যোৱা কেইদিনমান পূৰ্বে এজন জ্যেষ্ঠ কংগ্ৰেছী অনিল ৰাজাই দলটোৰ আন এজন নেতা তথা প্ৰাক্তন মন্ত্ৰী ৰকিবুল হুছেইন ৰ বিৰুদ্ধে দুৰ্নীতিৰ ধনেৰে সম্পত্তিৰ পাহাৰ গঢ়া বুলি অভিযোগ অনাৰ পিছত এই বিষয়টোক লৈ কৃষক-শ্ৰমিক উন্নয়ন পৰিষদ আৰু গৰীয়া-মৰীয়া যুৱ ছাত্ৰ পৰিষদে যৌথভাৱে ১৩ মাৰ্চত গুৱাহাটী প্ৰেছ ক্লাৱত এখন সংবাদমেলৰ আয়োজন কৰে।
এই সংবাদমেলত দুয়োটা সংগঠনৰ নেতৃবৃন্দ ৰকিবুল হুছেইনৰ বিৰুদ্ধে সৰৱ হৈ পৰাৰ লগতে প্ৰাক্তন মন্ত্ৰী ৰকিবুল হুছেইনৰ সম্পত্তিৰ তালিকাক লৈ চি বি আই তদন্ত দাবী কৰে দুয়োটা সংগঠনে।
কৃষক-শ্ৰমিক উন্নয়ন পৰিষদৰ ৰাজ্যিক সভাপতি প্ৰদীপ কলিতাই কৰা অভিযোগ অনুসৰি ৰকিবুল হুছেইন বিভিন্ন দপ্তৰৰ মন্ত্ৰী হৈ থকা সময়ত ব্যপক দুৰ্নীতিত লিপ্ত হৈ বৃহৎ পৰিমাণৰ সম্পত্তিৰ অধিকাৰী হৈ পৰিল।
তেওঁৰ ৰকিবুল হুছেইনৰ বিৰুদ্ধে মন্তব্য কৰি কয়, ‘’মন্ত্ৰী হোৱাৰ আগেয়ে ৰকিবুল হুছেইনৰ পিতৃৰ নগাওঁ চহৰৰ মাজমজিয়াত এটা গৃহৰ বাহিৰে অন্য সম্পত্তি নাছিল। এনে পৰিপ্ৰেক্ষিতত তেওঁ মন্ত্ৰী হোৱাৰ পিছত কেনেকৈ হাজাৰ বিঘা মাটিৰ অধিকাৰী হ’ল।‘’
তাৎপৰ্য্যপূৰ্ণভাৱে সভাপতিজনে ৰকিবুল হুছেইন নগাওঁ জিলাৰ আধাভাগ সম্পত্তিৰ গৰাকী বুলি সদৰী কৰি কয়, ‘’নগাওঁ জিলাৰ এম জি এনৰেগা আঁচনিৰ অধীনত ৮৪ কোটি টকা ধন আবণ্টন হৈছিল আৰু জনসাধাৰণক দেখুৱাই সেইখিনি ধন পঞ্চায়তত বিতৰণ কৰে যদিও গোপনীয়ভাৱে এই ধনখিনি পঞ্চায়তৰ সভাপতিসকলক দাবী কৰি ঘূৰাই লৈ আহে।‘’
আনহাতে এই পঞ্চায়তত হৈ থকা কেলেংকাৰিৰ বিৰুদ্ধে ২০১৩ চনত আন্দোলনৰ কাৰ্য্যসূচী হাতত লোৱা হৈছিল বুলিও প্ৰদীপে মন্তব্য কৰে।
তেওঁ কয় ‘’এই দুৰ্নীতিৰ পৰা মুক্ত হ’বলৈ তথা মোৰ প্ৰতিবাদী কন্ঠ ৰোধ কৰিবলৈ চামগুৰি থানাত গোচৰ ৰুজো কৰিছিল।‘’
তাৰোপৰি সমগ্ৰ অসমত সেই সময়ত এম জি এনৰেগা আঁচনিত ২৫০০ কোটি টকাৰ কেলেংকাৰি সংঘটিত হৈ থকা বুলি মন্তব্য কৰি কয় ‘’এই কেলেংকাৰি বন্ধ কৰাৰ দাবীত ৰাজ্যৰ ইমূৰৰ পৰা সিমূৰলৈ আন্দোলনৰ কাৰ্য্যসূচী হাতত লৈছিলো। হাজাৰ হাজাৰ কৃষক-শ্ৰমিকে এই আন্দোলনত সমৰ্থন জনাই পথ-অবৰোধ কাৰ্য্যসূচীও ৰূপায়ণ কৰিছিলো। সেই আন্দোলন বন্ধ কৰিবৰ বাবে ৰকিবুল হুছেইনে মোৰ বিৰুদ্ধে দিচপুৰ থানাত এক গোচৰ ৰুজো কৰিছিল।‘’
আনহাতে তেওঁ বৰ্তমান দুৰ্নীতিত লিপ্ত হৈ গ্ৰেপ্তাৰ হোৱা ব্লক-পঞ্চায়তৰ বিষয়া-কৰ্মচাৰীসকলৰ মূল নায়ক প্ৰাক্তন মন্ত্ৰী ৰকিবুল হুছেইন বুলি দাবী জনায়।
তেওঁৰ মতে ‘’ৰকিবুল হুছেইনৰ নিৰ্দেশতে ব্লক-পঞ্চায়তৰ বিষয়াসকল কেলেংকাৰিত জড়িত হৈছিল আৰু কমিশ্যন লাভৰ অংকত দৌৰি আছিল। তেওঁলোকক গ্ৰেপ্তাৰ কৰাতকৈ চৰকাৰে মূল নায়কক গ্ৰেপ্তাৰ কৰক।‘’
তদুপৰি তেওঁ ৰকিবুল হুছেইন বন মন্ত্ৰী হৈ থকা সময়ত আফতাবুদ্দিন নামৰ নগাঁৱৰ বন বিষয়াজন ১৪ বছৰ কাল ডি এফ অ’ৰ পদত কাৰ্য্যনিৰ্বাহ কৰি থকা বুলি এক গুৰুতৰ অভিযোগ তোলে।
আনহাতে সেই একেখন সংবাদমেলতে উপস্থিত থকা গৰীয়া-মৰীয়া যুৱ ছাত্ৰ পৰিষদৰ সভাপতি মইনুল হকে কয়, ‘’প্ৰাক্তন মন্ত্ৰী ৰকিবুল হুছেইনৰ একালৰ সতীৰ্থ অনিল ৰাজাই মন্ত্ৰীগৰাকীয়ে দুৰ্নীতিৰ ধনেৰে পাহাৰ গঢ়া বুলি বিস্ফোৰক অভিযোগ অনাৰ পিছতো বৰ্তমানৰ চৰকাৰখনে ৰকিবুল হুছেইনৰ বিৰুদ্ধে কোনো ব্যৱস্থা গ্ৰহণ নকৰাত আমি সন্দিহান হৈ পৰিছো।‘’
তাৎপৰ্য্যপূৰ্ণভাৱ ৰকিবুল হুছেইন আৰু সৰ্বানন্দ সোণোৱালৰ মাজত ভিতৰুৱা গোপন বুজা-বুজি থকা বুলি অভিযোগ তুলি মন্তব্য কৰে যে ‘’কংগ্ৰেছৰ ক’ৰ কমিটীৰ সভাত স্বীকাৰ কৰিছিল যে তেওঁৰ বিৰুদ্ধে তদন্ত আৰম্ভ কৰাৰ সাহস চৰকাৰৰ নাই। দুৰ্নীতিৰ বিৰুদ্ধে শূন্য সহনশীল নীতি গ্ৰহণ কৰা সৰ্বানন্দ সোণোৱালে ৰকিবুল হুছেইনক সুৰক্ষা প্ৰদান কৰাটোহে দৃষ্টিগোচৰ হৈছে।‘’
ইয়াৰোপৰি মকবুল আৰু প্ৰদীপ দুয়োজনে বিজেপি চৰকাৰক এই ক্ষেত্ৰত নীৰৱ ভূমিকা গ্ৰহণ নকৰি দুৰ্নীতিত লিপ্ত থকা প্ৰাক্তন মন্ত্ৰীগৰাকীৰ বিৰুদ্ধে চি বি আইৰ তদন্ত দিবলৈ দাবী কৰে।
