আজি তেলীয়ামূৰাত এগৰাকী প্ৰৌঢ়া মহিলাই নিজেই নিজৰ গাত অগ্নিসংযোগ কৰাৰ ঘটনা সংঘটিত হৈছে। এই ঘটনাটোৱে স্থানীয় লোকৰ মাজত এক বিৰাট চাঞ্চল্যৰ সৃষ্টি কৰিছে। ঘৰুৱা কন্দলৰ বাবেই এই দুঃখজনক পৰিণতি হৈছে বুলি স্থানীয় লোকে প্ৰকাশ কৰিছে।
অগ্নিদগ্ধ মহিলাগৰাকীক মণিকা পাল বুলি চিনাক্ত কৰা হৈছে। তেওঁৰ স্বামীৰ নাম শ্যামল পাল বৃত্তিত এগৰাকী পাইপৰ মিস্ত্ৰী।
জানিব পৰা গৈছে যে আজি মণিকা পালে নিজৰ গাত অগ্নিসংযোগ কৰে। ঘটনাৰ কথা গম পোৱাৰ লগে লগে তেলীয়ামৰা অগ্নি নিৰ্বাপক বাহিনীৰ লোক ঘটনাস্থলীত আহি উপস্থিত হয় আৰু তেওঁক ওচৰৰে এখন চিকিৎসালয়ত ভৰ্তি কৰাই প্ৰাথমিক চিকিৎসা আগবঢ়ায়। প্ৰাথমিক চিকিৎসা প্ৰদান কৰাৰ পাছত তেওঁক জিবি হস্পিটাললৈ স্থানান্তৰ কৰোৱা হয়।
স্থানীয় লোকসকলে মন্তব্য কৰিছে যে আজি ৰাতিপুৱা মণিকা আৰু তেওঁৰ স্বামীৰ মাজত তীব্ৰ কাজিয়া হৈছিল। স্থানীয় লোকসকলে ভাবে যে এই কাজিয়াৰ পৰিণতিতেই মণিকাই নিজৰ গাত অগ্নি সংযোগ কৰিছিল।
অৱশ্যে মহিলাগৰাকীয়ে গাত অগ্নি সংযোগ কৰাৰ সংময়ত তেওঁৰ গিৰীয়েক ঘৰত নাছিল বুলি জানিব পৰা গৈছে। আৰক্ষীয়ে ঘটনাটোৰ এটা তদন্ত আৰম্ভ কৰিছে।
