নাগালেণ্ডত নিৰ্বাচনী মিত্ৰ বিজেপিয়ে ইয়াৰ ভাগত পৰা ২০ জন প্ৰাৰ্থীক টিকট দিয়াৰ কেই ঘণ্টামানৰ পিছতে নৱগঠিত এন ডি পি পিয়েও (নেশ্যনেলিষ্ট ডেম’ক্ৰেটিক প্ৰগ্ৰেছিভ পাৰ্টি) ইয়াৰ ভাগত পৰা ৪০ জন প্ৰাৰ্থীৰ নাম ঘোষণা কৰিছে।
এন ডি পি পিৰ মুখ্য মন্ত্ৰিত্বৰ প্ৰাৰ্থী আৰু লোকসভাৰ সাংসদ নেইফিউ ৰিউ আৰু দলটোৰ সভাপতি চিংৱাং কন্যাকে চুমুকেডিমাত থকা দলটোৰ মুখ্য কাৰ্য্যালয়ত এই তালিকা ঘোষণা কৰে। তালিকা ঘোষণা কৰাৰ পূৰ্বে দলীয় কৰ্মীক উদ্দেশ্যি দিয়া ভাষণত ৰিউই কয় যে দলটোৱে বিজেপিৰ সৈতে শাসনলৈ আহিলে সুপ্ৰশাসন আৰু সুস্থিৰ চৰকাৰ প্ৰদান কৰিব। লগতে নাগাসকলৰ ইতিহাসৰ গতি সলনি কৰিব বুলিও তেওঁ কয়। তেওঁ দলৰ প্ৰাৰ্থীসকলক কাইলৈৰ পৰা মনোনয়ন দিবলৈ আহ্বান জনায়।
অভিজ্ঞ নেতাজনে দলৰ প্ৰাৰ্থীসকলক তেওঁলোকৰ কাৰ্য্যসূচীবোৰ ৰাইজৰ জ্ঞাতাৰ্থে আগ বঢ়াবলৈ কোৱাৰ লগতে বিৰোধী নেতাক সমালোচনা নকৰিবলৈও আহ্বান জনায়। সকলো আইন মানি চলিবলৈ আৰু বিনম্ৰভাৱে আচৰণ কৰিবলৈও তেওঁ আহ্বান জনায়।
অহা দুদিনৰ ভিতৰত দলে নিৰ্বাচনী ইস্তাহাৰ প্ৰকাশ কৰিব বুলি তেওঁ কয়। নাগা ৰাজনৈতিক সংকটৰ সমাধানৰ বাবে কাম কৰি যাব বুলিও কয় তিনিবাৰকৈ ৰাজ্যখনৰ মুখ্য মন্ত্ৰী হোৱা নেতাজনে।
উল্লেখযোগ্য যে নাগালেণ্ডত আগন্তুক বিধানসভাৰ নিৰ্বাচনৰ বাবে মনোনয়নপত্ৰ দাখিল কৰাৰ সময়সীমা অহা ৭ ফেব্ৰুৱাৰিত অন্ত পৰিব। এই পৰ্য্যন্ত কোনো প্ৰাৰ্থীয়েই মনোনয়নপত্ৰ দাখিল কৰা নাই। এন এছ চি এন তথা নাগা হোহো বিলাকৰ নিৰ্বাচন বৰ্জনৰ আহ্বান তথা ইয়াৰ ব্যতিক্ৰমে বিষম পৰিণতি ভুগিব লাগিব বুলি দিয়া ভাবুকিৰ কথাটো এইখিনিতে মনত পেলাব পাৰি।
আনহাতে তেওঁ কয় যে কেন্দ্ৰৰ শাসনত থকা এন ডি এ আৰু প্ৰধান মন্ত্ৰী মোদী আৰু বিজেপিয়ে নৱগঠিত দলটোৰ প্ৰতি প্ৰকাশ কৰিছে। ইয়াৰ চিন স্বৰূপে ৰাজ্যখনৰ শাসনত থকা এন পি এফৰ সৈতে থকা ১৫ বছৰীয়া মিত্ৰতাৰ অন্ত পেলাই দলটোৰ সৈতে প্ৰাক-নিৰ্বাচনী মিত্ৰতা কৰিছে, গতিকে প্ৰাৰ্থীসকলে যাতে বিশ্বাস ভংগ নকৰে তাৰ বাবে তেওঁ আহ্বান জনাইছে।
আনহাতে নাগা ৰাইজ আৰু নাগা হোহো বিলাকে নিৰ্বাচনৰ পূৰ্বেই নাগা ৰাজনৈতিক সংকটৰ সমাধান বিচৰা কথাটোত সমৰ্থন প্ৰকাশ কৰিও নেতাজনে কয় যে নিৰ্বাচন এটা সাংবিধানিক প্ৰক্ৰিয়া আৰু ইয়াক মানি চলিবই লাগিব।
আনহাতে নৱগঠিত এন ডি পি পিৰ সৈতে প্ৰাক-নিৰ্বাচনী মিত্ৰতা কৰি বিজেপিৰ ৰাষ্ট্ৰীয় নেতৃত্বই ৪০খনকৈ আসন এৰি দিয়াৰ ফলত নাগালেণ্ড ৰাজ্যিক বিজেপিৰ মাজত অসন্তুষ্টি সৃষ্টি হোৱা সত্ত্বেও ৰাজ্যিক নেতাসকলে আজি কৈছে যে তেওঁলোক ৰাষ্ট্ৰীয় নেতৃত্বৰ নিৰ্দেশৰ দ্বাৰা পৰিচালিত হ’বলৈ বাধ্য। তেওঁলোকে তেওঁলোকৰ আৱেদন সন্দৰ্ভত ৰাষ্ট্ৰীয় সভাপতিৰ পৰা উত্তৰ পাবলৈ অপেক্ষা কৰিব বুলিও কয়।
উল্লেখযোগ্য যে যোৱা ৩ ফেব্ৰুৱাৰিত বিজেপিৰ ৰাষ্ট্ৰীয় নেতৃত্বই নাগালেণ্ডৰ নৱগঠিত দল এন ডি পি পিৰ সৈতে প্ৰাক-নিৰ্বাচনী মিত্ৰতা কৰি দলটোক ৪০খন আসন দি নিজলৈ ২০খন আসন ৰাখিছিল। ইয়াৰ বাবে নাগালেণ্ড ৰাজ্যিক বিজেপিত ক্ষোভৰ উমান পোৱা গৈছে। ৰাজ্যিক বিজেপিৰ সভাপতি আৰু সম্পাদকে ৰাষ্ট্ৰীয় নেতৃত্বলৈ তেওঁলোকে এই মিত্ৰতা মানি ল’ব নোৱাৰে বুলিও পত্ৰ প্ৰেৰণ কৰিছিল।
