কাৰ্বি আংলঙৰ ডকমকাৰ ঘটনাৰ পাছত এইবাৰ সোপাধৰা সন্দেহত ডিমা হাচাও জিলাৰ উমৰাঙচুৰ দিয়ুঙমুখ আৰক্ষী থানাৰ অন্তৰ্গত পানীমুৰত কালি এগৰাকী মহিলাৰ মৃতদেহ উদ্ধাৰক কেন্দ্ৰ কৰি ইতিমধ্যে চাঞ্চ্যল্যৰ সৃষ্টি হৈছে পাহাৰীয়া জিলাখনত। মহিলা গৰাকীক দুর্বৃত্তৰ দলে হত্যা কৰি পানীমুৰৰ কপিলী নৈৰ দাঁতিত শিলৰ খাদত পেলাই দিয়ে। গোৰ্খা সংগঠনৰ হেঁচাত পৰি আৰক্ষীয়ে মহিলাৰ মৃতদেহ উদ্ধাৰ কৰি পৰিয়ালৰ লোকক চমজাই দিয়াৰ পাছতো পৰিস্থিতি শান্ত হোৱা নাই।
আজি হাফলঙত ডিমা হাচাও জিলাৰ প্ৰায় দহটাৰো অধিক সংগঠনে এক সংবাদ মেল পাতি এনে হত্যাকাণ্ডৰ তীব্ৰ ভাষাৰে গৰিহণা দিয়াৰ লগতে ডিমা হাচাও জিলাৰ আৰক্ষীৰ ভূমিকা লৈ প্ৰশ্ন উত্থাপন কৰে। কাৰণ পানীমুৰ আৰক্ষী চৌকিৰ পৰা মাথোঁ ২০০ মিটাৰ নিলগত এনে অমানৱীয় ঘটনা সংঘটিত হয় যদিও আৰক্ষী নিমাত।
অভিযোগ অনুসৰি মানসিকভাৱে ভাৰাক্ৰান্ত ওমকুমাৰী শৰ্মা পানীমুৰৰ এখন দোকানৰ সম্মুখত বহি থকা সময়ত নিজকে গাওঁৰক্ষী বাহিনীৰ লোক বুলি পৰিচয় দিয়া দুগৰাকী ব্যক্তিয়ে মহিলা গৰাকীক সোপাধৰা সন্দেহত টানি লৈ যায়। ইয়াৰ পাছৰ পৰা মহিলাগৰাকী সন্ধানহীন আছিল। কিন্তু দুৰ্ভাগ্যজনক ভাবে পাঁচ দিনৰ মূৰত তাইৰ মৃতদেহ উদ্ধাৰ হয়।
অৱশ্যে আজিৰ সংবাদ মেলত উপস্থিত ব্যক্তিসকলে প্ৰশাসনক সকীয়াই দি কয় যে এই হত্যাকাণ্ডৰ আঁৰত থকা দুৰ্বৃত্তসকলক চিনাক্ত কৰি অনতিপলমে আৰক্ষীয়ে গ্ৰেপ্তাৰ কৰি দৃষ্টান্তমূলক শাস্তি দিব লাগিব।
অল আছাম গোৰ্খা ষ্টুডেন্ট ইউনিয়নৰ সম্পাদক জীবন শৰ্মাই কয় যে আৰক্ষীৰ মইমতালিৰ কাৰণেই দুৰ্বৃত্তৰ দলে আৰক্ষী চকীৰ সমীপৱৰ্ত্তী নৈত মহিলাৰ মৃতদেহ পেলাই থৈ যোৱাত সক্ষম হয়।
ইতিমধ্যে ডিমা হাচাও জিলাৰ আৰক্ষী অধীক্ষক প্ৰশান্ত শইকীয়া উমৰাঙচুত বাহৰ পাতি আছে। ঘটনাৰ লগত জড়িতৰ সন্দেহত সাতজন ব্যক্তিক আটক কৰা হৈছে। তথাপি অঞ্চলটোত এতিয়াও চেপা উত্তেজনা বিৰাজ কৰি আছে।
আজি হাফলং লেডিজ ৱয়েলফেয়াৰ অৰ্গেনাইজেছনৰ কাৰ্যালয়ত অনুষ্ঠিত সংবাদ মেলত গোৰ্খাৰ বাহিৰে ডিমাচা মাডাৰ্চ এছচিয়েশ্যন, হাফলং লেডিজ ৱয়েলফেয়াৰ অৰ্গেনাইজেশ্যন, দিবৰাই মহিলা সমিতি, ব্লুহিলছ্ ছচাইটি, আৰ’হ ছচাইটি আদি দল সংগঠনৰ প্ৰতিনিধি উপস্থিত থাকে।
