কৰ্মচাৰীৰ অভাৱত বিপদত পৰিছে এয়াৰ ইণ্ডিয়া এক্সপ্ৰেছ। চৰকাৰী সূত্ৰ অনুসৰি বিমান সংস্থাটোৱে এয়াৰ ইণ্ডিয়া এক্সপ্ৰেছৰ ৭০ খনতকৈও অধিক বিমান বাতিল কৰিবলৈ বাধ্য হৈছে। যাৰ বাবে যাত্ৰীসকল বিপদত পৰিছে। প্ৰায় ৩০০ কৰ্মচাৰীয়ে একেলগে হঠাৎ ছুটী লৈছে, যাৰ ফলত এনে পৰিস্থিতিৰ সৃষ্টি হৈছে বুলি এয়াৰ ইণ্ডিয়াৰ এগৰাকী বিষয়াই জানিবলৈ দিয়ে।
সূত্ৰ অনুসৰি এয়াৰ ইণ্ডিয়াৰ এশৰো অধিক কেবিন ক্ৰু অসুস্থ হৈ পৰিছে। সকলো ছুটীত আছে। সকলোৰে মোবাইল ফোনটো চুইচ অফ হৈ আছে। খবৰ অনুসৰি এয়াৰ ইণ্ডিয়া কৰ্তৃপক্ষই তেওঁলোকৰ সৈতে যোগাযোগ কৰিবলৈ চেষ্টা চলাইছে। একেলগে যথেষ্টসংখ্যক কেবিন ক্ৰুৱে হঠাৎ ছুটী লোৱাৰ ফলত আন্তঃৰাষ্ট্ৰীয় আৰু ঘৰুৱা বিমান সেৱাত প্ৰভাৱ পৰিছে।যাৰ ফলত ইতিমধ্যে ৭৯খন বিমান বাতিল কৰিবলগীয়া হৈছে।
শাৰীৰিক অসুস্থতাৰ বাবে এই ছুটী লোৱা বুলি বিমান সংস্থাটোৱে জানিবলৈ দিয়ে। কিন্তু সূত্ৰৰ পৰা জানিব পৰা মতে, নতুন নিযুক্তি ব্যৱস্থাক লৈ কিছুদিন ধৰি শ্ৰমিকসকলৰ মাজত অসন্তুষ্টিৰ সৃষ্টি হৈছে। বহুতৰে মতে এনেদৰে কৰ্মচাৰীৰ গণ ছুটী লোৱাটোও নিযুক্তি নীতিৰ প্ৰতিবাদ হ’ব পাৰে। অৱশ্যে এয়াৰ ইণ্ডিয়াৰ এগৰাকী মুখপাত্ৰই দাবী কৰে যে, ‘আমাৰ কেবিন ক্ৰুৰ বৃহৎ সংখ্যকে অসুস্থতাৰ কাৰণে শেষ মুহূৰ্তত ছুটী লৈছিল। যাৰ ফলত বিমান সেৱাত পলম হৈছে। বহু বিমান বাতিল কৰিবলগীয়া হৈছিল। আমি কেবিন ক্ৰুৰ লগত কথা পাতি কথাটো বুজিবলৈ চেষ্টা কৰিছো। সমস্যাটো ক্ষিপ্ৰতাৰে সমাধান আৰু বিমান সেৱা স্বাভাৱিক কৰাৰ বাবে সকলো পদক্ষেপ গ্ৰহণ কৰা হৈছে।”
এয়াৰ ইণ্ডিয়া এক্সপ্ৰেছৰ বিমান বাতিলৰ বিষয়ে অৱগত কৰি যাত্ৰীসকলে ছ’চিয়েল মিডিয়াত একাধিক পোষ্ট দিছে। বিমানবন্দৰত উপস্থিত হোৱাৰ লগে লগে বিমান বাতিলৰ খবৰ পোৱা বুলি বহু লোকে অভিযোগ কৰে।
