‘এটা অসম বিৰোধী শক্তিয়ে ৰাজ্যখনত বিভাজনৰ বীজ সিঁচি ৰাজ্যখনৰ শান্তি-শৃংখলা বিঘ্নিত কৰিবৰ বাবে অহৰহ প্ৰচেষ্টা চলাই আহিছে। বৃহৎ অসমীয়া জাতিক ক্ষুদ্ৰ ক্ষুদ্ৰ ভাগত ভাগ কৰি জাতিটোক শক্তিহীন কৰিবৰ বাবেও ষড়যন্ত্ৰ কৰি আহিছে। সম্প্ৰতি ৰাষ্ট্ৰীয় নাগৰিকপঞ্জী প্ৰস্তুতকৰণত বাধা দিবলৈ ৰাষ্ট্ৰৰ ভিতৰে-বাহিৰে ন ন ষড়যন্ত্ৰ ৰচনা কৰিছে এই অসম বিৰোধী শক্তিটোৱে।’-এই মন্তব্য অসম সাহিত্য সভাৰ।
অসম সাহিত্য সভাৰ সভাপতি ড° পৰমানন্দ ৰাজবংশী আৰু প্ৰধান সম্পাদক পদুম ৰাজখোৱাই আজি এক বিবৃতি যোগে এই কথা প্ৰকাশ কৰি লগতে কয় যে ৰাষ্ট্ৰীয় নাগৰিকপঞ্জী প্ৰকাশৰ পিছতো দুষ্ট চক্ৰটোৱে সমাজৰ শান্তি-শৃংখলা বিঘ্নিত কৰিবৰ বাবে প্ৰচেষ্টা কৰিব। এনে দুষ্ট চক্ৰৰ দ্বাৰা প্ৰৰোচিত হৈ বিভ্ৰান্ত নহ’বলৈ আৰু শান্তি-সম্প্ৰীতি বিঘ্নিত হ’ব পৰা কোনো কাম নকৰিবলৈ সাহিত্য সভাই সকলোকে আহ্বান জনাইছে।
সাৰ্বভৌম দেশ এখনত ৰাষ্ট্ৰীয় নাগৰিক পঞ্জী প্ৰস্তুতকৰণ অতিশয় প্ৰয়োজনীয় বিষয় বুলি উল্লেখ কৰি বিবৃতিটোত লগতে কয় যে ৰাষ্ট্ৰীয় নাগৰিকপঞ্জীত কোনো কাৰণতে এজনো ভাৰতীয় নাগৰিকৰ নাম বাদ পৰিব নোৱাৰে। খচৰাত কাৰোবাৰ নাম বাদ পৰিলেও তেওঁলোকে বিধিগত প্ৰক্ৰিয়াৰ জৰিয়তে নাম অন্তৰ্ভুক্ত কৰিব পাৰিব বুলি ইতিমধ্যে ৰাজ্য চৰকাৰ আৰু এন আৰ চি কৰ্তৃপক্ষই নিশ্চিত কৰিছে।
জাতীয় সংগঠনসমূহে বাদ পৰা নাগৰিকৰ নাম ৰাষ্ট্ৰীয় নাগৰিক পঞ্জীত অন্তৰ্ভুক্ত কৰিবৰ বাবে আইনী সাহায্য দিয়াৰ কথাও ঘোষণা কৰিছে। অসম সাহিত্য সভায়ো এই ক্ষেত্ৰত বিশেষ ভূমিকা পালন কৰিব। গতিকে ৰাষ্ট্ৰীয় নাগৰিক পঞ্জীৰ খচৰাত কিবা কাৰণত কাৰোবাৰ নাম বাদ পৰিলেও আতংকিত নহ’বলৈ আৰু দুষ্ট চক্ৰৰ দ্বাৰা প্ৰৰোচিত হৈ সমাজৰ শান্তি শৃংখলা বিঘ্নিত কৰিব পৰা কোনো কাম নকৰিবলৈও সাহিত্য সভাই সকলোকে অনুৰোধ জনাইছে।
লগতে সমাজৰ সচেতন ব্যক্তিসকলক অসম বিৰোধী চক্ৰবোৰক চিনাক্ত কৰিবলৈ আৰু সেই অশুভ শক্তিবোৰৰ সকলো চক্ৰান্ত প্ৰতিৰোধ কৰিবৰ বাবে সজাগতা অৱলম্বন কৰিবলৈ সাহিত্য সভাৰ তৰফৰ পৰা অনুৰোধ জনায়।
