কাৰ্বি আংলঙৰ ডকমকা আৰক্ষী থানাৰ অন্তৰ্গত পাণজুৰিত অন্ধবিশ্বাসী মানুহৰ অকল্পনীয় নৃশংসতাত নীলোৎপল আৰু অভিজিতৰ মৃত্যু হোৱাৰ পিছৰ পৰিস্থিতি শান্তি-সম্প্ৰীতিৰ বিপৰীতে গতি কৰাৰ সময়তে জনপ্ৰিয় শিল্পী জুবিন গাৰ্গ আগ বাঢ়ি আহিছে বৃহত্তৰ অসমৰ স্বাৰ্থত থিয় দিয়াৰ বাবে। আজি জুবিন গাৰ্গে আজি গুৱাহাটীৰ মাজমজিয়াৰ জজ ফিল্ডত মৌন প্ৰতিবাদত বহে। তেওঁৰ লগত তেওঁৰ অনুৰাগী তথা কিছুসংখ্যক অন্যান্য বিশিষ্ট নাগৰিক-শিল্পীয়েও অংশগ্ৰহণ কৰিছে।
উল্লেখযোগ্য যে জুবিন গাৰ্গে কালিয়েই এই মৌন প্ৰতিবাদৰ কথা ঘোষণা কৰিছিল। তেওঁ এই মৌন প্ৰতিবাদত অংশগ্ৰহণ কৰিবলৈ সকলোকে নিজৰ ফেইচবুক একাউণ্টৰ জৰিয়তে আহ্বান জনাইছিল। তেওঁ এখন বৃহত্তৰ অসমৰ স্বাৰ্থত এয়া কৰা বুলি কমৰেডসকলক এই মৌন প্ৰতিবাদত যোগ দিবলৈ আহ্বান জনায়। তেওঁ লিখিছে, We wl protest today in a silent way. we wont talk. wl give our breath fr a greater assam. only our breath shud sound. join me at judges field at 4pm.bt no sound.wrap ur face n come fr th protest….comrades
আনহাতে তেওঁ নিজৰ ৱালত অসমীয়াতে এই সম্পৰ্কীয় আহ্বান সম্বলিত এটা দীঘলীয়া টোকাও দিয়ে। তাত তেওঁ লিখে-
“কাৰ্বি আংলঙৰ ডকমকাত যিটো ঘটনা সংঘটিত হ’ল, সেইটো বৰ দুৰ্ভাগ্যজনক। একবিংশ শতিকাৰ দ্বিতীয় দশকতো কেনেদৰে আমাৰ মানুহবোৰ অন্ধবিশ্বাসৰ দৰে অযুক্তিকৰ সমস্যাৰে ভাৰাক্ৰান্ত হৈ আছে, সেয়া দেখি চিন্তাই হৈছে। ডেকা ল’ৰা দুজনক তেনেদৰে এজুম মানুহে আগ-গুৰি নভবাকৈ মৰিয়াই মৰিয়াই মাৰি পেলালে- সেয়া দৃশ্য কোনোবাই চাব পাৰিব জানো?
কিন্তু নীলোৎপল আৰু অভিজিতৰ লগত যিটো হ’ল সেইটো কাইলৈ আপোনাৰ বা মোৰ লগতো হ’ব পাৰে। এই ঘটনাটোক সকলোৱে এটা শিক্ষা হিচাপেই গ্ৰহণ কৰক। শিক্ষাৰ অভাৱ, অন্ধবিশ্বাস আৰু মূৰ্খতাৰ বাবেই ডেকা ল’ৰা দুটাৰ মৃত্যু হ’ল। লিখা-পঢ়া কৰি নিজৰ চহীটো মাৰিব পাৰিলেই কোনো শিক্ষিত হৈ নাযায়। শিক্ষিত হোৱা মানে চিন্তা কৰাৰ শক্তি আহৰণ কৰা। এনেকুৱা লাগে যেন স্কুল-কলেজ খুলি সেই মানুহবোৰক নাম লগোৱাৰ ব্যৱস্থা কৰা হৈছে যদিও কোনোবাই যেন তেওঁলোক পঢ়ি-শুনি স্বাধীন হোৱাটো বিচৰা নাই। ৰাস্তা-ঘাটবোৰো বেয়া। তেওঁলোকক আঁতৰাই ৰখা হৈছে। এই কথাবোৰৰ বিচাৰ হ’বই লাগিব।
ইফালে নীলোৎপল আৰু অভিজিতক কোবাই হত্যা কৰা দৃশ্য সম্বলিত ভিডিঅ’টোত এজন আৰক্ষী জোৱানকো দেখা বুলি কৈ কয়, এজন আৰক্ষী বিষয়াই ভিডিঅ’ ফুটেজ লৈ থকা দেখিছো। তেওঁৰ দায়িত্ব কি আছিল?” তেওঁ আকৌ লিখিছে—“জাতি বা ঠাইখন লৈ কথা নাই। মানুহৰ প্ৰতি মানুহৰ ভালপোৱা টুটি আহিছে -সেই পুলিচ বিষয়াজনেই তাৰ প্ৰমাণ।”
জুবিনে কয়, “ঘটনাটোৰ পিছত ব্ৰহ্মপুত্ৰ উপত্যকাৰ বহুতেই কাৰ্বি আংলং জিলাখনক বা বিশেষ এটা জনজাতিৰ লোকক আক্ৰমণ কৰিছে। এইটো বেয়া কথা। গুৱাহাটীত এনে ঘটনা বহুতকেইটা হৈছে। লক্ষ্মী ওৰাঙক বেলতলাত চোঁচৰাই চোঁচৰাই লৈ যোৱা হৈছিল। তেতিয়া গুৱাহাটীখন বৰ্বৰ আৰু অসভ্য হৈ গৈছিল নেকি? মই তেতিয়াও অপৰাধৰ বিৰুদ্ধে আৰু মানুহৰ জীৱনৰ সপক্ষে মাত মাতিছিলো। আজিও সেই কাৰণেই আঘাত পাইছো। অপৰাধক এটা সম্প্ৰদায় এটাৰ সৈতে সাঙুৰি মূল ইছ্যুৰ পৰা পলাই যাতে কোনো নাযায়—সেয়া আহ্বান জনাইছো।”
আন বহু কথাৰ লগতে জুবিনে শেষত সকলোকে আহ্বান জনাই লিখিছে —এই ঘটনাটোৰ পৰা আমি শিক্ষা লওঁ আহক। অন্ধবিশ্বাস, কুসংস্কাৰ, বিভেদৰ ৰাজনীতি, শিক্ষাৰ অভাৱ, বিবেকহীনতা –এই আটাইবোৰ সমস্যাৰ বিৰুদ্ধে চিন্তা কৰি সঠিক ৰাস্তা এটা বিচাৰিব লাগে।”
আনহাতে আজি মৌন প্ৰতিবাদৰ থলীত জুবিন আৰু তেওঁৰ লগত প্ৰতিবাদকাৰীসকলে দোষী কঠোৰতম শাস্তি দিয়াৰ দাবী তোলাৰ লগতে উক্ত দিনা ঘটনাস্থলীত উপস্থিত থাকিও নীৰৱ ভূমিকা লোৱা আৰক্ষী লোকজন আৰু ডকমকা থানাৰ অ’ চি আৰু জিলাখনৰ উপায়ুক্তক তৎকালে নিলম্বিত কৰিবলৈ দাবী জনাইছে।
