আজি বিয়লি ৪.৩০ বজাত বিশেষ বিমানযোগে যোৰহাটত আহি উপস্থিত হয়হি বলিউডৰ মোহময়ী অভিনেত্ৰী তথা অসম পৰ্যটনৰ ব্ৰেণ্ড এম্বেছাদৰ প্ৰিয়ংকা চোপ্ৰা। আজি সন্ধিয়া ৭.৩০ বজাত উপস্থিত হোৱাৰ কথা আছিল যদিও অভিনেত্ৰী গৰাকী সময়তকৈ পূৰ্বেই আহি উপস্থিত হয়হি।
বিমান বন্দৰত উপস্থিত হৈয়ে অভিনেত্ৰী গৰাকীয়ে পোন প্ৰথমে ন আলি ঢেকিয়াজুলিৰ সৱৰ্ণপ্ৰভা বৰদলৈ মাধ্যমিক বালিকা বিদ্যালয়ত উপস্থিত হয়।
বিদ্যালয়খনত উপস্থিত হৈ একাংশ ছাত্ৰ-ছাত্ৰীৰ সৈতে বিহু উপভোগ কৰাৰ লগতে ছাত্ৰ-ছাত্ৰী সকলৰ সৈতে এপাক বিহুও নাচিলে অভিনেত্ৰীগৰাকীয়ে।
উল্লেখযোগ্য যে অসমৰ পৰ্যটনক দেশ আৰু বিশ্বৰ আগত আকৰ্ষণীয়াকৈ তুলি ধৰাৰ লক্ষ্যৰে অভিনেত্ৰী প্ৰিয়ংকা চোপ্ৰাই কেইবাটাও বিজ্ঞাপনত অভিনয় কৰিব। অভিনেত্ৰী গৰাকীয়ে প্ৰথম অৱস্থাত যোৰহাটত আহোম সকলৰ চকলং প্ৰথাৰে বিয়াৰ এটা শ্বুটিং কৰিব। এই শ্বুটিং আজিৰে পৰাই আৰম্ভ হ’ব।
যোৰহাটৰ ঠেঙাল মেনৰ, বনিয়ান গ্ৰুভ, কাজিৰঙা গ’ল্ফ ক’ৰ্ছৰ উপৰিও তেজপুৰ, কাজিৰঙা ৰাষ্ট্ৰীয় উদ্যান, মানস ৰাষ্ট্ৰীয় উদ্যান, বৰপেটা সত্ৰ, বটদ্ৰৱা আদি বিভিন্ন ঠাইত পৰ্যটন বিজ্ঞাপনৰ শ্বুটিং কৰিব অভিনেত্ৰী প্ৰিয়ংকা চোপ্ৰাই।
সোমবাৰলৈ বলিউডৰ অভিনেত্ৰী গৰাকী ঠেঙাল মেনৰতে থাকিব। আৰু মঙলবাৰে বিয়লি একেখন বিমানেৰে দিল্লীলৈ উভতিব প্ৰিয়ংকা চোপ্ৰা।
আজি কটকটীয়া নিৰাপত্তাৰ মাজেৰে প্ৰিয়ংকা চোপ্ৰাক আদৰণি জনোৱা হয়।
