কলিয়াবৰৰ ৰূপহীহাট আৰক্ষী নিৱেশ তথা আমবাগান আৰক্ষী চকীৰ অন্তৰ্গত দক্ষিণ পোতাকলং এলেকাত এটা বনৰীয়া ম’হৰ আক্ৰমণত আজি এজন লোকে প্ৰাণ হেৰুৱাব লগীয়া হয়।
জানিব পৰা মতে যোৱা কিছুদিন ধৰি অঞ্চলটোৰ এখন ধাননী পথাৰত থিতাপি লৈ থকা বনৰীয়া উক্ত ম’হটোৱে এলেকাটোত এক আতংকময় পৰিবেশৰ সৃষ্টি কৰি আহিছে।
উল্লেখযোগ্য যে আন দিনাৰ দৰে আজিও খেতিপথাৰত কাম কৰি থাকোঁতেই বনৰীয়া ম’হটোৱে খেদি খেদি আক্ৰমণ কৰাত ৰহম আলি নামৰ খেতিয়ক জন গুৰুতৰভাৱে আঘাতপ্ৰাপ্ত হৈছিল।
পিছত স্থানীয়লোকে আহত ৰহম আলিক ততাতৈয়াকৈ নগাওঁ অসামৰিক চিকিৎস্যালয়ত ভৰ্তি কৰাই যদিও লোকজনৰ চিকিৎস্যালয়ত মৃত্যু হয়।
আনহাতে ঘাটকৰূপী বনৰীয়া ম’হটোৱে সম্প্ৰতি কলিয়াবৰৰ দিঘলীআটি পথাৰত থিতাপি লৈ আছে বুলি জানিব পৰা গৈছে।
ঘটনাৰ পিছতে বন বিভাগৰ এটা দল উক্ত স্থানত উপস্থিত হৈ ঘটনাৰ বুজ লয়।
