মহিলাসকলৰ নিম্ন গৰ্ভাশয়ৰ কৰ্কট (cervical cancer) ওপৰত এটা ছিটা প্ৰদান কাৰ্যসূচী আৰম্ভ কৰিবলৈ আগবাঢ়িছে ছিকিম। অহা ৩০ জুলাইত ছিকিমৰ আটাইকেইখন জিলাতেই নিম্ন গৰ্ভাশয়ৰ প্ৰধান কাৰক ‘হিউমেন পেপিল’মা ভাইৰাছ’ৰ (HPV) ছিটা প্ৰদান কাৰ্যসূচীটো আনুষ্ঠানিক ভাৱে উন্মোচন কৰিব। কৰ্কট ৰোগ চিকিৎসাৰ এই অভিলাসী অভিযান আৰম্ভ কৰা ভাৰতৰ প্ৰথম ৰাজ্য হিচাপে পৰিগণিত হ’বলৈ আগবাঢ়িছে ছিকিম।
উল্লেখ্য যে পাঞ্জাবৰ দুখন জিলাতো একেধৰণৰ কাৰ্যসূচী এটা পাইলট প্ৰজেক্ট হিচাপে আৰম্ভ কৰা হৈছে।
কিন্তু ছিকিমত এইটো কাৰ্যসূচী সমগ্ৰ ৰাজ্যজুৰি আৰম্ভ কৰা হ’ব।
ৰাজ্যখনৰ ৯ৰ পৰা ১৪ বছৰীয়া বালিকা আৰু কিশোৰীক নিম্ন গৰ্ভাশয়ৰ কৰ্কটৰ পৰা ৰক্ষা কৰিব পৰা এই ছিটা বিনামূলীয়াকৈ প্ৰদান কৰা হ’ব।
উল্লেখ্য যে বিশ্বত মহিলাসকলক দ্বিতীয়টো অধিক আক্ৰান্ত কৰা কৰ্কট ৰোগ হৈছে নিম্ন গৰ্ভাশয়ৰ কৰ্কট।
বুধবাৰে গেংটকত অনুষ্ঠিত হিউমেন পেপিল’মা ভাইৰাছ ছিটা প্ৰদান সজাগতামূলক কৰ্মশালাত উপস্থিত থাকি এই কথা ঘোষণা কৰে ছিকিমৰ স্বাস্থ্য বিভাগৰ বিষয়াসকলে।
এই কৰ্মশালাৰ আয়োজন কৰিছিল ছিকিম স্বাস্থ্য বিভাগে আৰু ইয়াৰ পৃষ্ঠপোষকতা কৰিছিল ইউনিচেফে।
সাংবাদ মাধ্যমৰ সৈতে হোৱা বাৰ্তালাপত ৰাজ্যিক প্ৰতিষেধক বিষয়া ফুমজে ডেনজংপাই জনাইছে যে হিউমেন পেপিল’মা ভাইৰাছ ছিটাৰ প্ৰকৃত মূল্য হৈছে ৩০০০ টকা কিন্তু কেন্দ্ৰীয় চৰকাৰে ইউনিচেফৰ পৰা ইয়াক ৪০০ টকাত ক্ৰয় কৰিছে আৰু ছোৱালীসকলে এই ছিটা বিনামূলীয়াকৈ লাভ কৰিব।
প্ৰথম ছিটা প্ৰদান আৰম্ভ হ’ব ৩০ জুলাইত আৰু ১৪ দিনত ৯ ৰ পৰা ১৪ বছৰৰ ভিতৰৰ সকলো ছোৱালীকে ছিটা প্ৰদান কৰা হ’ব।
ছিটাৰ দ্বিতীয়টো পালি ২০১৯ৰ ফেব্ৰুৱাৰিত প্ৰদান কৰা হ’ব।
উত্তৰ-পূৰ্বাঞ্চলৰ হকে নিয়োজিত ইউনিচেফৰ স্বাস্থ্য বিষয়া মৌলিক শ্বাহে জনাইছে যে হিউমেন পেপিল’মা ভাইৰাছ ছিটা প্ৰদান কাৰ্যসূচীটো দেশৰ ভিতৰতে বৃহত্তম ৰাজহুৱা স্বাস্থ্য কাৰ্যসূচী।
উল্লেখ্য যে হিউমেন পেপিল’মা ভাইৰাছ হৈছে নিম্ন গৰ্ভাশয়ৰ কৰ্কট ৰোগৰ প্ৰধান কাৰক। এইটো এটা সাধাৰণ ভাইৰাছ আৰু যৌন ক্ৰিয়াৰ সময়ত এই ভাইৰাছৰ সংক্ৰমণ ঘটে। কমবয়সত যৌন ক্ৰিয়া, বহু (যৌন) সংগিত্ব, ধঁপাতৰ ব্যৱহাৰ আদি নিম্ন গৰ্ভাশয়ৰ কৰ্কটৰ কেইটামান শংকাযুক্ত কাৰক।
বিশ্বত প্ৰতি বছৰ নিম্ন গৰ্ভাশয়ৰ কৰ্কট ৰোগত আক্ৰান্ত হোৱাৰ ৫.২ লাখ নতুন ঘটনা নিৰূপিত হয়। তাৰে ভিতৰত ২.৭ লাখ ৰোগীৰ মৃত্যু হয়। নিম্ন গৰ্ভাশয়ৰ কৰ্কট ৰোগত আক্ৰান্ত ৰোগী আৰু ৰোগীৰ মৃত্যুৰ ৮৫শতাংশ উন্নয়নশীল দেশসমূহত সংঘটিত হয়।
