শিৱসাগৰ জিলাৰ ডিমৌ আৰক্ষী চকীৰ অধীনত নিতাইপুখুৰী আৰক্ষী থানাৰ অন্তৰ্গত দিহিংমুখ লাচন গাঁৱ নিবাসী নাগিনা মালা (৫৪) নামৰ নিৰুদ্দিষ্ট বনকৰ্মীজনৰ আজিও কোনো সন্ধান উলিয়াবলৈ সক্ষম হোৱা নাই আৰক্ষীয়ে।
বিগত প্ৰায় ২২ মাহে অপেক্ষাৰত হৈ থকা পৰিয়ালবৰ্গৰ মাজত সেয়েহে এতিয়া হাহাকাৰ সৃষ্টি হৈছে। উল্লেখ্যোগ্য যে ২০১৬ চনৰ ৬ জুনৰ দিনা নিজ ঘৰৰ পৰা কৰ্তব্যলৈ যোৱাৰ পথত নিৰুদ্দিষ্ট হৈছিল ডিব্ৰুগড় জিলাৰ খোৱাং বন উপ- সংমণ্ডলত কৰ্মৰত বনৰক্ষীগৰাকী।
আশ্চৰ্যকৰ কথা এয়ে যে বিগত প্ৰায় ২২ মাহে অসম আৰক্ষীয়ে নাগিনা মালাৰ কোনো শুংসূত্ৰ উলিয়াব পৰা নাই। অসম চৰকাৰৰ বন বিভাগৰ সেৱাত নিয়োজিত বনৰক্ষীগৰাকী সুদীৰ্ঘ প্ৰায় দুটা বছৰে নিৰুদিষ্ট হৈ থকাৰ পাছতো আজিকোপতি বন বিভাগৰ কোনো বিষয়াই খবৰ এটা নকৰিলে পৰিয়ালবৰ্গৰ।
বৰং নিৰুদ্দিষ্ট বনকৰ্মীজনৰ মাহিলী দৰমহাও বন্ধ কৰি পৰিয়ালটোক চৰম সংকটৰ মাজলৈ থেলি দিলে বন বিভাগে। সেয়েহে এতিয়া উপায়বিহীন হৈ হাজিৰা কৰি দিন অতিবাহিত কৰিবলগীয়া হৈছে নাগিনা মালাৰ পৰিয়ালটোৱে। পিতৃৰ অপেক্ষাত কণমানি কনিষ্ঠ কন্যাই বুকুত পিতৃৰ ফটো লৈ ২২ মাহে অপেক্ষা কৰি আছে ৷
উল্লেখযোগ্য যে নাগিনা মালা নিৰুদ্দিষ্ট হোৱাৰ পাছতেই পৰিয়ালৰ লোকে ডিমৌ আৰক্ষী থানাত এজাহাৰ দাখিল কৰিছিল। আৰক্ষীয়ে পৰিয়ালৰ অভিযোগৰ ভিত্তিত গোচৰ নং ১২৭/২০/১৬ ডব্লিও. এছ ৩৬৫ ধাৰাত গোচৰ ৰুজু কৰে।
অভিযোগ অনুসৰি তদন্ত প্ৰক্ৰিয়াত ডিব্ৰুগড়ৰ জিলাৰ চাউলখোৱাত তেওঁৰ ম’বাইল ফোনটো আৰক্ষীয়ে উদ্ধাৰ কৰিছিল যদিও এজন ব্যক্তিক আটক কৰিয়ে তদন্ত সামৰি থয় আৰক্ষীয়ে। সেয়েহে এতিয়া নাগিনা মালাৰ কন্যাই নতুন বন মন্ত্ৰী পৰিমল শুক্লবৈদ্য আৰু আৰক্ষীক তেওঁৰ পিতৃৰ সন্ধান উলিয়াই দিবলৈ কাতৰ আহবান জনাইছে।
উল্লেখ নিষ্প্ৰয়োজন যে পৰিয়ালটোৰ মুৰব্বীজন নিখোজ হোৱাত দিশহাৰা হৈছে এই দুৰ্ভগীয়া পৰিয়ালটো ।
