নগাঁও জিলাৰ চামগুৰি আৰক্ষী থানাৰ অন্তৰ্গত শালনাৰ বৰজুৰিত বুধবাৰে নিশা এক ৰহস্যজনক ঘটনা সংঘটিত হয়। এটা নিৰ্জন পথৰ কাষত পৰিত্যক্ত অৱস্থাত পৰি থকা এখন ক’লা ৰঙৰ স্কুটীৰ পৰা আৰক্ষীয়ে বুজন পৰিমাণৰ নগদ ধন উদ্ধাৰ কৰিবলৈ সক্ষম হয়। এই ঘটনাই সমগ্ৰ অঞ্চলটোতে ব্যাপক কৌতুহল আৰু চাঞ্চল্যৰ সৃষ্টি কৰিছে। স্থানীয় ৰাইজে শালনা-বৰজুৰি সংযোগী পথৰ কাষত বহু সময় ধৰি মালিবিহীন অৱস্থাত এএছ-০২-আৰ-৮৬৪১ নম্বৰৰ স্কুটীখন পৰি থকা প্ৰত্যক্ষ কৰিছিল। কোনো লোকক ওচৰত নেদেখি সন্দেহ ওপজাত স্থানীয় ৰাইজে লগে লগে আৰক্ষীক খবৰ দিয়ে।
ঘটনাৰ খবৰ পোৱাৰ লগে লগে চামগুৰি আৰু শালনা আৰক্ষী চকীৰ এটা দল দ্ৰুতগতিত ঘটনাস্থলীত উপস্থিত হয়। আৰক্ষীয়ে ৰাইজৰ উপস্থিতিত স্কুটীখনৰ তালাচী চলাই ভিতৰত লুকুৱাই থোৱা অৱস্থাত প্ৰচুৰ পৰিমাণৰ নগদ ধন বিচাৰি পায়। নিশাৰ ভাগতে আৰক্ষীয়ে উদ্ধাৰ হোৱা এই ধনখিনি গণনা কৰে আৰু মুঠ ২৭,১৭,৮৮০ টকা উদ্ধাৰ হোৱা বুলি নিশ্চিত কৰে। ইমান বৃহৎ পৰিমাণৰ ধন কি কাৰণত আৰু কোনে এনেদৰে পথৰ কাষত এৰি থৈ গৈছিল, সেই লৈ এতিয়াও ৰহস্য আৱৰ্তত আছে।
বৰ্তমান আৰক্ষীয়ে স্কুটীখনৰ পঞ্জীয়ন নম্বৰৰ জৰিয়তে ইয়াৰ প্ৰকৃত গৰাকী কোন আৰু এই ধনৰ উৎস কি, সেই সন্দৰ্ভত তদন্ত আৰম্ভ কৰিছে। ইমান বৃহৎ পৰিমাণৰ ধন কোনো অবৈধ কামত ব্যৱহাৰৰ বাবে নিয়া হৈছিল নেকি, সেই দিশটোও আৰক্ষীয়ে খতিয়াই চাইছে। অৱশ্যে এই পৰ্যন্ত আৰক্ষীৰ তৰফৰ পৰা কোনো চৰকাৰী বিবৃতি প্ৰকাশ কৰা হোৱা নাই। তদন্ত সম্পূৰ্ণ হোৱাৰ পাছতহে এই সমগ্ৰ ঘটনাৰ প্ৰকৃত ৰহস্য পোহৰলৈ আহিব বুলি বিভাগীয় সূত্ৰই জানিবলৈ দিছে।
