উত্তৰকাশীৰ ধাৰালী আৰু হৰ্শিল গাঁৱত ভয়ংকৰ বানে ফলত গৃহহীন হোৱা পৰিয়ালসমূহৰ মাজত ক্ষতিপূৰণৰ ধনক লৈ তীব্ৰ ক্ষোভৰ সৃষ্টি হৈছে। ৰাজ্য চৰকাৰে প্ৰতিশ্ৰুতি দিয়া ৫ লাখ টকাৰ পৰিৱৰ্তে ক্ষতিগ্ৰস্ত পৰিয়ালসমূহক মাত্ৰ ৫ হাজাৰ টকাৰ চেক প্ৰদান কৰাত গাঁওবাসীয়ে গ্ৰহণ কৰিবলৈ অস্বীকাৰ কৰিছে। স্থানীয় লোকসকলৰ মাজত প্ৰশ্ন উত্থাপন হৈছে—এই সামান্য ধনেৰে তেওঁলোকে জীৱন নতুনকৈ কেনেকৈ আৰম্ভ কৰিব?
উল্লেখ্য যে ৫ আগষ্টত উত্তৰকাশীৰ হৰ্শিল উপত্যকাৰ ধাৰালী আৰু হৰ্শিল গাঁৱত সংঘটিত বানত বহু পৰিয়াল গৃহহীন হৈ পৰিছে। স্থানীয় সূত্ৰৰ তথ্য অনুসৰি, ধাৰালীৰ ৩৫টা পৰিয়ালে তেওঁলোকৰ সকলো সম্পত্তি হেৰুৱাইছে। হৰ্শিল গাঁৱৰো পৰিস্থিতি একেই। এই দুৰ্যোগৰ ফলত ঘৰ-বাৰী, জীৱন-জীৱিকা হেৰুৱাই পৰিয়ালসমূহে নতুনকৈ জীৱন গঢ়ি তোলাৰ পথ বিচাৰি সাহাকাৰ কৰিব লগীয়া হৈছে।
ৰাজ্য চৰকাৰে দুৰ্যোগৰ পিছত ক্ষতিগ্ৰস্ত পৰিয়ালসমূহক ৫ লাখ টকা ক্ষতিপূৰণৰ প্ৰতিশ্ৰুতি দিছিল। মুখ্যমন্ত্ৰী পুষ্কৰ সিং ধামীয়ে ঘোষণা কৰিছিল যে গৃহহীন হোৱা পৰিয়ালৰ লগতে মৃতকৰ পৰিয়ালসমূহকো একে পৰিমাণৰ ধন প্ৰদান কৰা হ’ব। কিন্তু বাস্তৱত ক্ষতিগ্ৰস্ত লোকসকলক মাত্ৰ ৫ হাজাৰ টকাৰ চেক প্ৰদান কৰা হৈছে, যিটো তেওঁলোকে ‘অপমানজনক’বুলি অভিহিত কৰিছে। গাঁওবাসীৰ অভিযোগ উত্থাপন কৰিছে যে এই সামান্য ধনেৰে তেওঁলোকৰ ক্ষতি পূৰণ কৰাটো সম্ভৱ নহয়, আৰু চৰকাৰে তেওঁলোকৰ ক্ষয়-ক্ষতিৰ পৰিমাণ কমকৈ দেখুৱাবলৈও চেষ্টা কৰিছে বুলি দাবী উত্ত্জাপন কৰিছে।
উত্তৰকাশীৰ জিলা দণ্ডাধীশ প্ৰশান্ত আৰ্য্যই বুজনি দিছে যে ৫ হাজাৰ টকাৰ এই ধন ‘তাৎক্ষণিক ক্ষতিপূৰণ’হিচাপে প্ৰদান কৰা হৈছে। তেওঁ কয়, “ক্ষয়-ক্ষতিৰ সম্পূৰ্ণ তালিকা প্ৰস্তুত কৰাৰ কাম চলি আছে। তাৰ পিছত উপযুক্ত ক্ষতিপূৰণ প্ৰদান কৰা হ’ব।” ৰাজ্য চৰকাৰে ক্ষয়-ক্ষতিৰ পৰিসৰ পৰীক্ষা কৰিবলৈ তিনিজনীয়া এখন কমিটী গঠন কৰিছে, আৰু এসপ্তাহৰ ভিতৰত প্ৰতিবেদন দাখিল কৰিব বুলি সদৰী কৰিছে।
দুৰ্যোগৰ পিছত চৰকাৰে তৎপৰতাৰে শনিবাৰলৈকে ক্ষতিগ্ৰস্ত অঞ্চলৰ পৰা ৮২৫ জন লোকক উদ্ধাৰ কৰিবলৈ হৈছে। পুলিচ, এছডিআৰএফ, সেনা আৰু অন্যান্য দুৰ্যোগ সঁহাৰি দল উদ্ধাৰ কাৰ্যত নিয়োজিত হৈ আছে বুলি জানিবলৈ দিছে। কিন্তু গাঁওবাসীৰ মাজত ক্ষতিপূৰণৰ সামান্য ধনৰ বাবে ক্ষোভ অব্যাহত আছে। তেওঁলোকে দাবী কৰিছে যে চৰকাৰে প্ৰতিশ্ৰুতি অনুসৰি পূৰ্ণ ক্ষতিপূৰণ প্ৰদান কৰক, যাতে তেওঁলোকে নিজৰ জীৱন পুনৰ গঢ়ি তুলিব পাৰে।
