উজনি অসমৰ ব্ৰহ্মপুত্ৰৰ উত্তৰপাৰ আৰু দক্ষিণপাৰৰ মানুহে ইপাৰ সিপাৰ হোৱাত ভুগি থকা দীৰ্ঘদিনীয়া সমস্যাৰ প্ৰতি সমাধান কঢ়িয়াই দীৰ্ঘ প্ৰতীক্ষিত স্থলপথ-ৰে’লপথযুক্ত বগীবিল দলং অৱশেষত চলিত বছৰৰ জুন মাহত সম্পূৰ্ণ হৈ উঠাৰ পথত আগবাঢ়িছে।
দায়িত্বত থকা এগৰাকী বিষয়াই প্ৰকাশ কৰা মতে দলংখনৰ তলৰ খলপাৰ মুঠ ৪১টা ধৰণীৰ ২৯টাতেই ৰে’লৰ ছিৰি দিয়া আৰু ওপৰৰ খলপাত গাড়ী যোৱাৰ বাবে পকীকৰণৰ কাম সম্পূৰ্ণ হৈ উঠিছে। লগতে চলিত সপ্তাহত ৩২সংখ্যক ধৰণীটোলৈকে কাম সম্পূৰ্ণ হোৱাৰ আশা আছে।
সূত্ৰটোত প্ৰকাশ পোৱা মতে অৱশিষ্ট নটা ধৰণীৰ ওপৰত গাড়ী যোৱা পথ পকীকৰণৰ কাম পৰৱৰ্তী দুমাহৰ ভিতৰত আৰু ৰে’লপথ স্থাপনৰ কাম পৰৱৰ্তী ৩ মাহৰ ভিতৰত সম্পূৰ্ণ হ’ব।
একে সময়তে দলং সংযোগী ডিব্ৰুগড়ৰ ধামালগাঁৱৰ ওচৰত থকা ৰাষ্ট্ৰীয় ঘাইপথ-৫২ (খ) পথটোৰ নিৰ্মাণৰ কামো আগ বাঢ়ি আছে। দক্ষিণ পাৰৰ লেপেটকটাৰ ৰাষ্ট্ৰীয় ঘাইপথ-৩৭ক সংযোগ কৰা পথটোৰ নিৰ্মাণো অহা ৩ৰ পৰা ৪ মাহৰ ভিতৰত সম্পূৰ্ণ হোৱাৰ কথা।
দলংখন সকলো দিশৰ পৰা সম্পূৰ্ণ হোৱাৰ পিছত ৰে’ল ভ্ৰমণ আৰু ৰে’লগাড়ী চলাচলৰ নিৰাপত্তাৰ দিশসমূহ চোৱা-চিতাৰ দায়িত্বত থকা ৰে’ল সুৰক্ষা আয়োগৰ এটা সঁজাতী দলে দলংখন নিৰীক্ষণ কৰিব।
সূত্ৰটোৱে জনোৱা মতে, ৰে’লপথ নিৰাপত্তা আয়োগৰ পৰা সেউজ সংকেত লাভ কৰাৰ পিছতে এই দলংখন জনসাধাৰণলৈ উৎসৰ্গা কৰা হ’ব।
জানিব পৰা মতে আনুমানিক ৫৫০০ কোটি টকা ব্যয়সাপেক্ষ প্ৰায় ৪.৯৪ কিঃ মিঃ দৈৰ্ঘ্যৰ বগীবিল দলংখন দেশৰ ভিতৰতে দীৰ্ঘতম ৰে’লপথ-স্থলপথযুক্ত দলং হিচাপে পৰিগণিত হৈছে।
তিনিটা লেনযুক্ত এই দলংখনৰ দুয়োফালে পদপথ থাকিব আৰু দলংখনৰ গাঁথনিত বৈদ্যুতিক আলোকৰ ব্যৱস্থা কৰা হ্’ব।
