উন্নত প্ৰযুক্তিকৌশল প্ৰয়োগ কৰি গতিশক্তিক বৈদ্যুতিক শক্তিলৈ ৰূপান্তৰ কৰিব পৰা এটা শক্তি প্ৰকল্প স্থাপনৰ বাবে মেঘালয় চৰকাৰ আৰু ৰিনিউ জুল প্ৰাইভেট লিমিটেডৰ মাজত আজি শ্বিলঙত এক চুক্তি স্বাক্ষৰিত হয়।
চুক্তিখন মুখ্য মন্ত্ৰী মুকুল চাংমা আৰু মেঘালয় চৰকাৰৰ শক্তিবিভাগৰ বিষয়া আৰু ৰিনিউ জুল প্ৰাইভেট লিমিটেডৰ প্ৰতিনিধিৰ উপস্থিতিত স্বাক্ষৰিত হয়। ৰিনিউ জুল প্ৰাইভেট লিমিটেডৰ প্ৰতিনিধিকেইজনৰ মতে এই প্ৰযুক্তিকৌশলক ক্ল’জড লুপ ভাৰ্টিকেল টাৰ্বাইন (Closed Loop Vertical Turbine) বুলি জনা যায়।
জানিব পৰা মতে প্ৰস্তাৱিত শক্তি প্ৰকল্পটো দেশৰে নহয় সমগ্ৰ এছিয়াৰ ভিতৰত এই ধৰণৰ প্ৰথমটো প্ৰকল্প।
‘এই নতুন প্ৰযুক্তিটোৱে প্লাবিতা আৰু মাধ্যাকৰ্ষণিক বলৰ নীতিৰ ভিত্তিত কাম কৰিব’, এজন প্ৰতিনিধিয়ে কয়।
তেওঁলোকে জনায় যে এক মেগাৱাট বিদ্যুতৰ বাবে প্ৰায় ৮ কোটি টকা খৰচ পৰিব আৰু কোম্পানীটোৱে নিচেই কমেও ১০০ মেগাৱাট উৎপাদনৰ লক্ষ্য লৈছে।
প্ৰথমে ২৪ মেগাৱাট ৰিভয় জিলাৰ বৰ্ণিহাতত উৎপাদন কৰা হ’ব। আন দুটা স্থানৰ ভিতৰত আছে মেণ্ডিপথাৰ আৰু আমপতি।
মেঘালয় শক্তি বিভাগ আৰু কোম্পানী দুয়োটাকে অভিনন্দন জনাই মুখ্য মন্ত্ৰী মুকুল চাংমাই কয় যে মেঘালয় হ’ল এনেকুৱা ঠাই, য’ত ব্যৱসায় কৰা সহজ আৰু এই পদক্ষেপে এটা ইতিহাস সৃষ্টি কৰিব আৰু সমগ্ৰ বিশ্বৰ পৰাই বিনিয়োগকাৰীক আকৰ্ষণ কৰিব।
‘মেঘালয়ে বিশ্বৰ বিভিন্ন কোণৰ লোকক বিনিয়োগৰ স্থান হিচাপে আকৰ্ষণ কৰিব পৰাটো এটা ডাঙৰ সফলতা।’ মুখ্য মন্ত্ৰীজনে কয়।
