বৰ্তমানৰ বিজেপি নেতৃত্বাধীন কেন্দ্ৰ তথা ৰাজ্য চৰকাৰে অসম তথা উত্তৰ পূৰ্বাঞ্চলত সাম্প্ৰদায়িকতাৰ বীজ সিচিছে। দেওবাৰে গুৱাহাটীৰ সোণাৰাম উচ্চতৰ মাধ্যমিক বিদ্যালয় খেলপথাৰত এখন জনসভাত ভাষণ দি চিপিআই(এম)ৰ পুলিটব্যুৰো সদস্য ৰামচন্দন পিল্লাইয়ে এইদৰে কয়।
চিপিআই(এম)ৰ ২২ সংখ্যক ৰাজ্যিক সন্মিলনৰ মুকলি সভাত নেতাগৰাকীয়ে কয় যে বিজেপিয়ে নাগৰিকত্ব সংশোধনী বিধেয়কৰ দ্বাৰা ধৰ্মৰ ভিত্তিত নাগৰিকত্ব প্ৰদানৰ ভয়ংকৰ নীতি গ্ৰহণ কৰিব বিচাৰিছে।
সমগ্ৰ দেশতে গো-ৰক্ষা, লাভ জেহাদ, সন্ত্ৰাসবাদ, ৰাষ্ট্ৰীয়তাবাদৰ নামত বহু লোকক বিনা বিচাৰে কাৰাগাৰালৈ নিক্ষেপ কৰি সংখ্যালঘু মুছলমানসকলক ভীতিগ্ৰস্ত কৰি আহিছে। শিক্ষা আৰু সাংস্কৃতিক জগতত বিজেপি আৰু আৰ এছ এছৰ হস্তক্ষেপে সামাজিক উত্তেজনা বৃদ্ধি কৰিছে আৰু ই যুৱ প্ৰজন্মৰ প্ৰচুৰ ক্ষতি কৰিছে। সমাৱেশত চিপিআই(এম) নেতাগৰাকীয়ে এনেদৰে শাসকগোষ্ঠীক তীব্ৰ ভাষাৰে সমালোচনা কৰে।
কৰ্পোৰেট গোষ্ঠীৰ স্বাৰ্থত বিজেপিয়ে সংখ্যালঘুৰ লগতে জনজাতি আৰু দলিত শ্ৰেণীৰ ওপৰতো আক্ৰমণ চলাই তেওঁলোকক সৰ্বহাৰা কৰিব বিচাৰিছে বুলি অভিযোগ কৰি নেতাগৰাকীয়ে কয় যে বৰ্তমানৰ বিজেপি চৰকাৰখন স্বাধীনতাৰ পিছৰ আটাইতকৈ নিকৃষ্ট চৰকাৰ আৰু ই ৰাজনৈতিক, অৰ্থনৈতিক, বৈদেশিক নীতি, প্ৰশাসনিক সিদ্ধান্ত আদিত ধ্বংসাত্মক নীতি গ্ৰহণ কৰিছে।
চিপিআই(এম) নেতাগৰাকীয়ে কয় যে বৰ্তমান চৰকাৰৰ উদ্দেশ্যপ্ৰণোদিত নীতিৰ বাবে কৃষিখণ্ড সংকটত পৰিছে। কৃষকৰ আয় হ্ৰাস পোৱাৰ ফলত উপায়হীন হৈ নিজৰ ধন সম্পত্তি বিক্ৰী কৰিবলগীয়া হৈছে। কৃষি ঋণ ঘুৰাই দিব কৃষকে আত্মহত্যা কৰিবলগীয়া হৈছে।
পুলিটব্যুৰো সদস্য গৰাকীয়ে লগতে কয় যে চৰকাৰৰ শস্য বীমা আঁচনিয়ে কৃষকক লাভান্বিত কৰাৰ বিপৰীতে দেশ-বিদেশৰ বীমা কোম্পানীবোৰকহে মুনাফা অৰ্জনৰ সুবিধা দিছে।
চিপিআই(এম)ৰ জ্যেষ্ঠ নেতা উদ্ধৱ বৰ্মনৰ সভাপতিত্বত অনুষ্ঠিত সভাখনত দলৰ পুলিটব্যুৰোৰ আন এগৰাকী সদস্য বিমান বসু, ৰাজ্যিক নেতা হেমেন দাস, দেবেন ভট্টাচাৰ্য আদিয়ে ভাষণ দিয়ে।
ৰাজ্যখনৰ বিভিন্ন প্ৰান্তৰ পৰা কেইবা সহস্ৰাধিক দলৰ নেতা-কৰ্মী এই জনসভাত যোগদান কৰে।
