মোবাইল ফোনৰ বেটাৰী বিস্ফোৰণৰ কেইবাটাও ঘটনা পূৰ্বতে সংঘটিত হৈছিল যদিও শেহতীয়া ঘটনাটো যথেষ্ট ভয়ংকৰ। টেক ইউটিউবাৰ এমডি টক ৱাইটিৰ মতে নিশা Redmi 6A স্মাৰ্টফোনৰ বেটাৰী বিস্ফোৰণ হোৱাৰ ফলত তেওঁৰ পেহীয়েকৰ মৃত্যু হয়। ফোনৰ বেটাৰী বিস্ফোৰণত প্ৰথমবাৰৰ বাবে কাৰোবাৰ মৃত্যু হোৱাৰ ঘটনা পোহৰলৈ আহিছে।
Xiaomi য়ে বিষয়টোৰ প্ৰতি তাৎক্ষণিক প্ৰতিক্ৰিয়া প্ৰকাশ কৰি কৈছে যে তেওঁলোকে বিস্ফোৰণৰ কাৰণ অনুসন্ধান কৰি আছে।
ইউটিউবাৰগৰাকীয়ে কয় যে শুই থাকোঁতে মহিলাগৰাকীয়ে ফোনটো গাৰুৰ ওচৰত ৰাখিছিল আৰু পিছত ই ফাটি গৈছিল। অৱশ্যে ইউটিউবাৰে ঘটনাটোৰ সময়ত Redmi 6A-ৰ বেটাৰী আগতে ক্ষতিগ্ৰস্ত আছিল নে চাৰ্জ দি ৰখা হৈছিল সেয়া প্ৰকাশ কৰা নাই।
ইউটিউবাৰে বেটাৰী বিস্ফোৰণৰ ঘটনাৰ বিষয়ে টুইটাৰত পোষ্ট কৰি ঘটনাটোৰ ব্যাখ্যা বিচাৰি কোম্পানীটোক টেগ কৰিছিল। “হাই @RedmiIndia, @manukumarjain,@s_anuj যোৱা নিশা মোৰ পেহীক মৃত অৱস্থাত পোৱা গৈছে। তেওঁ Redmi 6A ব্যৱহাৰ কৰি আছিল আৰু শুই থাকোঁতে তেওঁ ফোনটো গাৰুৰ কাষত ৰাখিছিল। কিছু সময় পিছতে তেওঁৰ ফোনটো বিস্ফোৰিত হয়। এইটো আমাৰ বাবে এটা ডাঙৰ ক্ষতি। এটা ব্ৰেণ্ডৰ ইমানকনো দায়িত্ব থাকিব লাগে।‘’
তেওঁ বিচনাত তেজেৰে লুতুৰি পুতুৰি হৈ পৰি থকা মৃত মহিলাগৰাকীৰ এখন ফটোও শ্বেয়াৰ কৰিছিল। শ্বেয়াৰ কৰা তিনিখন ফটোৰ এটাত Redmi 6A সম্পূৰ্ণৰূপে ক্ষতিগ্ৰস্ত আৰু জ্বলি যোৱা দেখা গৈছে।
ইউটিউবাৰক সঁহাৰি জনাই Xiaomi India-ই ইয়াৰ সমৰ্থিত পৃষ্ঠাত কয়, ‘’Xiaomi India-ত গ্ৰাহকৰ সুৰক্ষা অতি গুৰুত্বপূৰ্ণ আৰু আমি এনে বিষয়বোৰ অতি গুৰুত্ব সহকাৰে লওঁ। আমি এই কঠিন সময়ত পৰিয়ালটোৰ কাষত থিয় দিছো আৰু যিকোনো ধৰণে তেওঁলোকক সহায় কৰাৰ আশা কৰিছো।‘’
কোম্পানীটোৱে এতিয়ালৈকে আনুষ্ঠানিকভাৱে বেটাৰী বিস্ফোৰণৰ কাৰণ প্ৰকাশ কৰা নাই। অৱশ্যে ফোনৰ বেটাৰী বিস্ফোৰণ ঘটা এইটোৱে প্ৰথম ঘটনা নহয়।
