস্থিত আছে।
