এনআৰচি চমুকৈ ৰাষ্ট্ৰীয় নাগৰিকপঞ্জী উন্নীতকৰণৰ পাছত বাংলাদেশী বুলি চিনাক্ত হোৱা এজনো লোকক গ্ৰহণ নকৰে বাংলাদেশে। ভাৰত আৰু বাংলাদেশৰ মাজত অনুষ্ঠিত একাধিক দ্বিপাক্ষিক বৈঠকত দিল্লীৰ তৰফৰ পৰা বাংলাদেশী অনুপ্ৰৱেশৰ কথা উত্থাপন কৰা হৈছিল। পিছে দেশখনে অসম কিম্বা ভাৰতত বাংলাদেশী অনুপ্ৰৱেশকাৰী আছে বুলি মানি লোৱা নাই। বাংলাদেশৰ আৰ্থ-সামাজিক অৱস্থা ভাৰততকৈ যথেষ্ট উন্নত বুলি যুক্তি প্ৰদৰ্শনেৰে নতুন দিল্লীৰ এই অভিযোগ ঢাকাই বাৰম্বাৰ অস্বীকাৰ কৰি আহিছে।
দ্বিপাক্ষিক বৈঠকৰ ‘মাইনিউটছ’ কেন্দ্ৰীয় গৃহ বিভাগৰ কাৰ্যালয়ত মজুত আছে। কোনোৱাই আৰ টি আই কৰিলেই এই কথা ওলাই পৰিব।‘—নতুন দিল্লীত কালি অনুষ্ঠিত ‘ৰাষ্ট্ৰীয় নাগৰিকপঞ্জী’ শীৰ্ষক এক আলোচনা-চক্ৰত অতি তাৎপৰ্যপূৰ্ণ এই বক্তব্য কৰিছে কেন্দ্ৰৰ প্ৰাক্তন গৃহ সচিব গোপালকৃষ্ণ পিল্লাই।
দ্বিপাক্ষিক পৰ্যায়ৰ আলোচনাকালত তেওঁ নিজেই একাধিকবাৰ উপস্থিত থকা বুলি উল্লেখ কৰি পিল্লায়ে কয় যে এনআৰচিৰ পৰা বাদ যোৱা লোকসকলক কোনোপধ্যেই বাংলাদেশলৈ খেদি পঠিওৱাটো সম্ভৱ নহয়। সেয়েহে চিহ্নিত বাংলাদেশীসকলক ‘ৱৰ্ক পাৰ্মিট’ প্ৰদান কৰিব লাগে বুলি তেওঁ কয়।
পিল্লায়ে কয় যে কেন্দ্ৰীয় গৃহ বিভাগৰ যুটীয়া সচিব হিচাপে উত্তৰ-পূৰ্বাঞ্চলৰ দায়িত্বত থকাৰ সময়ত তেওঁ তদানীন্তন গৃহমন্ত্ৰী লালকৃষ্ণ আদৱানিৰ ওচৰতো ৱৰ্ক পাৰ্মিটৰ বিষয়টো উত্থাপন কৰিছিল। পাছত কেন্দ্ৰীয় গৃহ সচিব হিচাপে তদানীন্তন গৃহমন্ত্ৰী পি চিদাম্বৰমৰ সৈতেও ৱৰ্ক পাৰ্মিটৰ বিষয়টো আলোচনা কৰিছিল।
কিন্তু বিজেপিয়েই হওক বা কংগ্ৰেছ হওক ৱৰ্ক পাৰ্মিটৰ বিষয়টো মুঠেই মানি ল’ব বিচৰা নাছিল বুলি পিল্লায়ে শুকুৰবাৰে জানিবলৈ দিয়ে।
আনহাতে ৩০ জুনৰ নাগৰিকপঞ্জীৰ খচৰা প্ৰকাশ পালেই যে অবৈধ বাংলাদেশীক চিনাক্ত হ’ব, সেই কথা ভাবিব নোৱাৰি বুলি তাৎপৰ্যপূৰ্ণ মন্তব্য আগবঢ়াইছে পিল্লাই। পিল্লাইৰ দাবী— ‘এক দশক পাছতো ৰাষ্ট্ৰীয় নাগৰিকৰপঞ্জী উন্নীতকৰণ প্ৰক্ৰিয়া অব্যাহত থাকিব’। আলোচনা চক্ৰত কৃষক নেতা অখিল গগৈ উপস্থিত থাকে যদিও এই সন্দৰ্ভত কোনো বক্তব্য প্ৰকাশ কৰাৰ পৰা বিৰত থাকে।
