চলিত হিৰো ইণ্ডিয়ান ছুপাৰ লীগ(আই এছ এল) ফুটবল প্ৰতিযোগিতাত আজি গুৱাহাটীৰ সৰুসজাই ক্ৰীড়া প্ৰকল্পৰ ইণ্ডিৰা গান্ধী এথলেটিকছ ষ্টেডিয়ামত নৰ্থ-ইষ্ট ইউনাইটেডে প্ৰতিদ্বণ্ডিতা কৰিব দিল্লী ডাইনামোজৰ বিপক্ষে।
লক্ষ্যণীয় যে প্ৰতিযোগিতাখনৰ পইণ্ট তালিকাত দিল্লী ডাইনামোজ আছে অন্তিম দশম স্থানত আৰু নৰ্থ-ইষ্ট আছে নৱম স্থানত।
ইতিমধ্যে দুয়োটা দলে প্ৰতিযোগিতাখনৰ প্লে অফত খেলাৰ সুযোগ হেৰুৱাইছে। সেয়ে আজিৰ মেচখন প্ৰতিযোগিতাৰ এখন গুৰুত্বহীন মেচ। অৱশ্যে দুয়োটা দলে আজিৰ মেচখনত যুঁজ দিব পইণ্ট তালিকাৰ অন্তিম স্থানৰ পৰা নিজকে উদ্ধাৰ কৰাৰ বাবে।
ইয়াৰ পূৰ্বে খেলা প্ৰথম লেগৰ মেচখনত নৰ্থ-ইষ্টে ২-০ গ’লৰ ব্যৱধানত পৰাজিত কৰিছিল দিল্লী ডাইনামোজক। দিল্লী ডাইনামোজ সম্প্ৰতি ১৩ খন মেচৰ ২ খনত বিজয় ৯ খনত পৰাজয় আৰু ২ খনত ড্ৰ খেলি পইণ্ট তালিকাৰ অন্তিম স্থানত আছে। আনহাতে নৰ্থ-ইষ্টে ১৪ খন মেচৰ পৰা ১১ পইণ্ট লাভ কৰি তালিকাৰ নৱম স্থানতে সীমাবদ্ধ ৰাখিছে।
চেন্নায়েন এফ চিৰ বিপক্ষে ড্ৰ খেলি প্ৰতিশোধৰ মানসিকতাৰে গুৱাহাটীত উপস্থিত হৈছে দিল্লী ডাইনামোজৰ দল। গুৱাহাটীত উপস্থিত হৈ দিল্লীৰ প্ৰশিক্ষক মিগুৱেল এঞ্জেলে সংবাদ মাধ্যমক কয় যে প্ৰতিযোগিতাৰ গুৰুত্বহীন মেচখন আমাৰ বাবে গুৰুত্বপূৰ্ণ কিয়নো জয়লাভ কৰিলেহে আমি পইণ্ট তালিকাৰ অন্তিম স্থানৰ পৰা নিজকে উদ্ধাৰ কৰিব পাৰিম।
ইফালে ঘৰুৱা দল নৰ্থ-ইষ্টৰ সহ প্ৰশিক্ষক এলকো ছচাট’ৰিয়ে কয় যে লক্ষ্য অবিহনে খেলপথাৰত নামিলে খেলুৱৈসকলৰ মানসিক শক্তি হ্ৰাস পায়। সেয়ে দিল্লীৰ বিৰুদ্ধে পূৰ্ণ শক্তিৰে নামিম।
