গুৱাহাটীৰ অৰুণাচল ছাত্ৰ সন্থাই চানমাৰিৰ অসম আভিযান্ত্ৰিক মহাবিদ্যালয় খেল পথাৰত এখন অৰুণাচল মহোৎসৱৰ আয়োজন কৰিছে। অহা ১৬ ফেব্ৰুৱাৰীৰ পৰা ১৯ ফেব্ৰুৱাৰীলৈকে চাৰিদিনীয়া কাৰ্যসূচীৰে মহোৎসৱখনি অনুষ্ঠিত হ’ব।
এই মহোৎসৱ আয়োজন কৰাৰ মূল উদ্দেশ্যটো হৈছে গুৱাহাটী অৰুণাচল ছাত্ৰ সন্থাৰ ৫০ বছৰ সম্পূৰ্ণ হোৱাৰ উদযাপনৰ লগত সংগতি ৰাখি ৰাজ্যখনৰ বৰ্ণাঢ্য সংস্কৃতি তথা পৰম্পৰাৰ প্ৰচাৰ কৰা।
ছাত্ৰ সন্থাটোৰ সভাপতি তুফান লিগুৱে কয় যে মহোৎসৱটো গুৱাহাটীত অনুষ্ঠিত কৰিবলৈ লোৱাৰ কাৰণটো হৈছে এই মহানগৰখন ভাৰতৰ উত্তৰ-পূৰ্বাঞ্চলৰ দুৱাৰমুখ। ৰাজ্যখনৰ সাংগীতিক বৈচিত্ৰতা আৰু সাংস্কৃতিক পৰম্পৰা প্ৰদৰ্শনৰ এইখনেই উপযুক্ত স্থান।
অসমত বসবাস কৰা ৭০০০ অৰুণাচলী যুৱক-যুৱতীয়ে এই মহোৎসৱতে ইজনে সিজনৰ লগত মত বিনিময় কৰাৰ সুযোগ লাভ কৰিব।
এই অনুষ্ঠানৰ উল্লেখযোগ্য কিছু দিশ হৈছে ইয়াত অৰুণাচলৰ স্থানীয় খাদ্যসম্ভাৰৰ লগতে জনজাতীয় সাজপাৰ, জীৱন যাত্ৰা, কলা, সংস্কৃতি, লোক সংগীত ইত্যাদিৰ প্ৰদৰ্শন দেখা পোৱা যাব।
মহোৎসৱত দুয়োখন ৰাজ্যৰ আগশাৰীৰৰ বেণ্ডে প্ৰদৰ্শন কৰা ৰক সংগীতেও দৰ্শকক মনোৰঞ্জন দিব। অনুষ্ঠানৰ উদ্বোধনীৰ সন্ধিয়া মেটেলিক বেণ্ড লুনাটিক ফ্ৰিঞ্জে তেওঁলোকৰ প্ৰদৰ্শন আগবঢ়াৱ।
ক্লাছিক ৰক, হিপ-হপ, ব্লুজ আৰু ফিউজন বেণ্ডেও এই চাৰিদিনীয়া অনুষ্ঠানত সংগীত পৰিৱেশন কৰিব।
