চিৰিয়াখানাত দুৰ্নীতি, অনিময় হৈ থকাৰ কথা আজি নিজ মুখে স্বীকাৰ কৰিলে স্বয়ং বন মন্ত্ৰীয়ে। ইয়াৰ তদন্ত দিয়াৰ আশ্বাসো দিছে বন মন্ত্ৰীজনে।
“চিৰিয়াখানাত কিছুমান গণ্ডগোল চিৰিয়াখানা সুৰক্ষা মঞ্চই কোৱাধৰণে সংঘটিত হৈ আছে বুলি মই ভাবো। মই দায়িত্ব পোৱাৰ পিছতে নিজে গৈ চিৰিয়াখানা চাই আহিছিলো, তেতিয়াই মই এই কথা অনুভব কৰিছিলো।” এইদৰে কয় নতুনকৈ বন বিভাগৰ দায়িত্ব পোৱা মন্ত্ৰী পৰিমল শুক্লবৈদ্যই।
আজি চিৰিয়াখানা সুৰক্ষা মঞ্চৰ সৈতে জনতা ভৱনৰ বি-ব্লকত এখন আলোচনা চক্ৰত অংশগ্ৰহণ কৰাৰ পিছত বন মন্ত্ৰী পৰিমল শুক্লবৈদ্যই এই গুৰুত্বপূৰ্ণ মন্তব্য কৰে।
উল্লেখযোগ্য যে ‘চিৰিয়াখানা সুৰক্ষা মঞ্চ’ই চিৰিয়াখানাৰ ভিতৰত চিৰিয়াখানাৰ দায়িত্বত থকা লোকে শ শ হৰিণ ভক্ষণ কৰাকে ধৰি আন কেতবোৰ দুৰ্নীতিৰ বিৰুদ্ধে দীৰ্ঘদিন ধৰি মাত মাতি আহিছিল। এই অভিযোগৰ সত্যতা অনুধাৱন কৰিয়ে বৰ্তমানৰ বন মন্ত্ৰী পৰিমল শুক্লবৈদ্যই নিজেই এই বিষয়ে বিস্তৃত আকাৰত চিৰিয়াখানা সুৰক্ষা মঞ্চৰ সৈতে আলোচনা কৰিবৰ বাবে আমন্ত্ৰণ জনাইছিল।
আজি চিৰিয়াখানা সুৰক্ষা মঞ্চৰ এটা সঁজাতী দল চিৰিয়াখানাৰ সমস্যা তথা দুৰ্নীতি বিষয়টো লৈ বন মন্ত্ৰীৰ সৈতে এক আলোচনাত মিলিত হয়।
আলোচনাৰ অন্তত বন মন্ত্ৰীগৰাকীয়ে মঞ্চৰ সৈতে হোৱা আলোচনাক গঠনমূলক আখ্যা দি সংবাদ মাধ্যমৰ আগত কয়, “মই মন্ত্ৰী হিচাপে নিজে চিৰিয়াখানা দৰ্শন কৰি বিষয়াক সমস্যাসমূহ সমাধান কৰিবৰ বাবে নিৰ্দেশ দি আহিছো। মঞ্চই দিয়া পৰামৰ্শসমূহৰ ভিতৰত কিছুমান আমি তৎকালীনভাৱে সমাধান কৰাৰ চেষ্টা কৰিম আৰু কিছুমান সমস্যা সমাধান কৰিবলৈ অলপ সময়ৰ প্ৰয়োজন হ’ব।”
