দৰঙৰ এটা জিলা পৰ্যায়ৰ কৃষক সংঘই জিলাখনৰ উপায়ুক্ত আৰু মেডিকেল ডায়গ্নষ্টিক আৰু ইমেজিং প্ৰতিষ্ঠানসমূহ পঞ্জীয়ন কৰা জিলা পৰ্যায়ৰ কৰ্তৃপক্ষৰ সভাপতিৰ ওচৰত দাবী জনাইছে যাতে জিলাখনত চলি থকা ভুল চিকিৎসাজনিত প্ৰতিৱেদন দিয়া মেডিকেল ডায়গ্নষ্টিক আৰু ইমেজিং প্ৰতিষ্ঠানৰ বিৰুদ্ধে প্ৰশাসনৰ তৰফৰ পৰা বিহিত ব্যৱস্থা গ্ৰহণ কৰা হয়।
দৰং জিলা কৃষক সংঘৰ সভাপতি মুজাফৰ হুছেইনে জিলা উপায়ুক্তলৈ প্ৰেৰম কৰা শেহতীয়া আবেদনপত্ৰখনত উল্লেখ কৰিছে যে অসম চিকিৎসা প্ৰতিষ্ঠান (পঞ্জীয়ন আৰু নিয়ন্ত্ৰণ) আইন ২০১০ আৰু ২০১৬ (Assam Clinical Establishment (Registration and Regulation) Act , 2010 and Rules 2016)ৰ নিয়ম মুক্তভাৱে ভংগ কৰা ব্যক্তিগত খণ্ডৰ চিকিৎসা প্ৰতিষ্ঠানসমূহৰ বিৰুদ্ধে কঠোৰ ব্যৱস্থা গ্ৰহণ কৰিব লাগে। এই আইনখন যথাৰ্থভাৱে প্ৰয়োগ কৰা হ’লে ৰোগীক হাৰাশাস্তি কৰা আৰু কৰ্তব্যত অৱহেলা কৰা ব্যক্তিগত চিকিৎসা কেন্দ্ৰসমূহৰ বিৰুদ্ধে ব্যৱস্থা গ্ৰহণ কৰিব পৰা যাব। আন্তঃগাঁথনি, যন্ত্ৰপাতি আদি মানকবিশিষ্ট হয় নে নহয় তাৰো অনুসন্ধান নোহোৱাৰ বাবে এই সমূহত চৰম অনিয়ম হৈ আহিছে বুলি আবেদনপত্ৰখনত অভিযোগ উত্থাপন কৰা হৈছে। আবেদনপত্ৰখনত এই স্বাস্থ্য কেন্দ্ৰসমূহত স্বাস্থ্য পৰীক্ষাৰ নামত অশিক্ষিত আৰু অৰ্ধ-শিক্ষিত কৃষক পৰিয়ালসমূহক অযথা হাৰাশাস্তি কৰা হোৱাৰো তথ্যসহ অভিযোগ উত্থাপিত কৰা হৈছে।
আবেদনকাৰীয়ে এনে উদাহৰণো উল্লেখ কৰা হৈছে যে দলগাঁও আৰক্ষী থানাৰ অন্তৰ্গত দুলীয়াপাৰা গাঁওৰ মুৰ্ছিদা বেগম আৰু মুছতাজ আলী নামৰ এহাল দুখীয়া দম্পতীৰ ছনোগ্ৰাফিৰ প্ৰতিৱেদনৰ ভুল তথ্যৰ বাবে মাতৃ সন্তানৰ সংকটজনক অৱস্থা হৈছিল। অত্যন্ত খৰচী ছনোগ্ৰাফি প্ৰতিৱেদনখনত এটা ভ্ৰুণ বুলি দিয়া প্ৰতিৱেদনৰ বিপৰীতে মাতৃগৰ্ভত দুটা ভ্ৰুণে স্থিতি লৈছিল আৰু দুয়োটা সন্তান আৰু মাতৃ অপুষ্টিত ভুগিছিল। এই ভুল প্ৰতিৱেদন দিয়া প্ৰতিষ্ঠানটো ব্যক্তিগত চিকিৎসা পৰীক্ষা প্ৰতিষ্ঠান মঙলদৈৰ ৱাৰ্ড নং-১ত থকা এক্যুস্কেন (Accuscan) । এইটোৰ দৰে প্ৰতিষ্ঠানসমূহে এই দুখীয়া দম্পতীহালৰ নিচিনা বহুতো লোকৰ কষ্টোপাৰ্জিত ধনৰ টকা এইদৰে সৰকাই আছে। জানিব পৰা গৈছে যে দম্পতিী হালে মঙলদৈ চৰকাৰী চিকিৎসালয়ৰ স্ত্ৰীৰোগ বিশেষজ্ঞৰ উপদেশ অনুযায়ী এই স্বাস্থ্য পৰীক্ষা কেন্দ্ৰটোলৈ গৈছিল।
এইদৰে গ্ৰাহকক ঠগা এই প্ৰতিষ্ঠানটোৰ ভুল ছনোগ্ৰাফি প্ৰতিৱেদনৰ বাবে সংকটজনক অৱস্থাত দুটা সন্তানসহ মাকক প্ৰথমতে মঙলদৈত আৰু তাৰ পাছত জৰুৰীকালীনভাৱে গুৱাহাটী চিকিৎসা মহাবিদ্যালয়ত ভৰ্তি কৰিবলগীয়া হৈছিল। দুটা সন্তানৰ বাবে প্ৰয়োজনীয় পূৰ্ব প্ৰস্তুতি নথকা হেতুকে পৰিয়ালটো অত্যন্ত হাৰাশাস্তিৰ সমুখিন হ’বলগীয়া হৈছিল।
ইতিমধ্যে কৃষক সংঘই এই ঘটনাটোৰ এটা দণ্ডাধীশ পৰ্যায়ৰ তদন্তৰ দাবী কৰিছে আৰু জিলাখত থকা এনে ত্ৰুটিপূৰ্ণ স্বাস্থ্য পৰীক্ষা কেন্দ্ৰসমূহৰ আন্তঃগাঁথনি, চিকিৎসা আৰু উপ চিকিৎসা কৰ্মচাৰী (medical and para-medical staff), যন্ত্ৰপাতি, সেৱাৰ মান আদিৰ এটা তদন্তৰ দাবী কৰিছে।
নৰ্থ-ইষ্ট নাওৰ সৈতে হোৱা বাৰ্তালাপত কৃষক সংঘৰ সভাপতিগৰাকীয়ে ব্যাখ্যা কৰিছে কেনেদৰে বহু দূৰৰ পৰা মঙলদৈ অসামৰিক স্বাস্থ্য কেন্দ্ৰলৈ অহা অশিক্ষিত আৰু অৰ্ধ শিক্ষিত ৰোগীসকললে চৰকাৰী স্বাস্থ্য কেন্দ্ৰটোত এগৰাকী নিয়মীয়া ৰেডিঅ’লিষ্ট আৰু আল্ট্ৰা ছাউণ্ড পৰিসেৱা নথকা বাবে কেনেদৰে অৰ্থনৈতিকভৱে জুৰুলা হ’বলগীয়া হয়।
উল্লেখযোগ্য যে অসমাৰিক চিকিৎসা কেন্দ্ৰটোৰ ওচৰত থকা ৰিজিয়নেল ডায়েগ্নষ্টিক চেণ্টাৰৰ কাৰ্যক্ষম আল্ট্ৰা ছাউণ্ড মেছিনটো ছিপাঝাৰ প্ৰাথমিক স্বাস্থ্যটোলৈ উঠাই নিয়া হৈছে। অসামৰিক চিকিৎসালয়খনত থকা আল্ট্ৰা ছাউণ্ড মেছিনটোত অত্যন্ত কম পৰীক্ষা সম্পন্ন কৰা হৈছে বুলি কৃষক নেতাগৰাকীয়ে অভিযোগ কৰিছে। জিলাখনৰ দুখীয়া লোকসকলৰ সুবিধাৰ বাবে মুখ্য মন্ত্ৰীৰ মুক্ত চিকিৎসা পৰীক্ষা আৰু ইমেজিং আঁচনিৰ অধীনত আল্ট্ৰা ছাউণ্ড সেৱাৰ সূচনা কৰাৰ বাবে স্বাস্থ্য মন্ত্ৰীলৈ অনুৰোধ জনায়।
