নিজৰ ঠাইত গোটেই ৰাজ্যৰ অন্তৰাত্মা কঁপাব পৰা এটা অমানৱীয় ঘটনা সংঘটিত হোৱাৰ সময়ত কাৰ্বি আংলং স্বায়ত্ত শাসিত পৰিষদৰ মুখ্য কাৰ্য্যবাহী তুলিৰাম ৰংহাং ক’ত আছে? কংগ্ৰেছে কালি অভিযোগ কৰিছিল যে ঘটনাৰ পিছদিনাই কাৰ্বি আংলং স্বায়ত্ত শাসিত পৰিষদৰ মুৰব্বীজন লণ্ডনলৈ ব্যক্তিগত স্বাৰ্থত উৰা মাৰিছিল। পৰিষদৰ মুখ্য কাৰ্য্যবাহীজনৰ এনে অনুভূতিহীনতাৰ ছ’চিয়েল মিডিয়াটো বিৰূপ প্ৰতিক্ৰিয়া দেখিবলৈ পোৱা যায়।
অভিযোগ মতে, মুখ্য কাৰ্য্যবাহীজন তেওঁৰ পুত্ৰৰ এডমিশ্যনৰ বাবে লণ্ডনলৈ গৈছিল। এনে পৰিপ্ৰেক্ষিতত ১১ জুনত কাৰ্বি আংলং স্বায়ত্ত শাসিত পৰিষদৰ হৈ আন আন সদস্যই এখন সংবাদমেল অনুষ্ঠিত কৰি ডকমকা কাণ্ডক তীব্ৰ ভাষাৰে গৰিহণা দিয়াৰ লগতে নিহত দুয়োজনৰ পৰিয়াললৈ ৫ লাখকৈ টকাৰ অৰ্থ সাহায্য আগ বঢ়োৱাৰ কথা ঘোষণা কৰে।
লগতে দুয়োজন দুৰ্ভগীয়া নিহত যুৱকৰ আৱক্ষ মূৰ্তি ঘটনাস্থলীত নিৰ্মাণ কৰাৰ কথাও ঘোষণা কৰে। সংবাদমেল সম্বোধন কৰা কাৰ্বি পৰিষদৰ সদস্যসকলে তুলিৰাম ৰংহাঙৰ নিৰ্দেশমতে এই সিদ্ধান্ত লোৱা বুলি জানিবলৈ দিছিল।
আনহাতে আজি অলপ সময়ৰ পূৰ্বে তুলিৰাম ৰংহাঙে আকৌ সংবাদমেল দি একেখিনি কথাকে দোহাৰে।
উল্লেখযোগ্য যে উন্মত্ত লোকৰ দ্বাৰা নীলোৎপল দাস আৰু অভিজিত নাথৰ হত্যাৰ নিদাৰুণ ঘটনাটোৰ পিছতে কাৰ্বি আংলং স্বায়ত্ত শাসিত পৰিষদৰ মুখ্য কাৰ্য্যবাহী তুলিৰাম ৰংহাঙে নিজৰ সন্তানৰ এডমিশ্যনৰ বাবে লণ্ডনলৈ উৰা মৰাক গৰিহণা দিয়া দেখা গৈছে ছ’চিয়েল মিডিয়াত।
ৰংহাঙে টুইটাৰত ঘটনাটোৰ বাবে দুখ প্ৰকাশ আৰু সমবেদনা জ্ঞাপন কৰি আছে যদিও ব্যক্তিগত স্বাৰ্থক অগ্ৰাধিকাৰ দি প্ৰশাসনিক মুৰব্বী হিচাপে থকা গুৰুদায়িত্বক অৱহেলা কৰা বুলি অভিযোগ উঠিছে।
কাৰ্বি সাহিত্য সভাৰ শোক প্ৰকাশ :
আনহাতে কাৰ্বি সাহিত্য সভায়ো বিষয়টোত নিজৰ তৰফৰ পৰা শোক প্ৰকাশ কৰাৰ লগতে ডকমকা কাণ্ডই সমগ্ৰ কাৰ্বি আংলংবাসীক মৰ্মাহত কৰিছে তথা বিশ্ববাসীৰ ওচৰত লজ্জিত কৰিছে কয়। সভাৰ সাধাৰণ সম্পাদক কামচিং হাঞ্চেই এই মন্তব্য কৰে। সভাই ডকমকাৰ ঘটনাৰ দোষীক কঠোৰ শাস্তিৰ দাবীও তোলে।
হাঞ্চেই কেইজনমান অন্ধবিশ্বাসী, নিষ্ঠুৰ লোকৰ বাবে সকলো কাৰ্বিক জগৰীয়া নকৰিবলৈও আহ্বান জনায়। তেওঁ লগতে কয় যে কাৰ্বি আংলঙলৈ আহিবলৈ কাৰো অনুমতি ল’ব নালাগে। ছচিয়েল মিডিয়াৰ মজিয়াত চলি থকা অপপ্ৰচাৰ আৰু আতংকৰ বাবেই এই দুৰ্ভাগ্যজনক ঘটনাটো সংঘটিত হ’ল বুলি কয়। ৰাজ্যৰ বিভিন্ন ঠাইত থকা কাৰ্বি আংলঙৰ ছাত্ৰ-ছাত্ৰী বা যিকোনো কাৰ্বি লোকক এই ঘটনাৰে জড়িত নকৰিবলৈ আহ্বান জনায় হাঞ্চেই।