তাৎপৰ্য্যপূৰ্ণভাবে মঞ্চই কৰা অভিযোগ মতে, পূৰ্বৰ বন মন্ত্ৰী প্ৰমিলাৰাণী ব্ৰহ্মই চিৰিয়াখানা সুৰক্ষা মঞ্চই অনা এই অভিযোগবোৰত কোনো গুৰুত্ব দিয়া নাছিল। বৰং চিৰিয়াখানা সঠিকভাৱে চলি আছে বুলিহে কৈছিল। তাৰ বিপৰীতে বৰ্তমানৰ বন মন্ত্ৰীগৰাকীয়ে নিজ মুখে এই অভিযোগবোৰৰ সত্যতা স্বীকাৰ কৰিছে। “চিৰিয়াখানা সুৰক্ষা মঞ্চ আৰু আমাৰ চৰকাৰ মিলি আমি এটাই সিদ্ধান্ত লৈছো যে যিমান সোনকালে পাৰো সমস্যাবোৰৰ পৰা চিৰিয়াখানাক মুক্ত কৰিবৰ বাবে চেষ্টা কৰি যাম।”
ইয়াৰোপৰি চিৰিয়াখানা সুৰক্ষা মঞ্চৰ সাধাৰণ সম্পাদক ৰাজকুমাৰ বৈশ্যই আলোচনাৰ অন্তত সংবাদ মাধ্যমৰ আগত মত প্ৰকাশ কৰি কয়, “আমি দিয়া ২০টা দাবীত তেওঁ পূৰ্ণ সমৰ্থন জনাইছে। আলোচনাটো সম্পূৰ্ণ সৌহাৰ্দ্যপূৰ্ণ হৈছে। আমি খুবেই সুখী।”
বৈশ্যই কয় যে তেওঁ গঁৰালকেইটা চাফা কৰাৰ কাৰণে হৰিজনৰ সংখ্যা বঢ়াব আৰু দুষ্কাৰ্য্যৰ সৈতে জড়িত চাৰিজন বিষয়াৰ বিৰুদ্ধে ব্যৱস্থা গ্ৰহণ কৰিব বুলি মন্ত্ৰীজনে আশ্বাস দিছে।
“বনমন্ত্ৰীগৰাকীয়ে কৈছে যে তেওঁ নিজেই কিছুমান কথা গম পাইছে, ইচ্ছাকৃতভাৱে যে গোটেই ঘটনাটো ঘটি আছে। হৰিণা খোৱাৰ অভিযোগটোও তেওঁ মানি লৈছে আৰু ইয়াৰ বিৰুদ্ধেও এক তদন্ত তেওঁ কৰাব।” ৰাজকুমাৰ বৈশ্যই কয়।
বৈশ্যই কয়, কি কাৰণে বন ধ্বংস কৰি ‘বনসৃষ্টি’ নামৰ বিপণন কেন্দ্ৰ নিৰ্মাণ কৰা হ’ল, সেইটোৰো তদন্ত কৰা হ’ব বুলিও বন মন্ত্ৰী পৰিমল শুক্লবৈদ্যই আশ্বাস প্ৰদান কৰিছে।
উল্লেখযোগ্য যে চিৰিয়াখানাৰ ভিতৰত চলি থকা কেলেংকাৰিৰ তদন্তটো উচ্চ পৰ্য্যায়ৰ তদন্তৰ বাবে মুখ্য মন্ত্ৰীৰ সৈতে আলোচনা কৰা হ’ব বুলি বনমন্ত্ৰীগৰাকীয়ে আশ্বাস দিয়া বুলি তেওঁ সদৰী কৰে।
ইতিমধ্যে বন বিভাগৰ মুখ্য সচিবক চিৰিয়াখানাৰ দুৰ্নীতিৰ সন্দৰ্ভত তদন্ত কৰিবলৈ চৰকাৰৰ ফালৰ পৰা নিৰ্দেশ দিছে যদিও চিৰিয়াখানা সুৰক্ষা মঞ্চ এইটো মানি লোৱা নাই। চিৰিয়াখানা সুৰক্ষা মঞ্চই চিৰিয়াখানাৰ কেলেংকাৰিৰ চি বি আই তদন্ত বিচৰা বুলি আমাক জানিবলৈ দিয়ে।
আনহাতে, চিৰিয়াখানাৰ ভগা দেৱালসমূহৰ প্ৰাৰম্ভিক পৰ্য্যায়ৰ কামো আৰম্ভ কৰিছে বুলি মঞ্চৰ সাধাৰণ সম্পাদক বৈশ্যই নৰ্থ-ইষ্ট নাওক জানিবলৈ দিয়ে।
